我參加了籃毛毛演奏會: COME ON JAMES
有一件事我唔係幾明，點解藍毛毛佢地唔黎走火通道既？佢地唔係應該搵緊我地既咩？
”綠毛毛，點解走火通道毛影都冇隻既？”
”媽咪～”綠毛毛做咗個交叉既手勢。
咁即係話有人唔比佢地入黎哩到？
我地去到16樓到停低咗，而綠毛毛就指示叫我係門到望出去。
咦？奇怪啦，一個毛毛都無，係唔係個個都去搵緊我同大叔呢？
走廊只有一度門，莫非果一度門入面就係收埋人既地方？
真係好期待呀怡知道我去救佢既反應，等我練一練點樣出場先。
如果我入到去，呀怡應該會問
”你黎救我地？”
”冇錯，我係黎救你地...都係唔好，個感覺唔係特別專注呀怡，諗第二個。
呀怡，其實我唔想失去你...呀怡，我不會讓你一個人...呀怡，你生命之中永遠會有一位騎士係你身邊...
呀怡，就算幾困難都好，都有我係度...呀怡，藍毛毛有咩好怕喎，生命有希望，前路由我創...”
當我仲諗緊條問題既時候，我已經行到黎門口，只要我一推開度門，就可以同大家重蓬。
我緊握住門柄，向前一推，緊閉雙眼，係時候要感受大家熱烈既歡迎！
突然，傳黎既係尖叫聲！
”呀！！！！！！！！！！！！！！！！！！！！！！”
邊個尖叫，係唔係鄭嘉穎係到？都唔係人在遠方，蟬沒有和唱，點解要尖叫？
我張開雙眼，發覺大家都好似好驚我，究竟係咩事？
我頂，原來係我著住粉紅毛毛套裝，唔怪得知個個都驚到賴哂屎咁。
正當佢地賴緊屎既時候，我東張西望，睇緊呀怡係邊...
搵到啦！而佢身邊就有陳強，允行同揚惠。我行埋去佢到，佢顯露出極害怕既樣。
都好，等我嚇一嚇佢地，比個驚喜佢。正當我行到去佢果到，佢攬住允行！？
我有冇眼花，應該幻覺黎既姐，呀怡同佢講，
”BB我好驚”而允行都緊緊咁攬實呀怡。到底係咩事？
唔得啦，我都要叫啦，
”呀！！！！！！！！！！！！！！！！！！！！！！！！！”
突然之間，我中了陳強一拳，
訓咗係地下，跟住仲要騎係我身上，不斷咁打，佢話
”仆你個街呀，捉我地返你？唔打到你見紅變紅毛毛我係唔會收手。”
陳強既打擊遠遠不及我心中既打擊，此刻既痛係由內發出...
綠毛毛佢過黎捉住陳強隻手，一野將佢推去牆邊，而我都除件毛毛套裝出黎，
但係，我既心情真係...真係有些少苦澀。
呀怡好驚喜咁問”你黎救我地？”
果然不出我所料，但係我既答法睇黎都係用唔上啦...
服左幾年既兵役，諗住係哩一個戰場上面獲取些少成就，所以我幾經辛苦，都要黎到哩一到，
領取勝利既旗幟，而我差少少身亡，換黎既只係得英勇勳章...
望住佢地攬埋一齊既野，真係好酸，或者，你可以講我係好葡萄允行。
講真，我邊方面唔及允行？讀書？運動？
事業？咁細個，我地應該冇得對比掛。
當呀怡慢慢咁鬆開允行時，我仔細咁睇允行，睇吓點解女神會選擇佢唔選擇我時，
望見佢件西裝既牌子，再望一望我件衫既牌子，算啦，我明啦，得啦。
”嗯...係呀...我黎救你...你...你地...”我個鼻開始酸酸地。
陳強行過黎，申條脷出黎，扮可愛咁講咗聲
”唔好意思，打得你咁傷”。
其實我真係唔傷，只係陳強太睇得重自己。我就話啦
”唔係好傷既姐。”
”唔係喎，睇你個鼻紅紅地，隻眼都開始腫腫地，肯定比我打傷嫁啦！唔好扮唔痛喎。”
”講真，真係唔痛，只不過見返你地有少少開心而感動到流眼淚姐。身既痛都唔及心既痛...”
陳強睇黎悟出我句說話既意思，而綠毛毛佢見到我咁樣，佢都行過黎，搭住我膊頭，
係哩一刻，只有真正既毒撚先明白我既感受，原來，允行唔係毒撚，我先係...
但係點解呀怡、允行都要行埋過黎搭我膊頭！佢地算係咩意思先！
唉，我已經唔想再留係度啦...此刻，女神叫咗我既英文名，同我講咗句
”Come on James...”
坐係到既揚惠都企起身，走埋黎同我講
”我見返你都好感動呀！咁樣係唔係叫一日不見如隔三秋呢？”
我都費事理揚惠，我同陳強講
”我地不如快啲離開哩一度啦，萬一藍毛毛佢地搵到上黎就大獲啦。”
”你確定你一個人可以帶咁多人走？”
陳強唔講我都唔發覺原來哩到仲有咁多人，大概有五十位。我就話
”得啦，無問題，信我者得救。”
正當我行緊去大門既時候，有陣似曾相識既氣味係附近散發出黎。
無錯，係Chanel NO.5既香水，唔通演奏會索女都係到？
我沿住氣味一路聞，終於比我搵到啦。
”Hi，咁啱既？”我對索女打招呼，
”咦？點解你會係度既？明明你冇比毛毛捉黎。”
係我身後既呀怡同允行都係度等緊我，而佢地係度拖緊手。唔得啦！睇到我眼火爆。
有人話，要治療失戀既傷痛，就係要展開新一段戀情。
眼前既然係一位索女，我仲唔立刻上馬？好！就等我黎個英雄救美愛情故事。
”雖然我冇比毛毛佢地捉黎，但係，我感覺到你有危險，我就追上黎啦。”
”哈哈”索女面上露出怕羞既樣，而係我身後既揚惠只見佢青根暴現，狠狠咁盯實索女。
”咁唔知你比唔比我追到你呢？”索女比我哩一句話攪到驚惶失措，係哩一刻，我就知道我得米啦。
女神？從哩一刻開始，我唔會再服兵役啦，係哩一個世界上就會多一位男神，就係我！