[真人真事]唔知你地既初戀係點架呢 我既初戀係咁: 相親(前)

果日之後比我知道左MIKI原來彈琴好叻，過左幾日後學校就決定比我地參加，表演既時間有5分鐘，我平時聽果D歌一首都唔過五分鐘，所以都應該無問題既，仲比左4個星期練習時間我地，其實4個星期係夠架...對正常真係識彈結他既人黎講，第一個星期MIKI每日都約我去音樂室練習我都話有事唔去得住

知唔知點解我要推左佢呀，因為我第一日就要去書局買結他入門同埋結他譜既書睇呀!老實講我今次唔想好似上次踩單車同遊水咁比MIKI見到我乜都唔識

跟住我買左書，拎埋個結他比人較正D音之後，日日就拎住個結他十幾個鐘，果一個星期我除左返學食野同訓教之外就係拎住個結他係咁輪流練入門同樂譜，果陣我練到D手指好痛都唔敢話比白衣天使MIKI聽..

一個星期之後我覺得自已已經算係"小學雞果陣玩過下結他"  咁我就約MIKI啦，點知佢話唔好係音樂室練，因為已經得返三個星期唔夠時間，而且學校會關門，跟住就叫我上佢屋企練習

之前佢講過佢屋企人成日唔係屋企，我一開始果陣都有D驚會唔會有"意外" ，但係我其實又好希望有"意外"，你明唔明果種複雜既心情，但係我最後都有應承佢，如是者我放學就同佢一齊返屋企啦，咁我地行到去一個比較似豪宅似私人屋苑果度，佢就同我講就快到，我當時天真咁以為佢係住係棟豪宅隔離既公共屋村果度

咁結果我當然錯左，上左佢個豪華屋企之後我就地就開始JAM歌....