豬籠車內的呂布: 《七》

做成依家咁嘅局面，我都唔知可以由邊度講起好，我諗應該由我遇到命中註定嘅天敵同買咗本老翻《乜玲玲羊年行大運》開始 .....


眾所鳩知，喺天睡街市最受師奶歡迎排名榜上，我呂布一直都穩佔第一位，賣魚、賣牛同賣叉燒嗰三個劉、關、張，永遠都係排喺我後面，冇嘢格我靚仔有型，啲豬肉新鮮，劈豬肉嗰陣手臀實的的，人見人愛，我可以好自信咁講句，佢哋班二打六契弟見到我車尾燈當佢贏。


可惜 ..... 世事真係無常，常言道「人有三衰六旺」，就好似男人終有唔得嘅一日咁，就喺上個星期，我照舊倒塔咁早就起身開工，返到街市一入去，我已經覺得有啲唔妥，當我行到舖頭附近，感覺到一股好强嘅氣，有個二十零歳嘅0靚仔喺我側邊經過，我望望條友黑色西裝襯對黑白佐敦十一，斯文中帶點新潮，有啲品味咁，晨早流流喺街市行過，嗰刻我都不以為意，繼續我嘅工作。


做完一陣事前工夫，我啲女粉絲開始嚟幫襯，唔講你未必知，我賣豬肉嘅受歡迎程度係可以喺街市入面打個蛇餅，唔係吹水，我以新鮮、乾淨、有口感，遠近馳名，再加上我殺死人嘅眼神，可以話係皇帝女，唔憂做。






正喺我同王師奶吹緊水之際，街市另一邊忽然熱鬧起上嚟，尖叫聲此起彼落，連我身邊買緊瘦肉嘅王師奶都忍唔住走過去。


「有咩咁巴閉啊，劉華落咗嚟做訪問呀？」


呢個時候，啱啱八卦完嘅熟客肥婆陳行過，我就借啲意八吓。






「陳太，前面發生咩事咁墟冚嘅？」


「你唔知咩？死角位阿豬西間舖今日請咗個靚仔吖嘛，外表斯斯文文咁，恤衫西褲打扮，個胸肌漲卜卜咁，真係好鬼有型㗎啫！」


「咩話？賣豬肉都著恤衫西褲，洗唔撚洗啊？」







「有洗！我見啲豬肉洗得好乾淨㗎，啲豬扒一塊塊切得鬼死咁整齊，又細心又有禮貌，收完錢仲送個甜美可愛笑容，望落去成個都敏俊C ～ 咁，我的天啊！」肥婆陳一邊講一講流口水，雙腳仲夾到實一實，有乜咁輪誇張啊！


「仆街！妳前世冇食過豬呀，發晒花癲咁，一陣啲豬發豬瘟，妳就唔方唔我的天喇！」我心諗。


陳太講到呢度，雙腳又自自然然咁行番去阿豬西嗰邊。


當時我仲未知道大禍臨頭，我諗以我「天睡第一」嘅外號，根本唔需要理佢，綽頭嘅嘢，好睇唔好食，我呢啲賣實食力嘅，怕你有毛呀，睇你好得幾耐，哈哈哈。


點知 ..... 自從條都敏俊嚟咗街市開始，我嘅生意額同無記台慶一鳩樣，全面暴跌，無論豬肉、豬骨、豬頭，甚至豬尾，無一幸免，以前我啲豬肉唔洗半日就已經賣清光，下午仲有時間落同樂街行個圈，執番劑，但係呢兩三日 ..... 我唔單止可以執一劑，仲得閒到執幾劑再起雙飛都仲有找。






一向對我忠心耿耿嘅陳、李、王、何、歐陽、林、郭、張太，好似去咗異度空間咁，冇再喺我舖頭附近出現，我收到風佢哋過晒去豬西嗰邊買，一去不返。


再係咁我唔死都肯定仆街，我戰神呂布係冇咁易輸，所以我計劃咗一個完美嘅反擊，去重奪番我所失去嘅江山，但係我又點會諗到呢一步會令我跌落萬劫不復嘅地步吖 .....