《我炒咗車之後入廠訓咗四年覺》: 18歲生日
今朝我同啊三姨媽傾電話…當然喇，長途電話費，佢比。
三姨媽：係喎，今日好似係你18生日喎，係咪啊？
我：係啊，咁你都記得，好嘢呀！
三姨媽：大個仔喇喎，生日快樂！
我：多謝三姨媽！
三姨媽：想要咩做生日禮物呀？相機？巴士？
我即刻答：車！
三姨媽：車？模型車定遙控車啊？
我：唔係呀唔係呀…你估吓？
三姨媽：又想叫我問城巴啲朋友買啲路線顯示器呢？你爸爸都有…
呃，三姨媽佢人面真係好廣…
不過今次都估唔中。
我：唔係呀唔係呀！再估…
三姨媽：1:13嘅遙控巴士？
我：唔係呀。我想…揸…呀…
三姨媽笑笑：揸？揸遙控巴士？
三姨媽係真唔明定假唔明啊？
我：車啊！揸車啊！…
我真係比三姨媽玩到我愈嚟愈急喇！
冇錯，我自細就已經想考車牌，立志一夠18歲就考。
三姨媽：誒…車牌就得嘅。車呢就…
一架車本身就唔平，斷估三姨媽你都唔得嫁喇…
三姨媽：車呢就你侵埋我一齊揸啦！
我：即係ok？多謝三姨媽！！
三姨媽笑笑：我返到嚟就同你一齊揀車啦！講定先喇，想要咩車型呀？學你老豆當年揸波子？定benz啊？
我：toyota啦…我想要果款舊款嚟嫁。
三姨媽：舊款？可能難啲揾喎…我睇下揾唔揾到比你？
我：有冇睇過果套頭文字D啊？
三姨媽：有啊…
我：周杰倫咪揸果架白色跑車嘅…咪果架囉！
三姨媽：哦…果架…叫咩型號話？
我：AE86啊…
三姨媽：好啦…我幫你揾下啦。
結果，佢唔單只幫我揾車，連駕駛學校都揾埋，十足十廿四孝姨媽…
有個咁樣嘅三姨媽，算係執到囉！
====================
今日晏晝晴晴又走過嚟揾我食飯。
我：喂你呢排成日走過嚟揾我撐枱腳嘅？
晴晴：吓？我屋企冇人吖嘛，阿媽又出咗去返工，一枝弓食好悶嫁…
我：哦…
晴晴：同埋想見吓你囉！
我：見吓我？
晴晴：呃…朋友之間見吓唔得咩？！
我：哈…咁又唔係。
晴晴：喂係喎…你幾時先返返學啊？
我：9月先返啦…
晴晴：哦…
我：等我hea多啲時間。
晴晴：曳啊你！
我：係喇…我走咗呢段時間，學校有冇啲咩改變咗？
晴晴：吓？咪啊老黎同訓導黃退咗休，訓導個位比咗肥葉囉…
我：哦…我嚟緊應該會入返你間學校讀form 3…
晴晴：你18歲嫁喇喎…教育局比唔比嫁？好似只可以讀夜校咋喎…
我：我三姨媽人面廣嘛…佢應該搞得掂嘅。
晴晴：喔…咁就好喇，喺學校又多返個friend喇…
我：係呢，你而家讀緊…form 6？
晴晴：係呀…吖係，你入返去讀果陣應該係讀新學制果頭幾屆喇…
我：啊？新學制？
晴晴：我地要讀到中七之後考A level，你地讀到中六就要考個咩中學文憑…總之你返學之後就明嫁喇…
我：嗯…
冇耐我地就食完飯。
晴晴：喂，你等我一陣吖，我去攞啲嘢。
我：攞咩呀？？
佢講完就過返去自已屋企，問佢做咩嘢都問唔切。不過佢好快就過返嚟，手上就多咗個芝士蛋糕同一盒嘢。
晴晴：生日快樂啊貓仔！
我：喔，難怪啱啱話想見我喇…
晴晴：咁我想同你慶祝吓嘛！我整咗你最鐘意嘅cheese cake啊，試一啖吖！
我入咗廚房揾刀叉切一嚿嚟試吓…
咦？
我：手勢進步咗喎！
晴晴：依家成日整甜品嘛…
我：成日整甜品嚟食…點解你食極都唔肥嫁…？
晴晴：哈…我都唔知啊…
我：學校一定好多女同學都好妒忌你喇！
晴晴：哈哈…吖係，呢盒送比你嘅！
我：呢盒係…
係一個包咗花紙嘅盒仔。
晴晴：你開嚟睇吓先喇！
咁神祕嘅…等我開拆開嚟睇吓先…
咦？
i phone4S？
我：原來咁快已經出到4S嫁喇？
晴晴：係啊，鐘唔鐘意啊？
我：鐘意啊…咦？開咗機？
晴晴：呵呵…我入咗我個電話落去之嘛…
我：下次唔駛買咁貴嘅禮物比我啦…
晴晴：我啊媽之前買六合彩中咗獎，我有份出number嘛，佢咪分一半錢比我囉…
我：你地中咗幾多個number啊？
晴晴：5個。
我：咁咪即係三獎？！
晴晴：嘻嘻！
