大家好，我叫阿俊，今年五歲: 大家好，我叫阿俊，今年五歲(3)
大家好，我叫阿俊，今年五歲(3)
我唔係咁睇得透蘋果點解要用我阿哥五百蚊比巴士錢做頭條。不過我會多謝蘋果。
因為我阿哥上頭條呢單嘢，令到我成功爭取到我同女朋友呢段姻緣。
以前我同D同學仔話自己幾有錢，大家永遠都當我吹水唔抺嘴。直到兩日之前，我攞左份蘋果頭條加埋我同阿哥張合照返幼稚園，有圖有真相之下，大家開始相信我投胎有道。
而亦因為咁，一直正眼都唔望我嘅Angel B(我現任女朋友)終於都開始注意我，同埋比我既財華深深咁吸引住。
Angel B 係英文名，我都係比較習慣叫我女朋友做神仙B。
其實當日除左神仙B之外，仲有幾個女仔同時都有向我表白，不過最後我都係㨂左神仙B做我女朋友。
好簡單，佢有身材。
無論身高定體重，佢都係同我最接近，企係佢旁邊就好似孖公仔咁樣，佢比到我果種天生一對嘅感覺，真係好好Feel。
可能大家會笑我個諗法好天真，好幼稚。但係大家唔好忘記，我都只不過係一個五歲嘅小朋友。
神仙B由正眼都唔望我迅速咁同我係埋一齊，印證左我老豆一句說話：
姻緣錢注定。