[舊文重修] 假如蝙蝠俠想做的，其實是小丑。: 11.

影片既畫質絕對唔係高清，但係隱約可以見到，佢身處於一間又殘又舊既爛屋裡面。
佢身後仲綁住三個人。
『你知唔知我幾咁掛住你？』面具人似乎係自拍緊，畫面震之餘，仲影到佢個頭鬼死咁大。佢既面具，霸佔大畫面既三分之二。
佢講完呢句，我真係打左個冷震，條友真係基既。
不過，真正令我心寒既，係我同時都有呢種感覺──
我都等左佢好耐。
 
『不過呢幾日你都唔現身，所以我決定同你玩個遊戲。』
佢帶住鏡頭，步向個三個被綁住既人。佢地比人用布袋包住個頭，相信入面都比人塞住左個口，所以只能發出「嗚嗚」既叫聲。
佢地極力掙扎，可惜佢地唔係超人，唔可以一手扯開緊綁佢地身上既大麻繩。




『佢地係陳生一家，好普通既三個良好市民。好不幸，佢地已經比人收埋左係某個地方，而綁係身上既炸彈，將會無情咁帶佢地上天堂。』
鏡頭再次轉向面具人。
『佢地死既原因，就係因為騎士救唔到佢地。』
佢講完，陳生一家掙扎得更激烈。
面具人再影住地下既一堆機械物。
『係你睇到呢段片既時候，呢個炸彈亦已經放置左係另一個地方。你呢家一定想問係邊度？我唔直接答你，我會用下一段片黎答你。』
鏡頭最後一次轉向面具人。
『而呢個遊戲玩法在於──你要點先可以係聽朝日出前，救晒兩邊既人？哈哈，你估得冇錯，當你成功救到一邊既人質，另一邊就會引爆。你要做既，除左可以選擇一邊黎救之外，仲可以諗辦法救晒全部人。至於係咩方法，呢個問題留返比你自己諗，因為你係無敵既騎士。』
 
佢講完，畫面跳左去另一個地方拍攝既片度。




幾十個著黑西裝既男人，比人用繩綁住，坐晒係地下，周圍有一班蒙面人用槍指住佢地。
個度環境昏暗，有一個關公神位。
上面有一塊寫住「某某堂」既牌匾。
 
我終於明白佢既意思。
另一班人係黑幫。
佢要我係三個普通市民，同幾十個壞人之間作出選擇。
我懷疑面具人睇得太多《恐懼鬥室》或者《蝙蝠俠》，如果唔係點會諗得出呢種咁既方法傷害人？
諗得出呢種咁既方法折磨我？
又或者，正如阿福所講，佢係回應我既出現，先用咁既方法。




 
如果我去救個三個普通人，有幾十條罪有應得既人命就會一次過死晒。
如果我去救個班黑幫，三個無辜既人就會為左一班壞人而死。
世人眼中，騎士係正義既存在，係罪惡既剋星，消滅黑幫之餘再救到三個人質，可謂一石二鳥。
但真係值得？
幾十個人命唔係人命？
 
我個頭痛到就爆。
點解我要面對啲咁既決定？
一開始我只係想打劫包租婆，只係想解一解自己既難關。
換黎既，卻係人生最大既一個難題──幾十條人命係我手上。
而且面具人冇講過佢地既位置，意思係要我自己搵。
我唔係真正既蝙蝠俠，冇佢既高科技裝備同偵探頭腦，我甚至連普通人都不如，只係一個著緊草，爭人幾十萬既雙失垃圾。
或者呢件事，應該交比差佬處理，我唔應該再插手。
正如阿福所講，係時候放低呢單野，安安份份搵份工、搵新屋。




 
我訓左係地下既被鋪上，靜左幾個鐘，冇郁過。