開花結果: 第十五章 （小唯 - 和好）

因為下午溜了出去同 Kelly 食 lunch, 所以做唔晒 D 野要開 OT.

望一望錶，已經8點了。

我 SMS 小唯

?：（今晚哥等你一齊食飯？）

沒有回應，意料中事。



於是我就 SMS Kelly.

?：（送左比小唯未？）

沒有回應。

?：（今晚一齊食飯？）

都係沒有回應，做咩個個都唔覆我。



於是就一個人走左去食家野家，不過就冇比親戚撞到。

回到家見到個早晨全餐原封不動咁放在桌上，於是就拿去掉了。

電話此時響起。

「Sorry 呀一，頭先好忙覆唔到你。我而家同小唯去食飯，食完再打比你。」

「下？你同小唯食飯？佢彩返你啦？」



「我一陣先同你講，拜拜。」

唔通 Kelly 送完個袋比小唯，小唯即時冇野 friend 返？咁 easy? 手袋對女人黎講果然夠晒吸引力。

我躺在床上一路看書，一路等小唯回來。

望望個鐘都差唔多十一點半，食咩食咁耐都未返？正想打比 Kelly 之際，小唯回來了。

「哥，我返黎啦。」

叫返我啦喎，即係嬲完啦。

「咁夜既？食左飯未呀？」我扮唔知問。

「Kelly 唔係話左比你知我地去食飯咩？」



「係呀係呀，一時唔記得左。」

小唯拿著手袋走進房間，我問：「咩黎架？你地去左 Shopping 呀？」

小唯拿著出手袋給我看

「好靚喎，呢個咪你上次話鍾意個個？邊個咁好送比你？」

小唯突然摟著我。

「做咩呀傻妹？唔嬲呀哥啦？」

「對唔住呀哥，我覺得自己好唔岩。我唔應該嬲你。」



「唔緊要，乖啦，哥都買左份生日禮物，提早送比你。」我拿出銀包送到佢面前：「睇下，咁岩襯返一 set 喎。」

小唯望著我手中的銀包，雙眼就紅了起來。「哥，你真係好錫我呀。」

「傻妹，送個銀包比你之嘛，洗咩感動到喊？」

小唯哽咽地說：「我唔係因為個手袋同銀包呀。Kelly 話左比我知喇，個袋其實係你買，然後叫佢扮送比我，想我地既關係變好。你一個咁唔肯花心思既人，都肯花咁多心思去氹我，無非都係想我接受 Kelly 做你女朋友，想我地好好咁相處，我知架，我都好唔想你夾係我地中間。我亦都知道就算哥同 Kelly 拍拖，都一樣會咁錫我，我知架哥。」

小唯一口氣講完，我掃著她的頭髮：「你明白就好，小唯真係大個女啦。」

「係頭先 Kelly 解釋比我聽架。哥， Kelly 真係好好，我批准佢做你女朋友。」她破涕為笑地道。

Kelly 真係犀利，我同個傻妹講左成晚都講唔掂。佢一餐飯就攪掂左佢。

小唯睡了之後，我就同 Kelly 煲電話粥，東拉西扯咁咩都講。 我提議不如放假去沙灘玩，佢話聽人講泰國布吉既沙灘好似好靚，游水時會有好多魚仔係身邊游來游去。我本來想話早兩年海嘯完喎，你同事見到個 D 會唔會唔係魚黎？我當然冇講出口，難得有個可以預支蜜月既機會，我當然唔會自己破壞佢。



我見佢好似好想去，於是就諗不如比個驚喜佢。

第二日

「小唯，你下個月生日，我同 Kelly 同埋你，一齊去布吉玩幾日好唔好呀？」

「唔。。。未必得呀，我同 Kelly 同一間鋪，好難一齊請假。」

「咁呀。。。」我正諗緊點好。

「不如你同 Kelly 去丫？」

「下？」我以為自己聽錯。



「我話不如你地兩個去呀，我費事做電燈膽啦。」她裝個鬼臉跟我說。

睇黎小唯真係諗通左。

「但係你生日喎。」我還在猶豫地說。

「得啦哥，好多朋友同我慶祝架，你同 Kelly 去 sweet sweet 啦。」

「你真係 ok?」我再 reconfirm 一次。

「係呀。」