於這個Wtsapp群組中輸入名字，他就死路一條: 其之四

其之四)
 
+852 6354 1381的主相片是一頂女性帽子連眉毛。照道理是一個女生。
 
「依條女咁蠢嘅…?如果我推測無錯，佢應該係想Wtsapp我所以Save低我電話，而佢又有裝Line，Auto Add自己通訊錄嘅朋友，所以自動add埋我個Line Acc，最蠢嘅地方就係佢Line Set咗自己中文名做User Name..」
 
「當然劉月儀都可能係花名，我唔可以掉以輕心。」
 
面對這個Wtsapp訊息，我思前想後，看似「回覆」是對自己有利的選擇。始終在這時間，多一個朋友比較好，行事上也有個照應，加上我知道她的「疑似中文名」，處理得好可將她化為自己的棋子。
 




只是她為何喚我為「怕羞仔」？我再看看這「群組資訊」就恍然大悟。
我的暱稱是一個「害羞Emoji」。
 
以下是我與她的Wtsapp 對話
 
「Hi..你係不屑Emoji？」
「Um..係呀..我想問你知唔知發生咩事？」
「你指嗰嗰Group..？」
「係呀…」
「我同你一樣..都係唔知情…」




「你識唔識Group入面嘅其他人？」
「唔識...你呢？」
「同你一樣…sigh..」
「你有無咩打算…」
「可以點打算？好亂呀…我希望只係一場惡作劇…」
「除咗我之後，有無聯絡其餘幾個人？」
「我淨係搵你咋….我睇其他人…唔係無頭像,,就係啲奇怪頭像,,得你似返個人..」
(Um..我的頭像是自己的背影，的確比較像個「人」。)
「除咗…多謝…我都唔知講咩好…你有無諗個打俾嗰個Admin?」
「哇…邊夠膽呀！都唔知會發生咩事…你試唔試下打？」




 
我心諗這條女真是冷血涼薄刻毒…剛才自己也說「唔知會發生咩事」，轉頭就叫「你試唔試下打」…
當我是「兵」嗎？
她見我沒回應，再Send一句：「好多嘢…唔方便喺度講？聽日方唔方便？不如見個面？」
 
這女孩頗有做保險或基金的潛質…才不到30句就約見面…
但同時我認同Wtsapp不是一個好的溝通地方，如果《亡選(貳)》可以操控死亡，要監察我們的Wtsapp對話也太簡單了。而且從對話中，我們都儘量避免一些關鍵字，如「亡選(貳)」、「陸百九」、「李月常」等等…
皆因事件牽涉一宗命案，所有對話都有機會成為證據，我們自然小心翼翼。
加上一旦見面，我有機會進一步確定「劉月儀」這名字的真偽，再探究到她的職業或特徵，她的生命就被我掌控。
 
「都…都可以…不如去元朗搵間Coffee Shop？」我扮作遲疑，更添幾分真實感。
「不如12:00pm 機場二號客運大樓嘅Food Court？」她作出一個反建議。
 
其實我住港島，建議到元朗只想掩人耳目，避免撞到熟人或被她知道我住的地區。因為知道我的長相後，查找我的名字就不是難事。想不到她殺出一個機場，但細想下，機場也是一個不錯的選擇。
 




「好，到時聯絡。」我決定答應她的請求。
 
結束與「不屑Emoji」的對話後，時間已經到了02:00am，但我並沒有閒著，而是連忙將有關自己「手機號碼」的資訊都刪走。
Facebook取消電話的綁定，刪除大量照片。
手機的App很多都有「存取位置」的功能，我全都刪去。
 
曾經在網絡上，Email上留下電話的足跡都全毀滅。似終在殺掉別人前，還是先要好好保護自己。
我這個四失青年，從未如此愛惜自己的生命。
 
心底下只有一個信念：「絕不能被別人從我的電話號碼，查到我的名字。」
 
時正06:00am，精神力已到達極限的我並未可以休息，因為要為明天的「約會」做好準備。
我拿起剪刀，將鏡中那蓬鬆散亂的頭髮削掉。
 
隨著日光的照射，距離《亡選(貳)》第二回選擇尚餘18個小時。