我參加了籃毛毛演奏會: 媽咪麵既藍毛毛演奏會開始啦！
5月30日7點，我黎到會場門口，我望下左望下右，睇下有邊個黎左。
原來都有幾多個人都中左獎，真係人山人海，連CCTVB都黎左報道今次既演唱會，
我仲見到方東升係到報緊新聞，估唔到真人都幾似東星班，
”藍毛毛演奏會現場都幾多人下，雖然藍毛毛演奏會經常係廣告係出現，
但係真正舉辦既次數係零次既，有唔少無法獲獎既市民都希望體會演唱會，
就算係無得入場，都想係外面感受下哩一次世紀盛事呀，不如，我地訪問一下持有門票既人既心情啦。”
死啦死啦，佢行緊埋黎，我唔想上鏡呀，但係佢地痴哂線咁跑過黎，算啦，是福不是禍，是禍躲不過。
”先生，唔知你而家既心情係點既呢？”
”好開心”
”有幾開心呢，可唔可以講多少少呢？”
”er...er...傷心既相反果種心情”
佢有少少不滿咁講”多謝你受訪”就走了。之後陳強同呀怡就黎到啦，
陳強用奇怪既打量我，佢話
”點解你著便服既？”
”有咩問題？”
呀怡笑笑口同我講
”係演奏會喎，演奏會唔係應該著西服之類既咩”
係喎，今次真係大獲啦。我即刻紅都面哂，我仔細咁望一望附近既人，真係好多人著西裝，
唉，著錯衫唔洗驚，橫掂都有人著便服。
會場宣報：”為免影響持票人士，請沒有持票人士前往會場左邊”
今次真係大獲啦，全部著便服既人都行去左邊，得返我一個特別明顯咁，
早知唔上咁多高登，成日話咩藍毛毛演唱會，原來係演奏會，今次真係柒過關家姐，
話時揚惠呢？黎啦黎啦，哇，真係不得了。吊帶黑絲原本係個唔錯既組合，但係經過揚惠身上，
馬上變成吊頸死屍，算啦，唔望，入場。
”L15...L15...呀，搵到，係到啦。”
係我下一層既揚惠對住我揮手表示搵到位，我都同佢揮手勉强咁微笑，
其實，係男人既，都希望側邊座位既人都係索女，
無論你係搭巴士，定坐地鐵，以及睇戲，都有咁既想法，
但係，我左手邊係一名中年大叔，難免有少少失落，咁我梗係期待右邊係黎一位索女啦！
點知，係哩一個時侯，我右手邊無端端變得好光，有陣好香既味漂過黎，無錯，係Chanel NO.5既香水，
我望一望右面，真係好光，彷彿有天使光環係佢個頭到，我瞇埋隻眼掃過去，嗚哇～～～
點解咁科幻既野可以係現實出現，無理由既，唔通天神唔只有金莎跌落凡間，仲將佢個女dom落凡間？
”請問哩到係唔係L14呀”
”er...係...係呀...”
佢掃一掃佢條裙之後坐係個位到。
成件事都好完美，藍毛毛演奏會加美女在旁，就好似一杯83年百事加藍毛毛媽咪麵，此刻死而無憾。
會場突然變得昏暗，伸手不見五指，終於要正式開始真正既藍毛毛演唱會，
全場進入一片沉默，中央咪傳來聲音，
”媽咪麵既藍毛毛演奏會開始啦！”
“突特得 得特特 突特得特突...”
冇錯，好震憾，唔係廣告，終於有一次唔係廣告到聽到哩一首歌，
我眼泛淚光，坐係我側邊既索女都有少少感觸，你眼望我眼，
相對無言，唯有淚先行。
身為一個18歲既男人，都好難係咁既氣氛之下唔流淚，
16年既媽咪麵生涯，唔知幾多年既媽咪麵廣告，腦海中不斷浮現出電視上的藍毛毛，
但係同電視唔同既係係現場，特別有另一種感覺。
舞台既燈光愈來愈光亮，舞台一覽無遺，台上既指揮係藍毛毛，而演奏既都係毛毛，
不過係紅毛毛、橙毛毛、黃毛毛、綠毛毛、同埋黑毛毛。真係好驚喜，原來毛毛都唔係得藍毛毛。
我心中其實有一個疑問好耐，到底演奏完果一首歌會仲有咩歌？
第一首歌接近尾聲，定係佢地真係得一首歌呢？
中央咪傳來，
”睇下佢地幾合拍，不如買返包媽咪麵一齊黎合奏啦！”
全場齊狂歡，不斷有人高聲吶喊，甚至有人跪係地上痛哭。
”如果你地仲有機會買媽咪麵既話”
究竟講緊乜野，咩野叫仲有機會既話？我聽唔透，我聽唔透究竟個旁白講緊乜野，
就好似講緊可樂走杯咁，究竟講緊乜野？
”啪、啪、啪、啪”
係邊個？邊個咁明目張膽做咁既事？
原來係熄燈既聲音。
在伸手不見五指的情況下，我聽到一聲
”媽咪～”
係藍毛毛發出既叫聲。與此同時，我隻眼開始適應黑暗既環境。
我見周圍既人不斷歡呼，咁我當然叫埋一份，我望一望索女，佢都好投入咁叫，
而我再望一望側邊既大叔，我見佢神色有少少慌張，我一面困惑，心諗
「點解有得睇藍毛毛演奏會都咁既樣，有幾多人想中獎都冇機會，
甚至有人死左都未等到個演奏會，佢簡直唔配睇藍毛毛演奏會。」
突然，大叔望一望我，佢好似感受到我視線，我地互相對望，氣氛都幾尷尬下，
於是我扮到好熱情咁同佢講
”好黎 ..YAO...COME ON...HEY..CHECK..CHECK..YAO...-YAO YAO YAO...
今日...我地..好齊人...係晒演..奏會到好驚人...藍毛毛演奏會...個個爭住睇...
我地....全部....-..好好睇...今日我地就o係度就...拍手...拍手.-...........拍手
...拍手.........講完...講-講講講完”
講完之後，大叔投以奇怪既目光望住我，肯定諗緊我哩個白痴仔做緊乜，
點知，佢無端端捉住我隻手，同我講
”我感覺到，我感覺到我個仔就係附近！”
”先生，冷靜，你可唔可以放手先”
”好對唔住...”佢鬆開佢隻手，之後同我講
”你有冇睇過媽咪麵過廣告？”
”梗係有”
”廣告入面其中一個細路係我個仔”
”所以呢？””
”佢拍完過廣告我就冇再見過佢...”
”你有冇報警呢？”
”有，但係警察做唔到野，並無任何佢既消息...”
燈光再次亮起。
奇怪，索女唔見左。雖然高登成日話靚女唔柯屎，但係我唔會信，
今次再一次證明哩個事實。
女旁白既聲音再次傳來
”接住落黎，有請我地既搖滾版毛毛出場！”
有人曾經問過，藍毛毛演奏會係唔係一首歌，原來真係得一首歌，
只不過每首歌以唔同既風格去演奏，另有一番味道。
”接住落黎，有請我地既中樂版毛毛出場！...接住落黎，有請我地既太鼓版毛毛出場！...
接住落黎，有請我地既hip hop版毛毛出場！...接住落黎，有請我地既電子版毛毛出場！”
如是者，藍毛毛演奏會接近尾聲，每個人都十分盡興，我望一望下低個揚惠，佢原來一直望緊我！
之後我唔好意思咁dup低頭扮綁鞋帶，我同自己講
”我絕對唔會食肥妹，絕對唔會！”
散場啦，個個人都離開會場，只有大叔仍然坐係到一言不發，而且我仲未見到索女返黎，可能走左都未定。
我見揚惠都動身離開，咁我都係時候走啦，我同大叔揮手講再見，
大叔好空虛咁坐係度，點燃住枝煙，係地下拎佢個背囊上黎，揮手向我道別。
或者，千載難逢既演奏會已經結束。
但係...實際上既演奏會先係岩岩開始...