《男人只係想做妳身邊的一隻小丑》: 第十八章(最終章)
Albert 叔吹出兩下哨子聲，全場人注視著他。
「好！既然兩邊都人齊，咁我地今日既活動開始啦！我是今天招呼大家的職員，我叫Albert！今日呢度全部人都要聽我指令，聽到兩下哨子聲一定要停低所有動作，望住我。如果唔跟隨指令，我會好好招呼你！」
「嗶！嗶！」此時Albert叔吹出兩下哨子聲，他語氣嚴肅地向著另一組的一個男生說：「你！」
Albert叔指著他，斥道：「你！望緊邊？我叫你 LOOK AT ME！」
那個男生本來在看著我們這邊，他被Albert 叔這樣突然指責嚇一嚇，立刻回過神來。
「終於聽到我講野啦？周到你啦！掛住望妹妹仔！」Albert叔續說，「點稱呼呀呢位先生？」
我聽到「掛住望妹妹仔」這句說話，突然漲紅了臉，因為我完全沒有留意剛剛有人望著我，而那個人竟然是…
「我叫周國衛。」
我看著阿衛的側面，一瞬間心如鹿撞。
點解佢o係度架？
我回想起…
*************
「喂…b…你聽我講…」我很久沒有聽到阿衛這樣稱呼我，「我無心攻擊你地兩個架…只係我真係覺得你唔似好幸福。」
「b…」他再一次呼叫我，我的心再刺痛了一下。
「唔係呀！！！子牽真係對我好好架！佢會陪我去玩架！！！」我哭訴著。「仲有…唔好再咁叫我啦…我已經唔再係咩bb。」
「OK...咁你地會去邊度玩丫？只要你講到比我知，等我放心，就得啦。」
「下個星期六，我地會去玩wargame。」
「係牙？咁我希望你個子牽下星期六起到身陪你去玩啦。」
「佢一定會陪我去！」
「哦…咁希望你地玩得開心d。」
「多謝喎。」
****************
唔通係果一次電話之後…佢突登黎wargame 場撞我？我細心思考著。
我立刻從口袋中拿出手機，想whatsapp阿衛向他問個究竟。
當我拿出電話之際， 熊貓用手肘撞一撞我，他說：「銀銀，留心d聽簡介啦！陣間比Albert叔話就樣衰啦！」
我被熊貓這樣一推，身體稍向左傾斜，站在左邊的子牽立即扶著我的腰，待我站穩，他還是不鬆手。
不是鄭子誠上身，但我覺得子牽和熊貓這套動作是有陰謀的。
「今日我會叫你做四圍望哥！」Albert叔對著阿衛說，「因為你特別唔聽指令，我陣間會安排你做一個好特別既角色。係咩角色？陣間再講。」
身旁的朋友向阿衛投了恥笑的目光。
「好！講番今日既活動安排！拿，據我所知，你地兩隊人就好似o係鑊上面唔傾計既兩塊牛扒。」
其他人呆若木雞地看著Albert 叔，口張開呈一個O形。
只有KIKI一個「噗」一聲笑起來，熊貓一副不解的表情望著KIKI，
「點解兩塊牛扒唔傾計？」KIKI解釋道，「因為佢地唔熟！哈哈哈哈哈…」
熊貓聽完答案之後更加無奈，他向KIKI說：「點解你會識呢d白痴IQ題…」
「因為平日聽得多呢d。但係唔知點解每次聽都覺得好好笑！」KIKI一邊說，一邊抹去眼角因為歡笑而掉的淚水。
熊貓發現，原來KIKI的笑點是這麼低。
熊貓說：「其實你都幾易哄架喎！」
KIKI向熊貓投以一個微笑。
熊貓覺得今天的KIKI跟平日有點不同。
係真係有唔同丫，定係平日我少留意佢呢？熊貓想。
「你地兩隊人就好似o係鑊上面唔傾計既兩塊牛扒。咁就岩啦，對戰既時候，一定，唔會留情！呢個畫面係我最期待既！哈哈哈！」
頂，成個辣薑哥個樣印左o係Albert叔塊面上面！子牽想。
「如果時間容許既話，今日上午，我地會o係大平原戰區場地先進行兩場以速度取勝的『搶軍旗戰』熱下身，中午，我地場地會提供每人一盒有菜有肉既飯盒，同埋一枝水，比你地好好補充體力。食完午餐，我會安排你地o係Call Of Duty Zone玩以殲滅對方為目的的 『殲滅戰』。最後，亦都係最刺激既回合，就係o係室內場玩注重隊形、合作、組織既『保護政要戰』。」
「非常好。」阿俊聽到Albert叔所安排的幾場戰爭感到非常興奮，而且已經蠢蠢欲動想到戰場大顯身手。
「開始之前，我要同大家講一講安全守則。陣間，我會比半小時大家去更衣室換好衫，你地需要著齊三樣野，頭盔，眼罩連豬鼻，同埋保護衣。保護衣分為兩款，妹妹仔果組會著迷彩色保護衣，四圍望哥果組會著深綠色保護衣。清楚？」
「清楚。」大家齊聲回應。
「好，而家請你地向我既同事拎需要既物資，而家計時30分鐘，GO！」
Albert叔吹響一下哨子：「嗶！」
所有人立即動身。
*****************
因為時間緊逼，我無時間跟阿衛問個明白，而且子牽好像看穿了我的腦袋，他一直纏繞在我身邊，就連我要去換衫，他都堅持要站在女更衣室門口等候。
我實在有點不耐煩。
在更衣室入面，我終於可以喘息。
我好清楚記得我跟Albert 叔落BOOKING 的時候，Albert叔檢查BOOKING記錄時，已經有另一個隊伍的登記紀錄，即是說，跟阿衛相遇不是刻意安排，而真的是偶然。
我同阿衛真係咁有緣？我想。
**************
「嗶！嗶！」
「好，時間夠啦！集隊。」Albert 叔也穿起了一身保護裝備，除此之外，他手上面還拿著一把長槍。
「大家能夠o係限時之內完成我比大家既任務，做得非常好！大家咁合作，我相信今日可以玩晒我所有定左既活動！」Albert 叔微笑道，「大戰即將發生！」
「YEAH！」阿俊興奮的拍手。
熊貓和子牽同時瞪眼望著阿俊，在心裡說：ON居仔…
「開始之前，我想同你地講清楚o係戰場裡面既規則。好重要既係講點為之死。戰場入面，『中槍死』。中槍死係指不論身體或裝備任何一部份中彈，中反彈既子彈唔計，比人直接射擊中彈，即代表閣下已經戰死。請你死左既時候，雙手高舉枝槍，一路講『死左』，一路慢慢行出戰場，去到觀望台，等完場。請大家誠實，如果我見到邊個中左槍又唔嗌死，我會唔客氣幫佢補多幾槍。睇下你頂到幾多槍。」
「仲有一個規矩，如果你成功伏擊對手，對手o係你六呎範圍內仲矇盛盛唔知你已經用枝槍描住佢。呢個情況，你唔可以開槍射佢，因為距離太近打中會好痛，打中重要部位甚至會出血，我絕對唔會容許呢個非常危險既動作發生。你可以做既係用槍指住佢，然後嗌『BINGO』，對手聽到之後必須投降離場。明白？」
「明白。」
「好，規則講晒，而家你地可以每一枝槍同一個彈匣，女士們可以拎輕身d既短槍。你地將枝槍入好彈之後，可以去試槍區向住帆布射擊，試下枝槍有無問題。留意番，我地今日只會用單發，大家絕對唔可以將枝槍較為連發。無問題既話而家開始計時15分鐘，15分鐘後大戰開始！LET's GO!」
「嗶！」
哨子聲響起，各人開始嘗試拿槍的滋味。
子牽拍一拍熊貓，在他耳邊說：「柔柔粗身大細，真係OK?」
熊貓看著柔柔，她正跟著大隊，準備向職員拿槍。
「小姐，你…」
職員正想開聲提醒柔柔孕婦不能落場，柔柔說：「我知架啦，我唔會落場架，我剩係諗住幫我男朋友拎枝長槍ja！」
職員微笑著向柔柔遞上長槍和彈匣，頃刻熊貓從職員手上奪走物資，子牽跟在熊貓後面。
「比我拎。佢唔方便拎重野。」熊貓冷冷地說，
「柔柔，你既然粗身大細，就唔好揀黎玩wargame丫嘛…」子牽語重心長的說。
「咁阿俊中意丫嘛。」柔柔說。
「阿俊中意…你就咩都陪佢癲咩？」熊貓衝口而出。
「喂…可頌…算啦…唔好要柔柔難做。」子牽低聲說，拍一拍熊貓。
此時，阿俊已經走到柔柔身後，他跟職員要另一套長槍和彈匣。
他諷刺地說：「佢還佢，我還我，果個男人掂過既野我係唔會要既。」
熊貓怒目瞪視著阿俊。
阿俊擺出一副「點呀？唔妥我牙？隻抽丫！」的眼神。
其實熊貓忍得到阿俊，真係好犀利。子牽心想。由始至終，熊貓都係咁有風度既一個君子。比我一定無咁偉大。
咦…係喎，銀銀呢？子牽四處張望，銀銀不知所蹤。
「OK FINE，柔柔你既決定我尊重，但你自己小心d。」熊貓拋下一句，向職員要多一套槍和彈匣，遞給子牽，然後轉身步向試槍區。
「哈哈。」柔柔說，「我其實預左自己做攝影師架啦！你地去玩啦！」
「哼，我比面我女朋友先黎ja，咁多嗲，唔抵得我贏左你牙，LOSER。」
熊貓停下腳步回頭，語氣堅定地對阿俊說：「愛情唔係一場遊戲，邊個追到、邊個同佢最後一齊唔係最重要。最重要係，我而家睇清楚，我愛佢比你愛佢多，咁比較，我已經贏左。」
「你講緊d咩呀？」柔柔吃驚地說。
「阿俊同學，如果你要證明你贏我，唔該你o係柔柔身邊睇實佢。如果你能夠為你愛既人犧牲你中意做既事，先叫贏我。」
當年，熊貓輸，是因為他沒有勇氣去表白，他怕被柔柔拒絕。當時對熊貓而言，柔柔的幸福與自己的面子之間，他選擇了面子。柔柔只是第二位。
如今，他在阿俊身上看到自己的影子，因為阿俊同樣是愛自己比愛柔柔更多，柔柔依然是第二位。但他知道還這情況還可以改變，阿俊是一個好勝的人，熊貓希望阿俊聽到他這樣下戰書，可以刺激起阿俊的好勝心。
「超，陪咪陪囉！驚你呀？」阿俊的說話很囂張，但身體卻很誠實。
「咁你仲入乜野彈？係咪放唔低呀？」熊貓給他一個恥辱的眼神。
「哎呀！都話我自己預左黎做攝影師囉！」柔柔知道阿俊很想落場，她想打圓場。
「得，我會陪柔柔！比我落場打兩場，我全個下午都陪住柔柔，咁OK?」阿俊說。
「拿，你男人黎架，講得出…」
「做得到。」阿俊打斷熊貓的話說道。
柔柔的一雙大眼睛凝視著熊貓，熊貓和她四目交頭，他倆沒有對話，但熊貓好像感覺到，柔柔像是對他說：「謝謝。」
我覺得…愛一個人，又未必一定要o係燈光底下先可以愛既…只要我可以令佢開心，我就滿足架啦。
熊貓總算說到做到。
************
子牽跟熊貓去左取槍，我趁機會走到女廁附近，whatsapp阿衛，問個究竟。
「喂，點解你o係度既？」
阿衛好像預計到我會找他，他迅速回覆我的訊息。
「為左你囉…」
「我？ (嚇驚emoji)」
「我好辛苦打電話search左好多間wargame場，先搵到丁小姐你BOOK左邊間wargame公司。」
「但係明明我book既時候，你地呢隊人已經一早book左今日架啦喎…」
「我地呢隊？哈哈，我都唔識其他人既！」
「唔識？？？(嚇驚emoji)(嚇驚emoji)」
「正確d黎講，我都係岩岩識佢地。我知道你地今日會對另外一隊人，所以我今日o係門口等佢地黎，見到佢地既時候我同佢地講我今日有樣好重要既事要做，佢地咪比我join囉。」
「下，佢地咁都肯牙？」
「錢解決到既問題唔係問題。」
「喔…」
「我想同你講，暫時我地做唔成男女朋友 ，但係如果你想搵人陪你去玩，我幾早都願意架。」
***********
記得在我和阿衛分手的時候，他也說過「暫時我地做唔成男女朋友 」這句話…
「暫時我地做唔成男女朋友，可能遲d我地會o係返番一齊呢。」阿衛伸手搭著我的肩膀，凝視著我說：「你願意比呢個時間我嗎？你愛我嗎？」
我對著這個和我一起接近兩年的男朋友，怎會說不愛。
最後我很沒骨氣地接受了這個「暫時分開」的要求。
********
我沒有回應阿衛，因為此刻子牽已經出現在我面前。
在他眼前，我好像一個偷走的小孩，被校長找回來。
但子牽卻沒有罵我。
「原來你走左黎呢度！」子牽二話不說拉著我的手，帶我去到大平原戰區場地。
在他拖著我的手的一刻，我好像感覺到，今天這場wargame，不再是一場兒戲的遊戲。
這場搶軍旗戰，只是一場爭奪戰的序幕。
********************************
第一場，『搶軍旗戰』
大平原戰區，是通常初學者初次挑戰的區域，因為這個場地並不算很大，而且內設有多個木欄及車呔，參加者可利用它們作為掩護物，
搶軍旗戰玩法非常簡單，將人數編成兩隊，分別為海軍隊，陸軍隊，兩隊在各自所屬的陣地上，須插上一支代表己方的旗幟，然後儘量保護它，不要讓它被人奪去，否則自然是落敗的一隊。
在戰場上，通常女隊員比較被動，所以她們負責防守以及向不同角度連續射擊，以掩護男隊員向前進攻。
我們決定兵分三路進攻，
我、子牽、熊貓有相當默契，負責攻左面；阿俊wargame技術超然，在中間做指揮，由KIKI作掩護；阿強、阿珍、阿Grace和阿Grace既fiancé全部是初學者，不善進擊，留在右邊防守。
我們已經各就位，Albert 叔和柔柔在觀望臺看見我們兩隊都準備好，Albert 叔吹嚮哨子：「嗶！」
柔柔興奮地叫囂：「阿俊加油！大家加油！」
第一場，
我躲在木欄後，不斷向前方射彈，撞向對方的木欄，發出「噠」「噠」聲。
阿俊細心留意敵方的一舉一動，我不斷發彈，而Grace那邊卻完全沒有聲氣，似乎敵方已經留意到我方右邊小隊比較弱，所以開始以右路向我們進攻。
嘿嘿…咁你就中計啦！ 阿俊心想。
此時，阿俊向子牽和熊貓打了個手勢，指揮他們不斷向前推進。
子牽和熊貓靈敏地走過一個木欄，接另一個木欄。
還有不夠十步，子牽和熊貓便能把敵方的軍旗拿到手。
阿俊提示子牽和熊貓暫時守在那個位置，因為阿俊知道他們一定有人在防禦，就算這刻搶到軍旗，也沒有辦法可以安全把軍旗帶走。
阿俊和KIKI向前走，將我方的戰線向前推。
阿俊留意到，敵軍負責進攻的小隊，已經沿右路走過了半場。
阿俊看得一清二楚，他們有大概6人，因為他們一直向前行，卻沒有發現在旁邊靜靜觀察的阿俊和KIKI。
KIKI知道這時候攻擊他們，他們一定會有人死。
但阿俊向KIKI搖頭，因為他們有6個人，而阿俊這邊只有2人，如果現在開戰殺死他們1人，可能會2命賠1命。
等多等，差唔多時間啦…阿俊做了個口形，然後咧嘴笑著。
自以為勝利在望的敵軍小隊已經步步進攻，
準備…阿俊在心裡數，1、2、3…
「SHOOT！」阿俊發號司令，KIKI、阿強、阿珍、阿Grace和阿Grace既fiancé和阿俊立即向敵軍的草叢射擊，如阿俊所願，敵方6人完全被包圍和伏擊，6人當場認死離場。
最後這一場的結果是意料之內，我們9個人一起把戰線愈壓愈前，將剩下的4人逼得不敢出來，最後奪旗取勝。
「嗶！嗶！」Albert叔的哨子聲嚮起，他在觀望臺高呼：「神奇，頂級，超卓！」
熊貓忍不住說：「佢派少陣膠得唔得？」
子牽脫下面罩，露出笑容。
「拿，講真，你地全部人既射擊技術都係麻麻架啦。但妹妹仔呢隊既隊型、崗位安排、默契非常之好！功勞一定要歸於佢地既領袖，呢位高大既哥仔呀！下一場，會o係十分鐘之後開始，大家飲d水，十分鐘之後番黎。GO!」
「嗶！」
柔柔小心翼翼的從高臺走下來，阿俊見狀立刻跑上去叫停她。
「出面太陽好晒呀！你留o係呢度啦！」阿俊說，語氣是前所未有的溫柔。
「我…我就係知道晒，所以諗住拎枝水比你飲丫嘛。」柔柔手握著一枝水。
「得啦，我而家飲啦！唔該你呀柔柔。」
「唔洗客氣！哈哈，阿俊你好叻呀頭先！」柔柔笑說。
阿俊的臉紅了一片，不知是因為晒傷了，還是因為聽了柔柔稱讚他的話。
阿俊溫柔地摟抱著柔柔，在柔柔的臉頰親了一下，他說：「柔柔，真係多謝你。一路以黎，我對唔住你，我以後會好好照顧你。」
柔柔露出一個滿足的表情。
「我休息夠啦，而家去同佢地傾下下一場既策略，你小心d，OK?」阿俊扶著柔柔。
柔柔擺出一個OK的手勢。
「乖，我下午陪住你。」
「好丫！」
阿俊從觀望臺走下來，接上了熊貓的視線。
熊貓向阿俊高舉著姆指，他說：「呢個LIKE係比你頭先o果場既表現。我好佩服你既技術。」
「多謝。」阿俊說。
「呢個LIKE，仲係代表，我同你之間既戰鬥，我服，你贏。」熊貓說。
熊貓主動伸出手，阿俊也伸出手與熊貓握一下手。
*****************
第二場『搶軍旗戰』，鑑於敵方已經了解我方的策略，我們一定要重整隊型。
阿俊留意到我們這邊的女士較多，平均體力值較低，十分鐘的休息不足夠回復體力，所以我們今次必要以速度取勝。
這一次，阿俊將搶旗的任務交給了我，而且他要我和KIKI調轉位置，叫我跟著他由中路攻上去，而其他人會在左右兩邊騷擾敵軍。
「今次大家可以盡情殺敵，殺得愈多愈好，最緊要既係，中路留番比我同銀銀。」阿俊比上一場更有自信。
我不知道阿俊為甚麼對我這麼有信心，不過既然我未來姐夫吩咐到，唯有照辦。
Albert 叔吹嚮哨子：「嗶！」
第二場戰事開始。
可能有了第一場的經驗，大家開始熟悉地形，而且拿起槍殺人好像更得心應手。大家跟隨著阿俊的指令，見人就殺。
戰事開始了不夠五分鐘，子牽和熊貓各殺了一人，阿強因為有很多人掩護，狀態大勇，殺了三人，阿珍也在亂射的情況下殺了一人。
敵方人數還剩下四人，阿俊推斷，分別是左路一人，中路兩人，右路一人。
敵方而家左右路只有一人守住，有如斷了雙臂。
要快…如果唔係對方有機會重組。阿俊想。
阿俊帶著我一直向前走，子牽、KIKI、可頌跟在左邊，阿強、阿珍、阿Grace和阿Grace既fiancé跟在右邊。
阿俊和我躲在一個木欄後，阿俊從木欄的洞口望出去，他對我說：「前面既木欄後面，應該有兩個人。我要你烏低身跑過去搶旗。唔洗驚，左右兩邊有子牽同阿強壓住，對面唔會攻擊你。只有前面果兩個人會攻擊你。」
「下…咁我死緊啦！」這一刻我的心臟快要跳出來。
「唔會，你企出黎，對面一定有人有動作，我見到佢地凸出黎，我一定會先隊lum佢地。」
「你唔信我唔緊要，我相信子牽點都唔會比你中槍。」
我理性上係好相信未來姐夫既判斷同射擊技術既，但實際上我真係驚到腳都震埋。
這一刻我望著子牽，子牽向我點了頭。
「你O唔OK？」阿俊問我。
「我…我…O…OK。」我口吃地回答。
「好，咁我數三聲之後出發！」阿俊說。
其…其…其實我未準備好！！！！！！！T^T我急得快要哭出來。
但阿俊已經開始倒數。
「3…」
哇……未得呀！！！
「2…」
嗚嗚嗚嗚嗚嗚…
「1…」
「GO!!!」
我豁出去啦！！！！！！
我站了起身，向著旗竿直跑！
我以為唔夠一秒我就會中槍嗌死…
點知…
嗌死既唔係我…
係對面既一個人。
果然，未來姐夫既判斷非常準確！
「我死！」那個人高舉著槍，一邊叫一邊離開。
我繼續跑，
我覺得…我同枝旗既呢段距離，先係世界上最遠既距離…
當我經過掩護他們的那個木欄，我見到還有一個身影躲在木欄後。
岩啦…未來姐夫都係咁講…木欄後面有兩個人…
「轉身KILL佢呀！」我聽到剛剛死了的那個敵人向著我那邊說。
咦…
我記得未來姐夫說過：「我見到佢地凸出黎，我一定會先隊lum佢地。」
天呀…得一個人凸出黎ja…另一個仲跪緊o係度…正正o係我後面…今舖我死緊啦…我一定背脊重傷而死T^T。
後方傳來未來姐夫的聲音：「銀銀繼續跑呀！！！！！放心佢唔會攻擊你架！」
嗚……未來姐夫你玩野咩……戰場上面……敵人見到我點會唔殺我呀T^T 媽咪，請告訴我咁近中槍痛唔痛？
雖然，我的心態很消極，但我的步伐未有停頓過，可能是因為我求生的本能。
我估如果我走得夠快，或者有機會跑得快過粒子彈…
或者我有機會拎到枝旗之後先英勇殉職…
或者我拎到枝旗之後，可以好似掟飛槍咁，試下飛唔飛到過半場…
頂…
我究竟諗緊乜？
原來人臨死之前唔係會見到一條白色隧道…
而係亂FF一餐…
咦…
但係點解…對手真係無攻擊我？
我一直跑，敵軍的旗竿已經在我前面，我伸手奪去它，我一轉身。
我見到跪在木欄後的人，一直用槍指著我，但他始終沒有開槍。
我拿著敵軍的旗竿，回到我軍的大本營。
「嗶！嗶！」Albert 叔吹嚮了哨子聲，表示完場。
「YEAH!!!!!!又贏一局啦！」柔柔興奮地嚷著。
「乜料呀？你條契弟係咪玩架？」敵方的隊友在觀望臺怒罵著放走我的那個人。
那個人走到觀望臺旁，他脫下面罩說了一句：「對唔住，可能枝槍有問題，各位大佬想飲咩？我請。」
我茫然看著那個人的背影。
我認得出，那是阿衛的聲音。
我相信場內所有人都看得出，這一場，是阿衛有心放走我。
阿俊知道，柔柔知道，熊貓知道，子牽也一定知道。
阿衛點解要維護我？
這個答案，我心知肚明。
****************************************
吃午飯時，因為阿衛，我再不敢周圍走，我一直留在子牽的身邊。
輕鬆的時間過得很快。
另一隊的人可能因為連輸兩場，心有不甘，所以很快便進入準備的狀態，各自穿上自己的裝備，為槍械上彈。
我看著他們兇神惡煞的表情，非常膽怯。
「子牽，我唔想玩啦…」我依偎著子牽。
「點解呀？」子牽伸手摟著我的腰。
「你知唔知呀，我頭先真係好驚呀…人地話中彈會流血架…」我擔憂地說，
「唔洗驚，我會Cover你架嘛！」子牽拍一拍我的頭。
「咁陣間呢…殲滅戰係咩黎架？」
「殲滅戰即係，我地一邊係兵，一邊係賊，我地兩組人各自在起點出發，目標是五分鐘內將對方全部人殲滅，就為知贏。」
「下…咁我可唔可以痴住你呀…我唔想死呀…」
「我地兩個人一齊行會仲易死架！其實玩呢個game女仔會優勝d！」
「點解呀？」
「個場咁大，女仔身形細粒d嘛，通常搵一個角落匿埋，無咁易會搵到你架！到完場先出黎囉！」
「咁係咪唔會中槍架…」
「唔知架…你要小心匿埋既時候，唔記得左對腳，因為黎緊果個場放左d警車、貨櫃車o係度，你匿o係d車隔黎，好容易比人用槍掃腳架！」
「知道…」我嘟著咀說。
「喔…有人嘟咀wor!咁係咪即係有人要我錫呀？」子牽笑說。
我不回答，繼續嘟著咀，
「好啦，既然有人扭計，我就哄下佢啦！」
子牽不理旁人的目光，親了我一下，我的心好像沾了蜜糖那麼甜。
***************
兩場殲滅戰，我方狀態大不如前。
由於阿俊沒有落場，我們少了一個重要的指揮人物，我們好像完全失焦。
而且，雖然女孩子們善於掩藏自己，但始終因為分開行事，女孩們沒有男孩們的保護，很快就戰死沙場。
我也終於嘗試到中槍的滋味，中槍真係好痛…
************************
「今日既賽事真係好精彩呀，妹妹仔果隊先拔頭籌，然後乘勝追擊，可惜後勁不繼。」Albert叔報告賽果，「妹妹仔隊同四圍望哥2比2，暫時打成平手。」
「黎緊，最後一場，我地會去到室內場，玩『保護政要戰』。遊戲玩法係咁既，妹妹仔隊會成為警察，而四圍望哥會成為恐怖分子，你地會o係一個迷官入面對戰，迷宮有起點同終點，分A、B、C三區，三區都可以互相貫穿，亦可以通往起點同終點。恐怖分子一開始會劫持『政要』，由起點出發，只要恐怖分子能夠保護政要去到終點，恐怖分子就贏。如果過程之中，恐怖分子被圍攻，警察成功帶走『政要』，警察為勝。o係你地雙方交鋒既時候，『政要 』絕對唔可以中彈！ 明白？」
「明白！」聽得出敵方的士氣很強。
「注意，A區同B區之間有一間細貨倉，呢間細貨倉有兩個出口，一個出口有門，另一個出口無門，係一個唔錯既地方作為掩護，而且呢間房離終點好近，大家要好好利用呢個位置。」
「我比既提示係咁多，我而家會o係警察隊入面挑選一個『政要』，我會比一個較特別既名比呢個人，等佢o係配合恐怖分子既行動上面，當佢聽到呢個名既時候，會跟隨指示。我會叫呢個人做『妹豬』。」
「咁恐怖分子們，你要識叫人啦，知道？」
「知道。」
「好，咁而家我揀一個人做『政要』先。就你啦，妹妹仔！」
Albert 叔指著我，我嚇了一驚。
不過，我記得Albert叔講過『政要』一定不可以中槍，所以我應該很安全。
「你叫妹豬，你叫咩名？」Albert 叔問我。
我憑自然反應回答：「下，我叫銀銀。」
「唔岩，你叫咩名？」Albert 叔再問一次。
「我叫妹豬。」我說出口之後頓時漲紅了臉。
阿衛和子牽同時笑了出來，眼前這個女仔實在太可愛了。
「好，妹豬會比恐怖分子首領一直劫持住。而家大家已經進入角色，我會先帶恐怖分子進場，o係起點準備。五分鐘之後，我會示意比警察入場，你地可以自由地o係唔同區域駐守。」
說畢，Albert叔帶著阿衛、銀銀和其他人進場，子牽見到阿衛捉著銀銀的手內進。
子牽怒氣衝天，內心非常焦急。
「冷靜。」熊貓拍一拍子牽的肩膀說，說：「要救番銀銀，我地要快、狠、準。因為我地人少，所以更加要集中火力。」
「嗯…聽到Albert叔既提示，我相信佢地一定會選擇行A或B區，然後行到到貫穿A區和B區既貨倉入面，等機會突圍而出。」子牽說。
「我都係咁諗。」熊貓話。
「咁我地兵分兩路，我守A區，你守B區。有機會就一齊攻入去貨倉。」子牽說。
「好。」
「兄弟，合作愉快！」子牽遞給熊貓一枝短槍。
「無問題，我講過我一定會幫手對付阿衛。」熊貓接過短槍，露出一個笑容。
****************
我被逼讓阿衛拉著我的手，一直走進迷宮的深深處。
平日行旺角，我都要靠子牽帶著我走，才能分辨哪方是油麻地，哪方是太子。
我就算能從阿衛和他的隊友手中逃脫，我也一定會在這裡迷路。
而且場內正播放著好像《大白鲨》電影的音樂，我的全身都在顫抖。
「唔洗驚喎，我會好好保護你。」阿衛對我說，「因為你是一個重要的人物。」
阿衛這樣一說，我更加害怕。
這一刻，廣播響起，傳來Albert叔的聲音：「各位請注意，警察已經進場，遊戲正式開始！大家有三十分鐘時間完成遊戲。重覆，遊戲正式開始！」
隨著廣播結束，阿衛和他的隊友開始行動。
他們以前3後2的隊形推進，阿衛在我身邊指示我行動，其餘4人打遊擊。
行了大概五分鐘，我開始聽到槍林彈雨的聲音，更看到子彈從門隙中飛出來，射中了阿衛的隊友。
被射中的人一邊離場嗌死，一邊向隊友發放情報，他叫道：「行多十步有對門，無人，安全。」
阿衛帶著我一直向前行，走到一扇門前，示意我靠著牆。
他輕輕打開門，在後面掩護的隊友說：「Clear。」
「好，入去！」阿衛發號司令。
他的兩位先峰隊友先進入，接著到我和阿衛，最後到兩位在後而掩護的隊友。
「我估呢度就係Albert講既貨倉，我地暫時留o係度。」阿衛說，「你地兩個守住無門既出口，另外兩個守住呢度門。等打遊擊既隊友清得七七八八，我地就攻出去。」
「知道。」他的隊友回應。
阿衛突然咧嘴一笑，用古惑的眼神看著我。
「而家咁得閒，我地做咩好呢？」阿衛問。
「嘿，門口有我地守住，你同條女o係入面做咩都得啦！」一個隊友回答阿衛。
「做咩都得…？嘿嘿。」阿衛奸笑著。
「你…你想點呀？」我焦急地問，一邊想掙脫阿衛的手，但他捉得很緊。
阿衛愈行愈近，、另一隻手摟抱著我的腰，他低聲說道：「你個子牽頭先錫你錫得咁sweet，搞到我都好掛住添。」
「呀！！！救命呀！」阿衛的頭愈湊愈近，而雙手愈抱愈緊，我實在無法脫離，而我的罪疚感愈來愈大。
我聽到有人在貨倉外撞門，而阿衛的隊友將用力按著門。
「救我呀！！！嗚……」
阿衛的吻，印在我唇上，我覺得…好痛苦。
「BINGO！」
此時阿衛身後傳出一把熟悉的聲音，是子牽，他和熊貓從另一個出口闖進來，原來四位守著門口已經一早被熊貓和子牽KO掉，因為阿衛太得意忘形，所以聽不到。
這一刻，熊貓和子牽同時用槍指著阿衛。
「放開我女朋友。」子牽怒吼。
子牽雖然嗌了bingo，但還未放鬆，他緊接按下了彈扣，單發的子彈彈射向阿衛的保護衣，接著是阿衛的手臂，直至攻擊到他手指骨，他才肯放開我。他徐徐地舉起雙手，不甘地說出一句：「我死。」
阿衛向子牽投下一個不屑的眼神，轉身離開戰場。
我定眼望著阿衛的背影離去，我並不是不捨得，只是剛剛驚慌的情緒還未平伏下來。子牽鬆手，他的槍跌在地上發出「o拍」的一聲，打破了這個戰場環境的寧靜。
子牽帶著一副哀傷的表情，一步一步走近，直至走到我面前，他凝視著我：「對唔住，我保護唔到你。」
「其實我知道，你同阿衛仲有聯絡，仲覺得你每次同佢見面、傾計，都唔似係普通朋友咁簡單…所以我會諗番，究竟你當初揀我既時候，係咪只不過想搵代替品，又或者你同我一齊係出於感謝，唔係出於感情…究竟，妳仲愛我嗎？」
「我愛呀！傻架點解唔愛呀？我愛你呀張子牽呀！」我的眼淚奪框而出。
「妳愛張子牽，就要永遠望著張子牽，以後，唔准偷偷地搵其他男人，唔准望其他男人，唔准比其他男人攬，更加唔准比其他男人錫。」子牽說。
「嗯！」我大力地點頭。
子牽一手把我擁入懷，就是在這個懷抱裡，我才感覺到熟悉，這才是真真正正專屬我的懷抱。
此時，子牽從貨櫃窗口看見兩個敵人逐漸步近，而且那兩個人一直在射彈，讓整個貨櫃發出 「噠噠…噠噠…」的聲音。
「我死！」站在門邊的熊貓中槍，舉手投降，繼而向子牽投了一個眼色。
聽到「噠噠…噠噠…」的聲音，恐懼再次充滿我全身。
「我好驚呀…子牽…」我把子牽抱得很緊。
子牽知道不夠時間再拾起在地上的槍，他走在我前面，拉著我的手，慢慢步出貨櫃。
就在踏出貨櫃的一剎，阿衛的隊友毫不留情地連發開槍，子彈重重的打在子牽的身上，甚至頸上。
「乜事呀？乜唔係剩係可以用單發架ja咩？」我問。
阿衛的隊友一定是因為最後一場無仇報，所以狠狠地對我們進行殺戮。
「OK！我死！我地隊投降。」子牽向著敵人說，繼續緊緊的拉著我的手，他逐說：「我女朋友o係我後面，唔好攻擊佢，我會同佢一齊走。」
「我會同佢一齊走！」子牽提高聲音再說一次，似是要觀望台的人都聽得到。
有些人，遇到攻擊就會不堪一擊懦弱退縮；而有另一些人，就算到生死關頭都不會放開你。
*************
子牽終於帶我離開那個鬼地方，雖然已經安全，但我還是忍不住哭泣著。
「班衰仔竟然咁大膽，等Albert叔帶一班師兄弟入去懲罰佢地！」
說畢，Albert叔跟一班導師進入戰場。
「傻阿妹，唔好喊啦！」熊貓說，「我相信班導師會幫你出番啖氣架啦！」
「嗯…」我一邊說，但淚一直流，因為被人強吻的感覺真的很嘔心…
子牽看著我這個委屈的樣子，相信一定不會比我好過。
「你呀…成日都要人擔心你…」子牽責罵我的同時，掉下一滴眼淚。
「你以後淨係可以做我既妹豬呀！」子牽說，
「呃…你都係唔好叫妹豬啦，你叫蠢豬啦！」
我聽到他叫我蠢豬，不知為甚麼，瞬間破涕為笑。
我想，哄我笑就是子牽與生俱來的魔法吧！
********************************************************
跟大家說一個關於小丑的故事。
從前，
小丑天生純品，存在只為求讓觀光眾笑逐顏開。
有一天，他被要求要跳火圈，又要行鋼線。
他被要求做的，好像不再如從前般單純。
每個男孩許下承諾要和女孩在一起，是因為想將快樂帶給女孩，最讓他滿足就是女孩臉上的笑容。
他以為只要他永遠在你身邊，你就會永遠快樂。
頭一年，是不錯的，他做的事充滿了驚喜、新鮮感；
第二年開始，你開始感覺到他帶不了更多的驚喜給你，甚至他做同一樣的東西，再也搏不到你一笑。
漸漸…他也感覺到相當洩氣。
每個男仔初初都是一個好人，愛你愛得單純，愛你愛得真實。
後來，他們發現女孩子都不懂珍惜他們簡單真摯的愛，好女仔只會看得上壞男孩。
所以，男孩決定改變自己，要做一個最壞最壞的男人，讓你對他的期望降到最低，由你，去乞求他進步，由你，去乞討他的愛。
這樣，你會更快樂嗎？
******
希望大家珍惜在你身邊，愛你愛得最單純、最簡單的那隻小丑。
***************************
《男人只係想做妳身邊的一隻小丑》完
***********************
多謝大家睇晒18章！
我無高登ACC, 我既目標只o係想o係呢個寫作平台上面，分享我對愛情既小小想法！
我諗呢個故事既時候，係因為我發現經常聽到男孩子o係拍拖耐左之後成日比女孩子怨佢悶同懶，之後一路發展其實男孩子同女孩子都o係呢段關係入面都唔開心。呢個令我諗番，如果拍拖拍得唔開心，點解呢兩個人開初又會一齊既？
原來，男仔一開始想同一個女仔拍拖，諗法好簡單，就係見到佢笑，覺得佢好吸引，所以以後都好想見到佢成日笑。
女仔一開始同男仔開始，都係因為同呢個男仔一齊舒服、開心。
點解慢慢兩個人既關係會改變左呢？
係因為男仔真係變左？
定係，只係因為女仔對男仔既期望愈黎愈高呢？
我唔祈求大家覺得個故事好正，但如果大家覺得我都寫得OK既，合格既，希望你地繼續支持我寫既故事啦！
如果支持我，或者對我既故事有咩意見，都歡迎大家LIKE下我fb page：
https://www.facebook.com/pages/%E9%A6%AC%E6%88%B2%E7%8F%AD/764023193651312
個PAGE 叫「馬戲班」，profile pic係個紅色衫既女仔空中飛人。
得好少人LIKE ja, 因為岩岩起步，哈哈！
所以希望各位慷慨支持啦！