於這個Wtsapp群組中輸入名字，他就死路一條: 其之六
其之六)
Food Court內，我只是點了一杯橙汁，對面的空姐卻是拿起一個漢堡包狼吞虎嚥。
真不知她是神經太大條還是胸有成竹。
「你唔係唔舒服咩？仲食漢堡包？」我斜眼看見她手上拿著診所的白膠袋。
「仲好講，就係要見你，先要扮病拎半日假！我見完你就要返去Standby啦。」她邊吃邊說。
我實在搞不懂狀況，這女子好像不當一回事，零擔心一樣。
難度是我想太多嗎？
「咳咳。喂，點稱呼呀怕羞仔，你都唔想我大庭廣眾叫你怕羞仔架。」她續說。
大家應該也有用「假名」的默契，但一時三刻我卻擠不出一個假名來，唯有說：「你呢？除咗叫你Emoji之外真係唔知點叫。」
她想了一下：「叫我阿空啦！」
也許是她空姐的身份，所以貪方便就直接刪去「姐」，直接叫阿空。
我差點就衝口而去說自己是「八神太一」...只是阿空最後配的是大和。
「咁..叫我大和吧。」我懶得想了。
她聽完之後倒也大反應：「你都係數碼暴龍Fans喎！怕羞仔！」
似乎我的假名是白作了…
算吧這不重要，我決定直入正題：「阿空，你點睇個Group。」
她笑一笑，將漢堡包與藥袋落在枱上，然後從手挽袋中拿出一疊文件。
「好。入正題。都係兩個可能性。一就昨日係巧合；二就亡選係死神開嘅群組。」
她說得認真，我示意她可以繼續。
「唔知你搵到啲咩資料，首先呢，個Admin電話，其實我已經試過用其他電話打去，完全唔通。而佢嘅區號+56 32係位於智利嘅復活島。一個智利嘅電話，但發中文訊息已經夠特別。另外就係群組入面嘅人，我全部都試過扮係問卷調查打過去。其中5個唔接，1個唔通。」
說實話，她辦事效率比我高。
「邊5個唔接，邊個唔通？」我有點急。
她的表情突然放下嚴肅：「你估下？」
這個問題不是笑話，她也需要知道我有多少「資料」在手。
「我有一直監察佢哋嘅在線時間，有一個叫『樂平』嘅電話號碼已經接近年幾無online，我推測呢個Number已經無人使用。」我說出自己見解。
阿空說：「對，樂平嘅電話係打唔通嘅，其他人唔聽電話都明顯係發現咗事有蹊蹺。而大家點解係個group到粒聲唔出呢？好簡單，驚囉。死咗人喎，因咩容易俾人捉走坐監架！加上我哋面對嘅可能係死神，或者一種未知力量。點知亂嗡嘢會有咩後果！」
我稍稍沉思：「我諗今晚係一個轉捩點，因為昨日係咪巧合，今晚就會知道。萬一《亡選》的確可以決定人嘅生死，咁其他人之後嘅行動就好難預測。」
阿空展現微笑：「你驚群組入面嘅人會互相殘殺？」
我眉頭深鎖：「你覺得唔會？」
「好大機會，但無咁快。不過我見怕羞仔你好似對群組中人抱有敵意，我覺得第一步都係同佢哋保持友好關係先。講真，世界成70億人，一日一個殺到下世紀都未完啦！有需要自相殘殺咩？而且我覺得我哋幾個人嘅角色應該係互相牽制，而唔係自相殘殺，之前應該有一個《亡選(壹)》嘅群組，可能就係全滅咗先到我哋(貳)登場。」她說得極具說服力。
盛載汽水的膠杯開始冒出水珠，我覺得她雖有道理，但過份樂觀。突然間，我閃出了一個想法。
「其實我哋係咪應該重點調查咗個離群者，即係阿King先。我覺得離群嘅後果好重要。」我認為如果離群的後果不嚴重，大部份人都可以解脫。
「我都係咁諗，而且阿King應該係咩都唔知，唔會咁有戒心，應該較易接觸到。只係佢唔聽我電話，我都無辦法。點都好，要睇下今晚嘅發展先。我都差不多要走，最後有兩樣嘢要Share俾你。」阿空說罷將兩張紙交給我。
我一看之下，心下大驚。
第一頁是一個購物網站，
其中一則留言是網名為「123」的人留下「63441091」的電話號碼以供聯絡。另外亦貼心地留下了「Facebook Acc」的資料。
「63441091」即是「OneTwoThree」。Facebook主頁有齊她的生日，興趣與就讀學校等等…
另一頁是一位名為Fiona Yu的女性Fb主頁，三十來歲，有點面善。
我大約猜想到阿空以Fiona Yu於Facebook搜尋，但香港的「Fiona Yu」少說也有幾百個，她為何如此肯定這個Facebook Acc屬於群內的「Fiona Yu*」？
阿空留下一句：「世界嘅科技好發達，Facebook嘅保密唔完善。用名加電話num去Search，真相自然來。而且我同依個Fiona Yu中間有Comment Fds，我要證實佢係定唔係，真係咁難咩？Fiona Yu好聰明，大約喺00:25am已經隱藏哂所有資訊，可惜我00:18左右已經Cap哂圖。」
我恍然大悟。這女人比我想像中厲害百倍。基於雄性本能，我也不想如「食軟飯」一樣，故說：「我都喺開Group嘅時候第一時間Cap咗『WTSAPP群組資訊』嘅圖，可能對日後有用，Send俾你。」
阿空拿起手挽袋：「多謝你喎，我今晚可能喺半空上，有啲咩聽朝再聯絡啦，依段時間你諗下要做啲咩啦。拜拜。」
她轉身就走，我也沒任何揮手的意圖。
3分鐘之後，我依然坐在這圓桌上。
4分鐘後，我確定阿空已經離開了我的視線。
「我快忍不住笑了。」我終於抑壓不住情緒，露出久違的笑容。
這蠢貨…居然遺留下了裝有藥物的袋子。
大家都知，西醫開的藥，都有寫上病人的名字。
果然「劉月儀」不是真名，真名是「劉悅菲」。