〔熱血〕【一班兄弟去台灣溝女】台灣遠征團: 41

大同再次從youtube搜尋一次技安的MV。
「唔係喎，好似真係依首！」大同指向我們剛才聽的那一首歌。
「邊有可能，成個MV根本無見過技安！」精強說。
「係囉，成首歌得女聲咋喎！」我說。
「一係睇多一次囉。」肥斌說。
「我又無所謂啊，反正條女咁得意。」精強說。
「是但啦，大同撳多次黎睇啦。」我拍拍大同。
大同再次按下滑鼠的左鍵。
 
清脆輕鬆的鋼琴聲再一次響起。




「暫停！」我好像發現了什麼所以大叫，大同亦相當快手地按下暫停。
「咩事啊？」精強問。
「頭三秒企係後面果個係唔係技安？」我問。
「我掛住睇條女無留意喎。大同，拉返轉頭睇下。」精強說。
大同馬上重新播放歌曲。
我們這次將注意力集中於站於後方的那個男人。當歌曲播放到兩秒時，大同按下暫停。
「好濛喎。」我們四位將頭貼近螢幕。
「但係睇個外形的確好似技安。」肥斌說。
「好似真係佢，再播下先啦，可能有一幕會影得清呢。」我說罷大同就再次按左播放。
「喂！後面彈結他果個係唔係技安啊？」精強說罷，大同又再按下暫停。




「屌，未仲濛過頭先！算啦，繼續播啦。」我說。
直到歌曲播放完，我們按下了多次的暫停。但始終沒有一個畫面能清楚地拍下那個男人。不過其實我們都知道，那個男人就是技安。只是我們自己不願接受，所以不停地去求証。
 
「屌佢老味！！成個MV有三分五十秒，技安出場得果三十二秒！仲要個個鏡頭都濛嘅！！有無攪拎錯啊！！」我不忿地大叫。
「唔好咁啦，咁技安最少都叫成為左歌手丫。」大同說。
「歌手係唱歌架！唔係成隻鬼咁企係後面做佈景板啊！」我說。
「咁都聽到佢和下音嘅……」精強說。
「和音？有邊個歌手唱歌唔洗和音架？頒獎禮唔通會頒埋比D和音啊？」我說。
「咁佢地組合黎架嗎，咁頒組合獎嘅時候都會頒比技安嘅。」肥斌說。
「組合獎？我驚有人唔記得左佢地係組合，頒左個女歌手獎比佢咋！到時技安就真係唔知出唔出去拿好啦！」我說。




「咁你可以放心，無主辦單位會咁on9嘅。」大同說。
「我都知無主辦單位會咁on9，我覺得技安好唔抵姐。」我說。
「咁你唔洗擔心嘅，其實技安主動叫得我地睇，咁相信佢都係鍾意個MV嘅。咁佢開心未得囉。」大同說。
「希望係啦。」我說。
「我就話技安一定開心！你都知技安個人要求唔高，依家佢都算做左歌手，我覺得佢一定開心！」肥斌說。
 
當然，只要是技安自己喜歡，我都會衷心去替他高興。
就在這時候，我們四個人的電話同時響起。是技安在群組裡發送訊息。
技安︰睇左未啊？
我們四個人對望了一下，大同就低頭打著訊息。
大同︰睇左啦！你就好啦，有個咁可愛嘅拍擋。
技安︰哈哈！係啊，佢性格都好可愛架，有機會介紹你地識丫。
精強︰好啊！
我︰係呢，技安，係台灣果邊做歌手好唔好玩啊？開唔開心？
技安︰我覺得幾好啊！雖然我係歌手，但係我出鏡少，所以出街都唔洗顧及形象，幾爽啊！我個拍擋就慘D，已經有人認到佢，出親街又要化曬妝又要成日同人合照咁。




 
肥斌拍一拍我說︰「我都話佢會開心架啦！」
「咁我都放心D。」我回道。
 
雖然我們有四個人於房間中，但我們還是選擇了用訊息來聊天。好讓技安可以加入我們的話題。
房間內不時傳出笑聲，但沒有人說話。感覺是有點詭異啦。但我們都樂在其中。