[真人真事]唔知你地既初戀係點架呢 我既初戀係咁: 初戀(第六章)

呢段幸福既日子並唔長久，係MIKI五歲既時侯世伯因為意外過左身，而伯母亦傷心過度，之後可能伯母想自已唔好諗咁多，所以寄情工作，又或者伯母望到MIKI就會諗返起世伯，所以佢先對MIKI咁冷漠，無論咩原因都好，我諗伯母家陣都依然好愛世伯

MIKI一路喊一路講佢地既往事，我個內心有一陣刺痛，果陣我係度諗其實我係咪一開始就唔應該追問，但係我聽完之後我又發覺自已了解得MIKI實在太少，我唔知自已有無做錯，我好愛MIKI，當然想知道佢既全部，但又好似係傷口上灑鹽，果一刻我除左攬住佢之外已經唔知道點安慰MIKI

過完果日之後其實我自已都好內疚，我有幾日都唔敢搵MIKI，我好驚，但我又唔知自已驚D咩，個感覺就好似小學生做錯左事驚比人鬧咁，直到幾日之後我收到一個未知來電既訊息，個訊息內容既意思係問我可唔可以同佢個女分手，MIKI唔需要我

我當時諗左好耐究竟我應該點算，我諗會唔會我同MIKI既學歷問題，定係家底問題相差有段距離，最後我決定無覆個訊息，甚至無同MIKI講，我覺得MIKI就算幫我，MIKI都會同伯母鬧交，咁做只會令佢地母女關係再變差，而我唯一可以做既....就係慢慢淡出呢段感情

呢個我呢世人覺得最無助，最諗唔到辦法所得出黎既答案，果一刻我覺得自已好無用，之後係離大學畢業仲有半年時間入面我都好少搵MIKI，就算MIKI有約過我出黎喊住口問我發生咩事，我都只能夠沉默，果陣其實我都好想喊，但係我唔可以表現出黎，如果我都忍唔住既話，離開就變得更傷心更困難，





我明白如果離開係最好既結果，我都會忍痛離開

呢段關係直到大學畢業之後幾日，MIKI打電話比我，喊住向我提出分手，我雖然有晒心理準備，但我一聽到佢講分手果時，我既眼淚都終於忍唔住，MIKI話伯母要同佢兩個移民，以後都未必再返香港，我知道我地兩個唔會再見，我同MIKI都一齊喊到收唔到聲

果日夜晚傾左好耐，我地講返我地點樣識，果陣我既傻事，講左我點樣送果扎花比佢，我地邊喊邊笑咁講左成個夜晚，果陣我地又好似返返去最初一樣，個感覺仍然好溫暖，到收線既時侯，大家都明白大家都好愛對方，我地仲可以保持聯絡，個心開始有返少少平靜

就係臨收線前最後一句

MIKI喊喊地咁講:「凍果陣要著多件衫，熱就唔好著咁多喇，訓教要記得"COM被"，仲要記得掛住我呀。」





聽到呢句野之後，我又再一次喊到收唔到聲，果一刻明白咩叫真愛是苦味....