於這個Wtsapp群組中輸入名字，他就死路一條: 其之二十二
其之二十二)
「無錯。如果《亡選》係無法解釋嘅現象，我哋持有依個電話號碼都代表住『不可思議』。」
原來我們被挑選出來並非偶然，而是我們早就是劇本上的後補人。就像做物主手上早擬好一本名冊，要我們死去活來。
「仲有，我已經查到《亡選》名單上嘅人，究竟係點死。」
一路上，我們都苦苦追查《亡選》造成的死亡原因，更親自到場目睹霍立成的死亡剎那，結果都是充滿疑問。
「樂平，唔好吊我哋癮啦，你一口氣講啦...」答案就在眼前，我連一秒都不想浪費。
天色漸暗，樂平喝了一口白開水：「個特首雖然垃圾，但佢嘅死法依然係全醫學界嘅焦點。我打聽過一啲同行嘅風聲，佢哋話當日陸百九判定為當場死亡，並唔係經醫院搶救後不治…當然有關解剖報告已屬國家機密，我都掂唔到。但係另一位死者，霍立成，我就調查得好仔細。因為當日情況混亂，佢都有被送入醫院，而接觸佢嘅係我一位老友。」
如果《亡選》造成的死因是一式一樣的話，知道霍立成的情況已非常足夠。
他慢慢說下去：「係心臟爆裂…無外傷，內部被一種不明力量或病毒導致整個心臟報廢。一個人失去心臟，等於無咗條命…我朋友係咁形容，佢話霍立成個心臟好似一早埋個粒小型炸彈咁，突然引爆，一命嗚呼。佢話只有咁先解釋得到，因為喺霍立成嘅身上搵唔到其他特別嘅病菌或病毒。」
從中午時份的工廈逃亡，至下午的樂平現身，轉眼到了晚上時份。身上的傷雖重，但對比起《亡選》背後的奧秘實在不值一哂，此刻樂平已聯絡到相熟醫院為我治療，於是我們四人再次驅車出發。
在車上阿空喃喃自語：「並唔係霍立成個心臟一早埋咗個粒小型炸彈…而係我哋每個人心臟天生都有一粒小型炸彈…就係為咗俾《亡選》去引爆...」
樂平回頭說：「無錯...我都係咁諗...」
而梁一懿亦開始爆發：「樂平你的確查到好多嘢，但下一步應該點做又係毫無頭緒！講嚟講去我哋都係企咗係度！」
「按步就班，你哋都要自己思考一下，無可能由我一個引導成件事嘛！下一步就係送阿和入醫院先，其他嘢安頓好佢再講啦。反正今日嘅亡選Quota已用盡，喺12點來臨前大家都係等。而且去到醫院有另一樣嘢俾大家睇。」樂平一邊駕駛，一邊輕鬆地說。
我礙於傷口惡化，難以介入他們的口舌之爭，只是「阿和」這個稱號的確是久違了。有一刻也想提議大家就別用假名吧，反正在場三人都知這小女孩名字是梁一懿，卻要「二號」「二號」這樣呼喊對方。但我心底又明白大家只是恰巧成為「生命共同體」，所謂的信任也許只為「求生」，真正的名字有如自己最後一道防線。
有些事，還是「寧俾人知，莫俾人見」。心照就好，說出口就不識相。
車內的四個人，短短幾十句交談中，究竟有多少句謊話？
我認為，要記住自己說過那些謊言，已經夠累了。
「唔好暈住呀，就快到啦！」阿空見我意識模糊，稍稍拍拍我的臉。
我輕笑：「死唔去嘅。」
樂平辦事效率也是值得信賴，不需特別等候，我就轉到了一私家的醫院的獨立私人病房中。當然，其中涉及姓名的樂平也處理了。
病房與手帶的名稱不是“江懷禮”，而是“厲心和”對於這種通天大能，樂平只是笑說「朝中有人好辦事」。
我沒好氣地說：「私人病房太貴...我真係未必有錢俾...」
樂平從容：「無問題，錢方面，我可能出住先，比起大家條命，一萬幾千唔算得係咩。」
梁一懿露出疑問的神色：「非住私人病房不可？」
「係呀，因為今晚，我諗住我哋四個都通宵係埋一齊。」樂平開始說出心中的計劃。
「因為今晚12點，我哋一定要搶到《亡選》嘅選擇權。如果唔係你哋三個之中，其中之一個好有機會俾佢哋殺死。」
阿空問：「佢哋係指Fiona Yu同陳仔？」
「仲有阿偉背後嗰班人。」我在病床上補充。
「無錯。如果陳仔真係喺嗰班人手中，咁佢哋就有3部擁有《亡選》能力嘅電話；Fiona到依家都無覆過Wtsapp，佢嗰部應該自成一國；我哋依邊有2號同我，但我現階段仍要飾演影子刺客嘅角色，唔可以俾佢哋知我嘅存在。所以我哋依邊有4個人，但只有一部手機。過唔到今晚，就咩都唔使講，所以聚埋一齊安全啲。加上今晚陳仔一定開電話，到時我就追蹤到佢嘅位置。」樂平的確心思細密。
梁一懿於這方面還是很具自信：「放心吧，等我諗定今晚嘅名單啦。係咪應該殺陳仔？樂平你查唔查到佢個名。」
阿空對殺陳仔一事有所猶豫，我與樂平亦不大贊成。
而時間已去到晚上十時，最後兩小時的準備工作。
下一個名額，是陳仔、Fiona還是我們奪得？
PS.小弟回港了！！下一章於明晚深夜更新！！感謝大家等待！
圖片集：
十字架山：
是立陶宛北部城市希奧利艾以北12公里處的一個朝聖地。其確切的起源無人知曉，不過據認為第一批十字架是1831年11月立陶宛人反俄起義後，放置在從前的一個軍事掩體處。[1] 幾個世紀中，前來朝聖的天主教徒在這裡安置了許多十字架，以及巨大的苦像、立陶宛愛國者的雕塑、聖母雕像以及數以千計的小型雕像和玫瑰經。目前十字架的數量據估計大約有50,000個[2]。為聯合國教科文組織錄為世界文化遺產之一。（From Wiki）
