我 , 係咪一個學生時代既贏家 ?: 女神篇 Part 12.

「Do...Do...喂？」呢次應該係最快聽電話既一次
「喂喂喂～係邊呀？」到左目的地但周圍望都唔見卓瑩@_@ 
「係你後面呀傻佬！」
另轉頭見到卓瑩挨係商場門口旁邊，我明明係果到行出黎但我又見唔到佢....

身穿運動風嬲、運動短褲同孭住SPI書....唔係，孭住印住大大個Nike既籃球鞋袋
風嬲入面著乜唔知啦，我唔知又點答你呢？
「哎！你做咩面青青咁既？」
「Er...無野，一陣無事」聲線較沉
話說，我岩先搭小巴過黎市中心，個小巴司機好似當自己玩緊Need of Speed，渣車成個阿木咁，Fing黎Fing去又震我都算啦，成日無啦啦急剎，車手座都嘔啦！


「哦...咁我地一陣去邊到食呀:D ？」抬頭望向我既卓瑩，咀角微微拉高，眼神亦表示出相當期待
「Er............你想呢？」講真，食放題我一隻手數得哂，
「唔...我都係食過一次放題炸！你揀啦！」
「吓！？淨係食過一次？」其實我懷疑緊呢條女係咪玩緊我
「係呀！真架！！」
「我多口問句....請問果一次係同邊個食？」心諗：試下你先...
「Wandy！」唔洗答得咁快呀話！
「Er....你...男朋友呢？無帶你去架咩？」
「我而家都無男朋友！」突登話我知架！？
「我問以前果D.......」


「...............唔好問得唔得？」卓瑩突然間低頭細說，我係咪問錯野！？
我今次死啦～我今次死啦～係咪玩大左啦？
「梳嚕...當我無問過啦！行啦行啦，我地去食放題啦！」我拉住卓瑩手臂示意前走
「..........嗯！」抬返起頭，但眼有少少濕，而亦有微笑，呢條女肯定有特別既過去！

同卓瑩無目標地行走途中，卓瑩隻手周不時撞到我隻手，但我仲諗緊去邊到食好....無理到
「唉....就去上次食果間啦！」原本我都唔想去..廢事重臨舊情景～我卻哭得出眼淚....果間野，我只係同家琪食過。
「上次你同邊個食呀？」卓瑩臉露好奇地問
「唔好問得唔得」我好有自信咁答
「咁好嚕....」卓瑩扁哂咀咁，又幾可愛既，心諗「小姐呢個世界得你有秘密咩！？」



轉眼間就到左放題間野到.....
同以前無變到，侍應無變，座位無變，食物無變，什至係座返以前我同家琪座既卡位....
但有兩樣野有變到，仲變化好大添....
其一個就係座我對面既女仔...唔係家琪，而係另一個女仔卓瑩；
仲有......現時香港地所有餐廳都有升無跌既字－價錢......無黎幾個月姐，唔洗加咁多呀屌你老味！？

「服務員(普通話讀)！寫野！」舉高手揮兩揮
「係！想要Ｄ咩呢？」又係呢個阿嬸:~( 
「呢個同呢個同呢個同呢個同呢個同埋呢個」我對住個餐牌指黎指去....
「Er..先生有無意轉個情侶套餐呢？會平Ｄ抵食Ｄ架！」
「..................」我聽完呢句成個人呆滯左，再望住卓瑩....佢成塊面紅卜卜又幾Cute
「都係唔....」正想同侍應講唔洗之時
「好呀！我地要個情侶套餐呀唔該！」我視線即刻轉向卓瑩，佢雙眼充滿神采及自信咁大大聲一句突入
「好既！」Waiter轉身就走左


「Er...哈哈...瑩姐你唔介意咩[sosad] 」
「咁樣平D呀嘛！嘿嘿」卓瑩同時拎起電話黎禁
「哦.............」如果係幫我省錢我又無乜所謂既....但呢個套餐我都未同家琪食過架:~( 
「你睇下呢對Con，靚唔靚#love# 」佢遞部電話比我睇，心諗入面條女帶梗係靚啦！
「唔錯呀！不過你帶既話會哂左佢嚕」
「去死啦你！我好差咩？」
「唔係，我覺得你唔帶呢Ｄ仲靚添」花言巧語...我牛奶傑最撚手！
「真係......？唔準呃我wo！」三七臉含情默默又微笑地講...都話你D女仔最鍾意聽呢D架啦
接住黎我地繼續有傾有講...有講有笑...傾左大概十分鐘到，我開始了解佢鍾意乜，著Ｄ乜，玩Ｄ乜
終於等到食物們上抬....
「不愧係情侶套餐.....連刺身都有圖案，有心思！」我拎住對快子開始想對Ｄ心型圖案大肆破壞既時候
「喂也！唔好食住先啦，我地影張相先」卓瑩舉高部電話另轉身打橫影，當然影埋我
「影完啦何？食得啦何？」好撚肚餓呀靚妹！
「食啦！餓鬼！」嘩屌你聽到呢句好似落閘放狗咁，我就係隻狗衝出去咬
「慢慢呀傻佬！睇住啃親呀！」卓瑩好親切地提醒我



「拿...呀.......！」卓瑩餵我食三文魚...無理由唔接架嘛
「嘩！！好辣呀！！！！」一咬落去，出事啦，我都知佢邊會咁好死

我同卓瑩繼續快樂進餐，你玩我我玩你咁，幾過癮，別人睇我地兩個似足情侶，可惜唔係....
但我果時的確諗過追卓瑩既話,應該易過追Wandy....
什至我覺得卓瑩仲好過Wandy
咁無理由為拖而拖架嘛...廢事害到個女仔。

直到突然間撞到兩個人......