我參加了籃毛毛演奏會: 謎之房間與食物
咦？哩一度咪係我既班房？點解我會係度？
從班房既窗簾中隱隱約約透射住陽光，而係班房之內...只有我同一個背影。
哩一個背影就坐係最前排既坐位到，佢係邊個？我行過去拍一拍佢既膊頭，
擰轉面既人，竟然係呀怡！？
呀怡對我講
”我等咗你好耐...”
”咩野等咗我好耐？”
”今日我終於有機會同你講啦...”
吓，唔通係表白？但係，佢唔係同允行一齊咗既咩？
我知啦，一定係允行同佢分咗手，之後搵我做水泡，我身為一名男子漢，根本唔需要咁既愛情！
只要我有隻右手，就足夠嫁啦！
呀怡企起身，向我逼近，我地塊面貼得好近。咁近距離望住對方，
我感覺到我個心有種被擠壓既感覺！
佢既輪廓真係有種說不出的美。雖然我口裏就話對女神已經放棄，但係身體卻很誠實。
佢既嘴唇正步步進逼緊黎！我完全冇縮開既念頭，哩一次我將獻上我既初吻！
哩種氣味...哩種感覺...嘴唇上的觸覺...係啦...係充滿住愛的一吻！
我緊閉住雙眼，好好享受哩一刻，陶醉係只有我倆既時光中...
軟軟既嘴唇，唇上有少少汗毛，有陣煙味同埋豆腐火腩飯既味道...究竟呀怡你食咩黎？
我睜開雙眼......發覺一切有如夢幻泡影，我唔明...我唔明點解係呀怡變咗大叔！
我立即推開大叔，分開我地既嘴唇。
”年輕人，你終於醒啦...”
大叔抹去嘴唇上的口水，從褲袋拎咗包紅雙喜香煙出黎，點燃住其中一枝香煙，
但係...我既不快都未溜走。
”屌，大叔你做乜啺我呀！”
大叔背對住我，咬住枝煙話
”啱啱情況危急，只好出此下策...”
咩情況緊急，我諗吓我黎到哩到之前做緊咩先...
如果我無記錯，我比個大嬸噴完之後就暈咗，之後點就唔知啦。我問大叔
”咩情況危急？”
”你啱啱心跳停止咗，所以我用心肺復甦法，咁先救返醒你。你而家覺得點？”
”我覺得我個口好臭。”
我差啲死？到底發生咗咩事？話時話我究竟係邊一度？
四周都係黃色既牆壁，天花板有盞大射燈，而眼前就有一道門同埋有一堆家具，
但係，唔知點解哩個地方好有親切感。
係啦，無錯啦，係媽麵咪廣句既拍攝地點！點解我同大叔會係度？而其他人去哂邊呢？
”細路，你嘴角有少少白色粉末...”大叔指住我嘴邊。
我用手指摔一摔啲粉，之後食咗一啖，哩種味道係媽咪麵包粉果陣味！
”喀”門打開了。而黎既人係一位大嬸，企係佢隔離既係藍毛毛，藍毛毛正拖住大嬸隻手。
大嬸指住啲家具，佢話
”藍毛毛，你去幫我搬啲檯同凳過黎”
藍毛毛二話不說就完成了。大嬸對住我地講
”請坐”
而我始終都忍唔住要問聲
”你究竟係邊個？”
”藍毛毛你出去先。”藍毛毛聽到大嬸既指示後即刻走出房門。
佢繼續講落去
”你地餓唔餓？要唔要食野？”
我同大叔揮手表示唔洗，但係大嬸話咁樣係做地主之誼，於是佢叫藍毛毛入黎。
”藍毛毛，叫廚房整幾道菜黎。”藍毛毛再次走出門口。
突然，佢又叫返藍毛毛返黎，佢話
”我涷，教細啲冷氣機個溫度。”藍毛毛跟住照做，又走出門口。
佢之後又叫番藍毛毛返黎，而藍毛毛個樣十分之無奈。
”小心啲去。”藍毛毛又走出門口。今次應該係最後一次。
如果我呀媽係咁我應該嘔血嘔到成地都係，好彩佢唔係我呀媽...
咪住！佢係咁叫藍毛毛出出入入，係唔係專登拖延時間？唔得，我要講番正題。
正當我想開口講既時候，大叔放低佢手頭上枝煙，大大力拍咗檯一下，一面嚴肅咁問
”答我...你究竟係邊個。”
大嬸面上露出冷冷既笑容，佢話
”我只係一個要湊仔女既師奶...或者...你可以學佢地咁叫我媽咪。”
佢地係指邊個？唔通係指藍毛毛佢地？無理由嫁！咁樣做係有違天理！我忍唔住要同佢講
”你...你居然同猩猩做啲咁既野...”
大叔同大嬸好無奈咁望住我...我講錯咩野呀？
咦！？綠毛毛之前講過佢係人喎，即係佢可能係後天先變成而家個樣，
咁我咪真係講錯野...
正當我反醒緊既時候，大叔一野捉住大嬸既衣領，將佢成個人秤起咗。
大叔咁既樣我真係未見過，係佢旁邊我都感受到佢啲怒氣，佢話
”係唔係你地捉走我個仔！”
而大嬸此時紅都面哂，好尷尬咁話，
”你啱啱大力得濟，址甩咗我個罩...”
”喀”，大門打開，藍毛毛正係度搬啲餸黎，但係藍毛毛正好見到哩一幕，
佢即刻放低手頭上既餸，好嬲咁衝過黎捉住大叔隻手，而大叔都要收手。
大叔同藍毛毛一動也不動咁對峙。藍毛毛完全係蓄勢待發既樣，準備用佢隻獠牙刺穿大叔！
本能反應令到大叔立刻從腰間拎出佢枝手槍，而大叔突然好驚訝咁講咗句
”屌，我枝槍呢？”
係喎，我枝槍又去咗邊？我即刻檢查自己身上既任何部位，但係都搵唔到，
睇黎藍毛毛佢地都蠢唔哂，識得拎哂我地啲隨身物件...
”藍毛毛，收手，繼續做返你要做既野。”大嬸整理緊自己既衣領。
而藍毛毛開始端啲餸黎檯上。啲餸菜有個蓋遮住，入面係咩我都唔知。
但係，唔知係唔係我已經從下午果餐之後未食過野，我真係好肚餓，仲有既係...
我唔可以否認，啲餸真係好香。
而藍毛毛佢要拎開隻蓋啦！真係好期待今晚食乜餸！
熱氣從蓋旁邊湧出，入面係咩餸都睇到少少。
大嬸開始要介紹每道菜，
”哩一味就係清蒸媽咪麵。”
我頂，咩野黎嫁...煮媽咪麵已經夠難食啦，仲要係清蒸。
”跟住哩一味叫做紅燒豆腐媽咪麵。”
救命呀，我唔想再見到啦...
”而哩一味叫做茄汁焗媽咪麵。”
好啦，完啦，三味餸都介紹完啦，應該再冇其他餸掛...
大嬸又講啦，
”藍毛毛，拎埋啲湯黎。”
我眼泛淚光咁望住藍毛毛，而佢用一個感同身受既表情望住我。
當藍毛毛拎啲湯過黎上檯時，大嬸佢要介紹啦...
”哩一盎湯叫做，西洋菜蕃茄南北杏媽咪麵湯。”
究竟我食唔食哩一堆奇異的餸呢？我望一望大叔個樣，佢個樣真係有少少百感交集，
憤怒、嘔心、恐懼、可憐既神情全都反映佢塊面上，佢又再講多次，
”係唔係你地捉走我個仔！”
大叔好策略！咁樣就可以番入正題唔洗食黎自異界既食物。
今次大嬸唔再轉彎抺角，好直接咁講，
”想要番你既仔嗎？想要既話我可以比番你！去搵啦！我將所有的捉返黎既人都要佢地住係哩棟樓到！”
大嬸好似顛咗咁講哩一番說話。
大叔繼續追問落去
”點解你要咁做！點解要捉我地黎哩到！攪演唱會既目的又係咩！”
大嬸企返起身，快步咁走出房門，留低既只有幾道菜，但係並冇留低任何答案。
大叔好嬲咁一野踢道門。我心諗「唔通我同大叔已經玩完？」
我對於將來既我地都有少少擔心，係唔係遲下我都會變到毛毛咁？
我唔知，我只係一心諗緊點樣先走出哩一個鬼地方。
係喎，我之前有部電話一路袋係身。但係，佢地又拎走埋...
大叔坐返埋位到，冷冷笑咁講咗句
”想要困住一隻野獸？哈...哈...哈！”
”大叔...係兩隻。”
大叔望住我點了一下頭。相信佢諗緊既係有信心走出哩一度，有信心就快可以見番德仔。
而我...有邊個可以見...
有一樣野我唔係好明，點解大叔佢身手了得都比人捉咗黎哩一度...所以我就問大叔啦，
”話時話大叔點解你會比人捉咗黎哩度？”
”講起我就址火啦，話說我同你走散咗之後，我就一路跑一路跑，於是我就跑到一間房到。
既然同你走散咗梗係用對講機搵你啦，但係我搵極都搵唔到你...”
”唔好意思，我果時係十樓比藍毛毛佢地捉住咗，糾纏之間唔小心跌咗部機出黎。”
”好啦，我跟住就諗住十二點半係返約定地點集合，就諗住出門口啦，點知道門開極都開唔到！”
我都知嫁啦，大叔身手了得點會咁輕易比人捉住。我繼逐追問，
”而你比藍毛毛佢地發現到你？”
”唔係...佢地本身發現唔到我，只不過直到你既出現先發現到我。”
”大叔你咁講係咩意思？”
大叔佢企起身，吸咗啖煙之後背對住我，同我講
”佢地將你送咗黎哩一間房...”
”......”
即係大叔佢逃走時黎到哩一間房，而哩一間房專係困住人...
”細路，唔好灰心住，我地一定逃得出哩一間房。”
從大叔既眼神之中，我睇得出有一股堅定既意志。
”你憑咩咁人信心？”
大叔回頭望住我講
”因為我係一名...地盤佬。”
此時，係放傢具既其中一台老舊既電視無端端發出聲音，
電視畫面突然出現了高海寧，說
”I WANT TO PLAY A GAME!”