大家好，我叫阿俊，今年五歲: 大家好，我叫阿俊，今年五歲(1)
大家好，我叫阿俊，今年五歲(1)
大家好，我叫李邊能渡俊，係香港土生土長日本人，今年五歲。各位可以稱呼我做阿俊。
宜家社會上好多老一輩都鐘意稱呼年青一輩做廢青，其實我好認同，所以我成日警惕自己要趁後生好好地讀書，打好D根基，把握幼稚園同埋小學呢幾年，好好增值自己，學識河馬同太空人點串，學好D普通話，西紅柿就係西紅柿，唔好讀錯做番茄。
第時大個左，如果連呢D咁簡單嘅英文都唔曉，中文又搞錯，比人笑做港仔，標籤左做廢青，就真係唔單止返唔到工，仲返唔到轉頭。
我真係唔想讀完大學先放棄自己去申請公屋啊！
不過我比較好彩，一早就參透左致富之道，如果無風無浪嘅話，大學畢業應該可以有自置物業。
我唔介意同大家分享呢個發達秘訣。要發達其實真係唔難，最緊要就係識得投.....投資？
錯，唔係投資，係投胎。只要你投胎有道，包你一世有運行。
你問我屋企有幾有錢？以前我真係唔識答，直到前兩日我阿哥唔記得入錢落八達通，用左五百蚊比巴士錢，我終於可以用例子答你啦。