我參加了籃毛毛演奏會: 特別通道

幾經一番波折先出到黎會場出面，不過最痛苦唔係哩樣，
係出黎果時揚惠借啲椅攬住我，話因為太逼，攬住會易行啲，佢同我講

”你有冇睇過啲雀仔點飛，佢地會V字排開咁飛，咁樣會有利飛行，我學佢地咁，我係咪好醒？”

這是哪兒來的自信？好醒？雀仔？V字排開？
如果佢係一隻雀，咁佢應該係隻火雞。
哩個時候，呀怡同陳強相繼步出。佢仲見到我同揚惠攬埋一齊，正確黎講係被攬...
呀怡仲同我講
”蠱惑啦你地...”





之後仲要係到陰陰咀笑，陳強仲要係到多把口
”果然係食家！”

哩個時候，揚惠唔出聲，仲笑笑口扭扭擰擰。我同佢地講
”你地誤會哂啦，岩岩人多...”

陳強即刻串番我
”明嫁啦！”





唉，算，講咩佢地都唔會信，我轉移話題
”人齊未？人齊就出發閃人。”

呀怡哩個時候講左樣我地咁多個人都唔為意既野
”仲有允行呀！佢未出黎。”

允行？係喎，當日舉手明明有4個人，但係而家得3個。我話
”我唔見到佢黎喎。”

呀怡：”咩野呀，佢開場果時都係到，係你地班死人頭先會忽略佢，算啦，我入番去搵下佢”





允行係我果班一個唔起眼既男仔，佢既存在感可以係零。
你都可以話佢係一個毒男，我同佢講野既次數都唔係好多次。
最有印象應該係佢成日出高價叫人幫佢最功課，特別係中文哩一科，
作文，綜合，我從來都未見過佢做過，最離譜係佢連老師交比佢果啲project都交比人完成，
講真，我唔係幾鍾意佢。不過既然呀怡話返去搵就搵啦。

”好啦，我地一齊入返去搵佢啦。”


－－－－－



”啲人咁快走哂既，咁允行會去左邊？”呀怡問。





場內既人已經走哂，台上面只係得返幾條毛係到，我仲執左幾條做留念，話哂都係我偶像啲毛。
我扮泰山咁叫
”允～～～～～行～～～～～”，

傳黎既只有回音，冇任何人應我，
只有揚惠應我
”HEEHEE，你真係好幽默。”

跟住佢仲要拉一拉佢對黑絲，
係唔係解佢都好幽默？定係覺得佢咁樣好誘人？
我唔在意哩一樣，我只係在意點解呀怡咁急住搵允行？
佢可能係已經輕輕的走了，正如佢輕輕的來。無需要咁擔心佢姐。

有去過睇香港體育館既人都會知，啲明星係有特別通道，




於是我就諗個傻仔會唔會係行左去特別通道呢？咁我就提議

”不如我地沿住個特別通道行，睇吓撞唔撞到允行”。
於是，我地進入左特別通道。

特別通道燈光暗淡，有幾條光管壞左，閃下閃下咁，前面發生咩事都睇唔清楚。
“突特得 得特特 突特得特突...”
進入特別通道後，我地就一路聽到首歌，如果冇估錯，藍毛毛佢地就係前面，
但係行左咁耐我地都見唔到允行。
於是呀怡大叫咁講

”允行，你係邊呀”

“突特得 得特特 突特得特突...突特得 得特特 突特得特突...突特得 得特特 突特得特突...”





歌聲愈黎愈接近，佢地好似跑緊過黎咁。
突然之間，有個黑影係我地左手邊撲出黎，仲將我拉左入去一間房到。
到底係邊個！？我完全反應唔到就比佢掩住左我把口。
我仔細一望，原來係大叔，佢舉起食指

”硃...”

佢放開佢隻手，跟住叫我樸低係地下，佢透過門既隙罅望出去，咁我都望埋一份啦。
啱啱我先同佢地企係到，佢地去左邊呢？

”媽咪～”

係藍毛毛發出既聲音。我見到啦，我見到啦，咁近距離接觸真係好開心，
但係佢唔係藍毛毛，係黃毛毛。





個黃毛毛扮怪獸都扮得幾似下，個樣有幾分似Beeno，姐係小學英文書上面果隻怪獸，
不過係大隻版。講真，如果係萬聖節既時候都應該嚇到人。
佢行過黎我地間房到，大叔禁住我個身，千叮萬囑叫我唔好出聲，唔好亂沃。
佢透過隙罅望入黎。由於我身處佢既下方，佢既呼吸聲我聽得好出楚，係有幾分似猛獸果隻。
佢慢慢由企係到望入黎變成伏低咁望入黎...
我由興奮既心情變成緊張既心情，因為，我既視線絕對唔可以移動。
只要我一移動，佢就會發覺我地係到，我地既眼珠只不過相隔10cm。
佢深深咁呼出一口氣，露出一副獠牙，叫左聲

”媽咪～”。

我知道，眼前既唔再係人扮既藍毛毛，而係真正既怪獸黃毛毛。