[真人真事]唔知你地既初戀係點架呢 我既初戀係咁: 相知(後)

睇完日出之後我同MIKI都訓左係沙灘度，訓左4個鐘左右就比班蛋散嘈醒左，同佢地一齊去飲早茶，食下小食咁，我一路行一路諗返起尋日我地講過既野，我好驚會令佢覺得有誤會，因為我當時唔知道自已係咪鐘意佢，果陣我有諗過之後同MIKI相處可能會有D尷尬，我就懷住呢種咩都唔知道既心情上船返屋企

到左第二日返學之後，我發覺我諗既野係多餘，因為我地6個人由果日開始日日都一齊食LUNCH，比起之前我地家陣已經可以無所不談，而我唯一要擔心既野已經唔係同MIKI會唔會覺得尷尬，我要擔心既係我果隻腫到連皮鞋都著唔到既腳趾公，我隻腳趾公經過白衣天使MIKI治療之後，我隻腳趾公已經同一隻雞蛋一樣咁大隻，攪到我睇完醫生之後要著幾個星期拖鞋返學

果一年既情人節我地無乜特別點過，因為我同MIKI都無任何表示比對方，果一晚睇既日出就好似係夢境入面發生咁，情人節果日我地6個人只係每人各買左3盒差唔多樣既朱古力送比大家

日子好快咁過去，今年既畢業典禮好快就會係某個大會堂舉行，雖然畢業既唔係我地級，但係我地都係要出席同參加

有一日MIKI拎住張申請表既野走黎問我識唔識玩樂器，我開頭以為佢係想學，想搵人陪啦，跟住我就答左佢我細個有玩過結他，結果佢就係張申請表到填埋我個名，仲拉住我去遞張野，我望清楚佢填果一欄，寫住畢業典禮表演項目！！我好想大叫我所謂既玩結他，係小學雞果陣拎左老豆個結他黎玩咁架咋，而且我玩個結他既方法只係將個結他打平放係檯，扮電視劇入面D武俠咁彈古箏





當佢遞張申請表果陣，接野果個人就係我話平時好憎我果個老師，佢見倒我要表演結他果陣，佢個驚訝既表情係好似一幅梵高既名畫咁，而我當時既表情我諗都應該同佢一樣

果日之後亦都比我知道左MIKI原來彈琴好叻...