羊生與羊太的日常軼事: 生日蛋糕

過兩天羊太生日，我說不如現在到樓下餅店訂一個蛋糕，喜愛吃蛋糕的她當然欣然叫好。

到了餅店，她選來選去，就只剩下兩個選擇，一個是朱古力味，一個是Earl Grey味，於是她就問我意見。

「你覺得邊隻味好啲﹖」

問我其實是多餘的，因為我最討厭Earl Grey味﹕「朱古力啦，我都唔鍾意Earl Grey。」

「嗯……唔係喎，我諗個Earl Grey味唔會好重啫，應該都係只得茶味。」





我反白眼﹕「如果得茶味佢叫Earl Grey蛋糕會唔會俾人告呀﹖朱古力啦。」

「嗯……我驚個朱古力味會好漏，你睇吓有成層cream cheese喺面喎。」

「個Earl Grey咪又係一樣，你睇吓(我指著那張蛋糕橫切面圖)，咪又係成層cream。」

「唔係嘅，我諗個味應該會light啲，茶味點都無朱古力味咁濃。」

「都話我唔鍾意Earl Grey咯。」





「咁就算有都應該唔會好強嘅。」

「好好好！揀Earl Grey蛋糕啦！我最鍾意就係Earl Grey！呢個蛋糕真係超正！我超想食！」我馬上向店員道﹕「唔該我想訂呢個蛋糕。」

羊太笑得很開心，我沒好氣道﹕「其實你鍾意邊個咪直接話『我要食呢個』咪得囉，唔駛假咨詢講啲理由說服我㗎，我係港豬嚟㗎咋，你話『一地兩檢，快捷又方便』就得㗎啦。」

羊太笑得更開心，我也在笑，但大家的笑容都好像有一點苦澀。