豬籠車內的呂布: 《八》

孫子兵法中提過「知己知彼，百戰不殆。」，後來啲人改為「百戰百勝」，不殆又好，百勝都好，都必須要知己知彼，所以想要贏番個江山，一定要睇下條都敏俊有咩咁輪把炮。


以敵人嘅敵人即係自己嘅朋友為原則，劉、關、張呢三條蝦兵蟹將一向都唔妥我，好想我拆墮好耐，但我哋依家嘅共同敵人係都敏俊條茂利，為求攞番我嘅豬肉王國，寒戰裏面講過「非常時期用非常手段」，呢刻我冇得揀，唯有扮矮仔，不悉紓尊降貴同佢哋班賤民合作，利誘佢哋踢走都敏俊，只要踢走條友，我就全面退出天睡街市最受師奶歡迎排名榜，以後唔再出席有關活動同攞任何奬，如有反悔，早洩陽萎。


劉、關、張雖然笨實，但唔係白痴，知道只要有都敏俊一日，佢哋亦都只係二打六三名，但我依家開出嘅合作條件，只要條茂利一走，而我又宣布退出街市榜，佢哋三個都有機會一嘗第一嘅滋味，第一名喎，幾咁吸引啊，你話邊個唔想踢走容祖兒做一姐啊，呢個百利而無一害嘅計劃，佢哋考慮唔夠五秒就一口答應。


既然傾好合作條件，就要為呢場大戰做吓資料搜集，呢兩日嚟我喬裝成賣魚劉條0靚，喺魚檔度細心觀察條荗利嘅一舉一動，條羚羊扮輪晒嘢日日著恤衫西褲加條圍裙，不論切豬肉、劈豬骨，都一個chok樣，當正自己真係都敏俊咁，真係癲撚線，洗唔洗貼埋張香港豬文大學博士學位畢業證書喺枱面啊，屌你。






除咗觀察之外，我仲深入敵方陣地，花咗成粒幾鐘，扮成林雪咁款，嘗試用五蚊去買一舊豬肉，仲要攪碎，睇吓佢有咩反應。


仆佢個街，條羚羊竟然連五蚊豬肉攪碎都冇托手踭，仲要扮輪晒好服務咁，不知所謂，真係不輪知所謂，搞到個街市冇規冇舉，真係忍得你食得屎。


我偷偷地係暗角位拍咗條羚羊張相，放咗上膠登網，扮成受害人作咗個故仔，話咁快已有巴打幫我起咗佢底，原來條友叫曹阿瞞，阿瞞阿瞞，奇輪怪怪咁，其他資料都一括有齊，真係巧輪佩服起底組。






既然班師奶咁迷韓國仔look，好！我就以韓流打韓流，第一步，將劉、關、張、呂四間舖頭結盟，推出各種慳得一蚊得一蚊嘅優惠，呢招一定吸引到班慳啲啦Auntie幫襯。


第二，就係要打破依家嘅局面，點打破？一字記之曰「搶」，用一個新得嚟又有氣勢嘅名，呢一點非輪常咁重要，一字天堂，一字地獄，如果改得好就可以令間舖起死回生，改得衰就變成橡皮糖，含得撚果汁橡皮糖呀，我花咗整整半日時間去做research，終於畀我諗到個可以同現時韓國最受歡迎男子組合有得fight嘅名，就係「Super 豬魚牛」，有中有英，非常Trendy，一定大受歡迎。


萬事俱備，只欠東風，只要我準備埋最後嗰件秘密武器，奪回我唧江山，簡直易如反掌。