(真正完結)《時光能夠重新來一遍...》: 十五，海瑤的介入
鏡頭一轉，現在我和芷欣肩並肩站在人山人海的會場外。
「咁耐都未出黎既佢。」我四處張望。
「喂！」我突然比芷欣伸出的小手捉住了臉頰。
「你...唔係重係唔信我講啊...」我無奈的被迫接上她的視線。
「你就算講清楚哂我都接受唔到囉！你係咪背住我出去滾！？」她捉住我臉頰的力度愈來愈大...
「我唔敢啊芷欣大人！...好痛啊...」這是我今天第二次喊痛了。
「咁你講D野哄翻我啦。」她鬆開手，我的臉上出現了五個深深的手指印。
「陳芷欣我最鐘意你！我個心永遠都只係得你一個！呃...」我完全忘記了我身處在非常多人的空間。
很沒面子啊...救命...
「重有呢？」芷欣就像媽媽教訓兒子一樣的說。
「冇啦大人...」為避免芷欣把醋繼續呷，話畢我馬上親吻她的小嘴唇一下。
「嗯！...我透唔到....嗯嗯...氣啦！...」她猛不停想用手推開我的臉。
「睇你重有冇咁多醋呷！」形勢反被我搶奪，之後我放了她一馬。
「衰人！」芷欣臉紅得像個蘋果一樣。
就在我們打情罵悄之間，突然...
「兩位午安...」譚倩怡帶著沒精打彩的語氣從我們背後出現。
「哇！大佬你想嚇死人地阿媽個仔同女啊...」我嚇得三魂不見七魄的說。
「唉...連續第二年拎唔到冠軍...好灰啊...」與剛才的譚倩怡相比，現在她非常失落。
見狀，芷欣搭著譚倩怡的肩「阿怡你好努力架啦！下次再加油啦！」
「明日復明日...明日...何其多...」詩人上身的譚倩怡垂下雙肩慢慢向前走「我好累...我翻屋企訓陣先...唔洗送我啦拜拜...哈哈哈...」她瘋了...
「呃...咁電話連絡啦阿怡...」芷欣跟她道別。
「喂...真係走咁由佢走？佢頹得好緊要喎...」我指著那個垂頭喪氣的背影說。
「佢訓醒就正常翻架啦，由佢靜下啦。」芷欣很清楚了解她的個性。
在我們目送了頹敗的譚倩怡離開後，我們也開始起步離開會場。
「咁我地都翻屋企囉？凍到死唔想再留係街。」我問道。
「又冇下文啦？...第三次啦！成日天氣凍就咁懶...」芷欣有點不滿的說。
「我地翻到去煲電話粥咪得囉，我送你去搭車啦傻婆。」
「唉...咁快又要同你分開...」芷欣眼神稍為有點向下降。
正當我想應聲回應之時，突然間...
「張澤曉。」一把記憶猶新的聲音從遠處冷冷的呼喊過來。
我跟芷欣別過頭一看，發現到「她」在從不遠處漸漸的走近過來。
「係你？...」我一眼就辨認得出這個人，是當天邀請我伴唱的女生。
怎料，「請問你有咩事啊！」芷欣一邊有點不耐煩的說，一邊快速地以稍微矮點的身驅擋在我面前。
「我有D野想搵澤曉佢，唔關你事。」似乎她沒有被芷欣的氣勢嚇到。
「澤...曉？邊個準你嗌得咁親密啊！」芷欣完全妒忌呷醋模式啟動...
可是她依然無視芷欣的存在「澤曉師兄...相信你睇完我既比賽啦？」繼續說道。
「嗯，咁又點？」我待以同樣的語氣回應。
「咁我既才華同實力睇黎唔洗多講，你有眼見啦？」她繼續冷冷的道。
我只是稍微點點頭以作回應。
「咁你，會唔會重新考慮做我既伴唱？」她問。
之後，芷欣搶先代我回答「唔會啊！阿曉係唔會做你伴唱架！我地走啦！」話畢她用力拉扯我的手臂把我拖著走。
「呃...阿欣啊比我自己行啦...」我感到非常無奈。
「其實啊。」這個女生依舊站在原處動也不動。
我別過頭看著她冰冷的身影。
「我鐘意你，澤曉師兄。」
剎那間我禁不住屏住了呼吸...
「下啊？...」我非常驚訝。
連猛不停拖著我走的芷欣也突然停下腳步，身子搖到了一下但默不作聲...
「由你個日係Sing Con贏左亞軍開始，我就深深比你吸引住。」她面不改容的說。
動作停下來的芷欣一直背相對著我。
「你究竟...係邊個...」我口震震的問。
「我叫黃海瑤，林敬光中四既普通學生一個。」出乎意料她竟然實話實說。
此時，沉默良久的芷欣終於加把口插入對話之中。
「黃同學，你知唔知阿曉既女朋友係我？」芷欣轉個身鄙視著她。
事態嚴重，彷彿女人之間的戰爭開打了...
「咁又點？唔等於我唔可以黎溝佢架姐。」黃海瑤一直在挑釁芷欣。
「你...你講咩話...」芷欣的怒氣開始漸漸滲透出來。
「好似師姐你呢種冇才華冇強項既女仔，點會有得同我比？澤曉師兄好快都會愛上我。」黃海瑤愈來愈過份的說。
慢住...怎麼...有點奇怪...
腦海中突然回想起譚倩怡的警告，叫我提防這個女生報仇。
我感到整個對話之中有點異樣，於是我對著黃海瑤道「你嗌我做師兄？之前幾次見面你都唔會咁嗌我。」
「而家嗌名呢樣野唔係重點啊白癡！」芷欣開始把不滿發洩到我身上。
「唔係。」我看著芷欣說，接著別過視線到黃海瑤身上問「你究竟係到盤算緊D咩...？」
「我真係鐘意你，先同你表白。點會冇啦啦有其他目的...」黃海瑤冷冷的說。
「你呢個人...好唔妥。」我瞄著她整個人說。
之後，我別過頭主動拖著再次沉默的芷欣說道「阿欣，唔好理佢啦走啦我地。我應成左你一定唔會做佢伴唱。」
「嗯...」芷欣低著頭輕聲的說。
「唔好意思，走先。」話畢我馬上拖著呆掉了的芷欣離開這個環境。
我頭也不回的一直帶著芷欣走到巴士站，其間還聽到黃海瑤在身後大呼「我一定會令你接受我既愛意架澤曉師兄！」
很快，116號巴士到站把我們接走。
「切。你好快都係會同佢分手收場。睇住黎啦張澤曉...」黃海瑤自言自語。
「從來冇人夠膽拒絕我！」
鏡頭一轉...
「芷欣...」我說。
離開紅磡後，現在我和芷欣一同乘坐於巴士上層內，她坐在窗口的座位而我就坐在她身邊。
她沒有回應我，只是一直默默的別過頭看出窗外...
「我又...又冇話過會理佢...」我低著頭的說。
「陳芷欣...唔好唔開心啦...」我碰一碰她的肩膊。
芷欣同樣的沒有理會我。
「我個心點會冇啦啦去左第二個人到，一直都留低左係你個心入面。」
「真係...？」忽然聽到了她口齒不清的哭腔跑出來。
芷欣整個身子在抖震著，帶著非常的，愁緒。
「唔好喊啦傻...」
「如果...佢真係係我手上...搶走左你...」
整個巴士上層的人數只有五個以下，這正好給予了我跟她一個坦言的機會。
「唔會。」我堅定的說。
「但係佢講到...佢好鐘意你...而且...」這個傻瓜靜靜哭得眼淚鼻涕也顯而現見。
「而且咩？」
「而且...佢...係咪比起我更有吸引力...」從芷欣這句說話知道她內心很成功被那傢伙留下不好的記憶。
「拿聽住啦你。」我把芷欣的腦袋依靠著我的胸膛「芷欣你，係我心入面永遠都係最靚既女仔。」
「咁你講啦...我邊到靚...」她開始漸漸卻住了流淚。
又要難為我說出這種令人害羞到極點的話...
我與她四目交投「呃...你隻眼啊！你隻眼又大又圓，閃下閃下咁....」
「重有呢？」她開始破涕為笑。
「呃...頭髮長長...呃...心地善良！」
「嘰...」芷欣掩著在偷偷窺笑的嘴。
「做咩喎...呃...咁皮膚好好！」
「唔合格啊...」芷欣哭得紅腫的眼睛漸漸向上變彎成笑眼。
「有咩咁好笑姐...」我覺得自己還沒有清楚猜透女朋友的內心。
「拍左拖咁耐，靜係發現到我咁少優點...哈哈你好失敗啊張生...」她居然反過來開玩笑。
「咁講我都有架...張太...」我依舊緊緊的擁抱著喊包的腦袋。
「我知道架啦，你唔會...放我走。」她突然在我懷抱內抬起那張哭得楚楚可憐的臉。
「咁就緊係啦。」我從褲袋裡拿出紙巾「抹左啲眼淚鼻涕先啦，你睇下你而家幾醜樣...」
「嗯...」她只是繼續抬著那副哭貓臉，我親手拿著紙巾為她抹掉多餘的淚水。
「哇你個鼻涕妺，次次喊親都流哂鼻涕。」我用另外一張紙巾蓋著她細小的鼻子，幫她清理鼻涕。
「唔...鼻涕流哂出黎啦衰人！」
這個長著一副漂亮可愛的鵝蛋臉，大大的水汪汪眼睛，小小的豬膽鼻子，輕盈的粉紅小嘴、烏黑的平直瀏海，及腰的長頭髮的女生...陳芷欣。
她是一個很容易呷醋，胡思亂想，愛哭又傻傻的女生。有些玩笑跟她開起上來，只會傷及到她純真的少女心。
她是個...除了家人之外...我心裡頭佔據了最重要位置的女生。
我...絕對要陪伴著她，保護她的身心靈...不能夠...辜負她。
「誰又騎著那鹿車飛過~」此刻，我在開聲唱著歌，哄哄這個一直窩在我懷內的小女孩。
「好毒啊首歌...」她輕聲說著。
「咁第二首啦，喜歡你~那雙眼動人~」我唱道。
「救命...」她輕聲細軟的說「好老套啊你...哈哈」話畢她輕輕的用手拍打我的腹部。
「咁你有咩要求啊老細？」
「唔...唱紅蘋果比我聽～」她吐舌的說。
「紅咩蘋果啊...乜鬼野黎...」
我們一直在車上，目中無人地卿卿我我。
直至，她在我懷內搖搖蕩蕩的筋皮力盡，睡著了。
「我唔會，扔低你一個，我既公主。」
「登登登登~」車站預告鈴聲響起。
「下一站，慈雲山中心巴士總站，The next stop is Tsz Wan Shan Shopping Center Bus Stop...... 」
結果今天這個原以為平平無奇的星期日，卻因為一個麻煩人出現而打亂了整個氣氛。
現在是晚上九時多，送走芷欣回家的三小時後。
我正在家樓下的麥當勞裡排隊買屬於我的一人「毒晚餐」。
「唔該你十號餐，飲可樂，拎走。」我說。
「多謝你二十八蚊。」收銀員說。接著我遞過現金後，站在一角等候取餐。
唉...那個女生...到底想幹什麼...
我一邊唉聲嘆氣的回想那個叫黃海瑤的女生，一邊低頭把玩著手機。
此時...
「如你是我 戴月彼星努力過」電話鈴聲響起。
我馬上接聽電話「喂？」
「喂...阿曉...」電話的另一頭是芷欣的聲音。
「做咩事啊冇啦啦打比我既？」我問。
「冇啊...只係想聽到你把聲。」電話裡頭的芷欣好像有點沒精打采。
有見以及此我馬上把自己苦惱的心情隱藏「嗯？點啊傻人？你食左飯未啊？」我以開朗的語氣回應。
「嗯食左啦，咁你呢？」
「呃...食左啦緊係...」其實還在等我親愛的豬柳蛋...
「係啦！其實呢...」她吞吞吐吐的說。
「有野就講啦你。」
「可唔可以再親口應成我多次...唔會扔低我...」小鳥依人的她說。
果然，女生總是希望重覆得到肯定...希望能夠讓自己安心點。
「嗯。我係點都唔會扔低陳芷欣你一個。」我用肯定的語氣應聲回應。
「嗯！嗯！嗯！你應成左我架啦！」我聽得到她高興的說了三遍。
「咁好啦阿欣，你快D去沖涼訓教啦！你唔可以夜訓架唔記得啦？」
「知啦，陣間十點鐘準時訓教。」她乖乖的回應。
忽然「十號餐飲可樂！」收銀櫃檯的收銀員叫嚷著。
「唔講住啦芷欣，今晚早D訓啦，晚安。」我準備掛線走去拿取我的晚餐。
「你都早D抖啦傻仔，晚安。」話畢她掛掉通話了。
最後，我拿著麥當勞、我的晚餐緩步回家去。
不過...
回到樓下，我在大廈大堂裡打開信箱打算查收有沒有新來信。
下一秒我感到很意外，因為...
「你...捨得上水啦咩...」我看著信箱裡頭唯一的一封信說道...