《我炒咗車之後入廠訓咗四年覺》: 長洲上岸
啲嘢食已經燒到七七八八。
我：喂，你地，有冇嘢想玩？
某男：你架船有咩好玩吖？
我：冇咩啊，細嘅有啤牌、大富翁，大嘅有香蕉船…
某女A︰嘩！香蕉船？！
某女B︰ 正啊喂！
結衣︰我又玩！
某男A︰唉！比你地霸哂，我冇得玩…
我：唔緊要啦，你地輪流玩囉…
某女B︰喂，架船喺邊？快啲攞出嚟！
我：等等先，呢度附近有船行嫁，等我揸去第二度先。
=====================
我將遊艇揸去長洲附近，揾到一片比較安全嘅水域。然後將橡皮艇同香蕉船落水。
呢個時候，想玩香蕉船同遊水嘅同學都已經換好短衫短褲或泳裝。
"嘩！！！"
遊艇上面發出震撼性嘅聲音。
"你班咸濕佬！！！"有一個女仔大叫。
我：你地咪鬼搞佢地啦，唔係下次佢地唔敢着泳衣出嚟嫁喇…
"喂…佢地着成咁，好難唔…你明喇？"
某男B細細聲同我講。
我無言喇。
因為佢真係冇錯。
尤其係結衣…你睇吓佢…
白淨嘅幼腿…
女神級真係當之無愧！
呢個時候，結衣走過嚟揾我。
結衣：喂，覺得我套泳衣點啊？
我：着喺你身上，唔錯吖…果然係女神啊！
結衣：我呢啲邊係女神吖…
我笑笑：唔係吖，可以去收兵啊！
結衣：衰人！連你都咁笑我！！
我：唉唔玩你喇，你地係咪玩香蕉船啊？我開船喇！
唔知大家有冇玩過香蕉船，其實只係兩至四個人坐住被拖行嘅香蕉船，隻船會左摇右擺。最後一個留到喺船上面嘅就當贏。
之後我發現，原來結衣玩香蕉船真係有一手，玩咗幾次都係贏嘅。
====================
結衣：chilam！陪我玩！
我：我陪你玩，邊個揸船啊傻妹！
結果：咁我上你隻艇吖？
我：喔，好啊！
我等咗結衣上艇之後就開艇。
結衣：好似好好玩咁喎…可唔可以比我試吓？
我：揸艇唔係玩嫁！
結衣：喔…
我：你好想試吓咩？
結衣：係啊！
我：嗱，捉住。
結衣：yeah！！
我：嗱，咁樣係向左，咁樣向右…
====================
最後，大家玩完已經係下晝，肚餓到咕咕聲，終於要去長洲醫肚。
點知一上岸，大家首先嘅目標竟然唔係食飯先，而係…
"喂喂，不如去掃街邊檔囉！"
"好啊！我記得呢度有一兩檔好鬼正嫁！！"
"之後再去食…"
最後今日嘅晏晝飯就以一餐大排檔嘅下午茶作結，時為2點。
====================
之後大家想做嘅嘢都唔同。有人話想行吓山；有人話想踩單車；有人話想繼續掃街；有人又話想乜乜乜…
於是約好咗集合時間之後，我地就分開幾堆人各自各行動。
結衣：chilam，你之後有咩節目？
我：吓？我都係想周圍行吓影吓相咋，呢度啲景都ok吓…
結衣：咁我陪你吖？
我：你唔陪班姊妹掃街？
結衣：呃…我飽喇。
我：同我一齊唔怕悶咩？
結衣：唔怕啊…反正我都想劫你部單反玩吓…
結衣望一望我部單反，露出邪惡嘅笑容。
我：唉…好喇，但係你識唔識用嫁？
結衣：我未用過。
我：咁我教你。嗱，咁樣。
我雙手攞住單反示範一次手勢，之後再交比佢。
我：嗱，試吓？
結衣：咁樣？
我：唔係咁啊！
我攞返部機再示範一次。
我：嗱，咁樣。再試吓？
唉…仲係唔啱。
我：學極都唔識嘅…咁樣啊。
我伸前去捉咗佢雙手，慢慢幫佢揸好手勢。
我：咁樣。
結衣：喔，咁樣…
呢個時候時候結衣拎轉頭望一望我。
然後…大家塊面都愈嚟愈紅，升溫喇！
結衣立即又拎個頭去第二度。
結衣：我…係咪好蠢啊？
我：你都係…第一次用啫。影一張，試吓？
我嘗試化解一下緊張嘅氣氛，同時拉開返少少距離。
"咔嚓！"
我望一望佢張相。
我：咦？第一次影，ok喎！
結衣：係咩？
我：send返比你吖？
結衣：好啊，唔該哂你先。