《我可以做你的樹洞嗎?》: 1.我的中小學時代

是咁的，我有一個由小就識到大既女朋友。呀唔係，應該係女性朋友。佢個名叫做曉凝。

數數手指，都差唔多有成十年啦。我同佢小四至小六都同班，但係當時覺得佢奇奇怪怪，所以初初識佢果陣都冇咩點同佢傾過計...... 

唔知係唔係老師既特別安排啦，小學果陣佢掉極位都係坐窗口位。每當上堂既時候，我分心望過去都總係見到佢望住學校對面個樹林。個頭係郁都唔郁，唔知有乜野吸引住佢。

你可能以為佢咁樣發白日夢法成績一定好差啦? 但好可惜你估錯哂。佢考試次次都全級頭幾，而且其他同學問佢問題時佢都好樂意解答。

好奇心極重既我試過放學後跟蹤佢，睇下佢係咪一放學就跑去圖書館睇書或者溫書既人。





但係居然俾我發現左啲奇奇怪怪既野。

每次放學，佢都即刻係個書包入面攞本簿仔同支筆出黎，然後行一段路，就停低望住周圍既植物丶人，或者建築物，再係本簿仔上面寫野。

連續跟左佢成個禮拜既我，始終搵唔到佢成績咁好既原因。只係能夠發現佢日日放學後都係做同樣既野，真係極度之奇奇怪怪。

本身有啲怕羞既我，終於抵受唔住好奇心既推使，於是我扮路過，走去佢既身邊......

本身我只係諗住扮路過，偷睇一眼就走。點知當我一眼望落去佢本簿既時候，佢居然用返臉遮住本簿，望返我轉頭。





「你做咩呀?」佢對水汪汪既大眼睛，加上佢把偏高音既聲線，嚇到我向後彈，仲一下撞左埋塊牆到。

「哇!好痛呀!」估唔到我第一次同女仔雙目交投既時候，亦都係我撞到個後腦既時候。

「你冇事嘛?俾我睇下?」佢一步一步行埋黎，然後伸出兩隻手，好似真係想摸我塊臉。(後腦先岩)

係千鈞一髮之際，我一下推開佢，畢竟男女授授不親......其實主要原因係驚我呀媽買完餸之後路過見到......

點知，我大力得濟推左佢落地。





「搞錯呀!你自己撞到自己都要報復整返我!好痛呀!」佢扁住嘴，望住地下講。

「我冇心架......你有冇事呀?」我梗係即刻扶返起佢啦，就算俾呀媽見到，返去要藤條炆豬肉都係咁話。

然後，佢又推返我落地。

之後，我發覺呢個女仔真係好與眾不同。而我亦都奇蹟地同佢好傾得埋，好有默契。有時佢會講佢既秘密我知，我又會講我既秘密佢知。

而且，我地都係守口如瓶。什至創造左一種只有我地兩個先聽得明既語言。

小學果兩年，真係過得好快。而好好運地，我地兩個都派左入同一間唔錯既中學。
但不幸既係，我去到中四先同佢同班。

中一至中三呢三年，佢都係讀精英班。成績同小學時一樣，保持住全級頭幾名。中一開學果陣我係同佢一齊返學放學既，但係始終唔同班，大家都係自己班建立左朋友圈，所以亦都漸漸疏遠。





去到中四果年，因為我同佢都係揀理科，所以分左係同一班。

而小學果時既默契感情，亦都係果年重新開始。

果年，開學唔夠一個月，我班啲同學已經開始懷疑我同佢拍緊拖。癡線! 我地彼此都知道對方咁多秘密，邊有可能拍到拖? 就算係拍拖，都一定成日嘈交，好快分手收場。

即使去到高中，佢依然冇改到行行下路，就停低記錄見到既野既習慣。只不過因為學業太忙，所以佢逢星期五先咁做。

而每一次，佢都會叫我陪佢一齊去。