[真人真事]唔知你地既初戀係點架呢 我既初戀係咁: 初戀(第二章)

我同MIKI正式開始，果一排佢幾乎日日都問我點樣令佢抽到扎花，個傻妹甚至佢有懷疑過我同晒全班29人一齊夾埋，但係佢每次質問我果陣我都唔會講個秘密佢知，我只係會答佢"可能因為我地係命中註定呀"

之後果有一段時間我都玩魔術比佢睇，其實我唔係咁鐘意玩魔術，我只係想睇到佢果種....好似話緊比我聽"無可能"既表情，呢段日子去到中五會考，結果我好好彩都升到中六，點解好好彩?因為我真係差一分就要同中學生涯講拜拜，而MIKI當然無問題啦，佢本身其實都好聰明，而且成績一向都唔錯果種人黎

拍拖果陣我地除左行街睇戲食飯之外，MIKI仲會教我彈琴，我唔知點解覺得彈琴好過彈結他，或者可能係MIKI親自教我既原因，我果陣覺得同佢一齊就已經好開心，我地最鐘意彈情歌，彈琴果陣唔理彈岩定彈錯，我地都會對望住係度傻笑，其實我都唔知自已笑緊咩，但果陣淨係知好想笑，而且望住MIKI由心到笑出黎既樣，我覺得好溫暖...

我地仲會一齊行書局，我地會一齊睇書，有一次佢問我想唔想試下學整皮革，我其實心入面係唔想，但係我覺得如果有一件事可以兩個人一齊整，可以多左樣行街戲睇以外既活動其實都唔錯，我地係書局買左D書自學，我地一齊傾想整一樣點既銀包，有幾大SIZE，度下尺，計下數，其實都算一係種唔錯既經歷

我地有時會將整出黎既野放上網賣，其實果陣都賣得算唔錯，可能因為係我地係收好平，我地都賣出去都只係想有人鐘意我地整既野，無乜點諗過當係一種生意黎做，而且老實講我地整得都幾普通下





因為我對皮革無乜興趣，或者應該話，我係果種對所有野都不感興趣既人，但如果我對一樣野有興趣，我會盡心盡力去做好佢

其實一路以來我知道我自已之前所做過既野，都話比我聽我唯一感興趣既就係MIKI...