於這個Wtsapp群組中輸入名字，他就死路一條: 其之二十五

其之二十五)
 
『一天只能殺一人』
『退群者將需承受後果』
『輸入死亡名單者必須為號碼本人，否則無效』
 
《亡選》這種神奇的力量，究竟還蘊藏多少未知的規則？而它的目的又是甚麼？難道只為看著我們不斷在生死間輪迴，享受這種快感？
 
時間已經是00:06am
梁一懿平安無事；我亦尚在人間。




樂平呼了一口氣：「個結果係好，但係我真係諗唔明...」
 
說實話，我也是一頭冒水。
「佢哋寫上嘅『江懷禮』，有無寫錯字之類？」阿空單刀直入。
我有點猶疑，但事到如今，我的名字已經「通了天」，也如實作答：「佢哋無寫錯。所有資料都啱。」
 
樂平抱著頭：「一係陳仔嗰msg係由其他人代發，一係就因為admin出咗聲，所以今日個配額直接變無效，無後補...」
 
「會唔會牽強咗少少呀...？」梁一懿也認為樂平的推理太亂來。
看來樂平這種接近完美的神人，遇上不明情況會比其他人更鑽牛角尖。




 
經過6分鐘時間平復，作為事件主角的我，心中卻為此事有些眉目。
「江懷禮」的確是我身份證上的名字，只是「江懷禮」並不足以殺死我。
因為「江懷禮」不是我出生時的名字。
 
在父母離異時，我跟隨母親，改了母姓，即是「江」。即使後期父母因哥哥的死再次走近，我的姓氏也懶得再改。
 
當然，我不打算將這件事告訴他們，並非我不相信他們。只是，我更相信自己。
反正這件事只會危害自己，而且對大局無幫助。
 




我故意淡化這話題：「如果死嗰嗰唔係我...而《亡選》依然揀咗一個嚟殺嘅，就係由Fiona send出嘅『林小曼；三色台娛樂節目主持』。」
 
梁一懿嘆氣：「聽都未聽過，依啲四線姐仔，真係死咗都未必有人知啦...有無人報導都係問題。」
 
但是提到這個『林小曼；三色台娛樂節目主持』，樂平與阿空卻是面有難色。
 
「狐狸小姐開始顯露尾巴..」阿空只留下這一句。
 
樂平只是說：「近年所有人都轉睇HKTV，早就無人睇三色台...《西張北望》都得返2點收視，真係死咗都未必有人知...不過依然要留意。」
 
「好啦，既然梁一懿同我都無事，咁應該開始下一步啦。陳仔身在何方？而你之前仲有一件事要講係咩？」我趁機會將話題完全轉移。
 
樂平頓一頓，披下外衣：「陳仔係邊我已經知道，不過我哋依家去另一個地方先。」
阿空說：「江先生啱啱先入醫院，依家就走？」
看來『江先生』是指我吧？




 
「嗯...叫我懷禮啦...反正都通哂天..」我不好意思地說。
梁一懿也笑說：「咁叫我一懿啦，懷禮你都唔使下下全名咁嗌我。哈哈哈。」
 
真是嘔心的稱呼，這小妮子已經從恐懼中逃脫，只是我的手其實還沒停過顫抖。
 
「邊個話離開醫院？我哋只係去下幾層樓。」樂平笑笑說。
「樂平你要戒一戒賣關子依個壞習慣，去邊，做啲咩，應該一次過講，唔好等人問先講OK？」我對他這個自以為是全知全能的形象也是覺得膩了。
 
「記得邊個係kiNg嗎？即是這個一開始就退群的+852 X514 0013」樂平表情認真起來。
「她就在下面躺著。」
 
樂平把我們群內的人都查探過一番，kiNg作為唯一離群者有極大參考作用，樂平有他的情報亦不算稀奇。
 
「係咩病？」阿空急問。




樂平已經領我們到了電梯前：「kiNg無外傷、無內傷、機能正常，有生命跡象，不過無任何反應同意識，只係全身會出現偶發性痙攣，而腦波即呈現凌亂的訊號。」
 
這種醫學領域我鮮有涉足，唯有直接問：「完全唔明，即係點？死咗？未死？植物人？」
 
電梯打開了。
「簡單啲嚟講，kiNg發梗夢，一個可能唔會再醒嘅夢。」
 
 
『退群者後果自負。』
心中又響起這一句。
 
PS.下一章於明晚深夜更新！！特此向伊藤潤二大師其中的短篇漫畫《長夢》作最大致敬，未睇過嘅朋友可以search下長夢，短短32頁但精彩到顛。