我最錯，在鬼節遊船河: 第二十節

踏進那用蠟燭圍著的圈內後，感覺有點特別。
 
圈內就像是一個二次元空間一樣，一道透明的圍牆彷彿在為我們遮風擋雨，簡單點說，就是在圈內的我們絲毫感覺不到圈外的強風，感覺很溫暖和安全。
 
「你地入左黎呢度之後就唔駛驚，而家任何既妖魔鬼怪都行唔到入黎，總知你地記住遇到咩危險都好，唔好離開呢個圈就得！」沈師父說。
 
「咁即係點撚樣呀？我想走呀！我唔想留響呢度！師父，不如你幫我作法，或者整到符俾我，咁我走先，聽日再返黎接你地啦！」大口哥焦慮地說。
 
看到大口哥焦慮的情緒，我安慰道：「大口哥，我諗我地都係唔好離開呢度好啲，既然沈大師佢地話呢個圈安全，我地只要唔離開個圈就得，陣間你出左去，而隻紅衣女鬼出現咁仲麻煩！」
 




「你條撚樣！今次真係俾你累撚死！」大口哥發晦氣道。
 
沈師父見氣氛有點不對勁，便行到我和大口哥的身邊說：「大家可能第一次接觸靈異事件而有啲緊張，不過我想講既係，而家你地最緊要就係要冷靜，因為心虛則魂浮泊弱，心堅則神定氣雄，只要意志堅定，就冇鬼可以傷害到你地。」
 
大口哥聽後，沒好氣的便找了個位置坐下。
 
子嫣追問：「咁我地下一步做啲咩？係咪響個圈內就得？我地唔係要幫藍楠解決隻女鬼咩？我地而家咁樣做有咩用？」
 
聽到子嫣對我如此著緊，一陣暖意湧上心頭，可是我更知道既然現在我們在求沈大師為我驅鬼，我不想他覺得我們對他有任何不敬，我立刻拉著子嫣的手說：「你唔好咁緊張啦，你聽唔到沈大師話只要我地留響度就冇事咩？」
 




「我知呀！但係驅唔走隻女鬼，咁有咩用？隻女鬼而家想害你，解決唔到件事，你會俾佢地害死架！」子嫣說著，雙眼開始變得通紅。
 
「哈哈哈哈！呢位小妹妹有意思！有意思！哈哈！」沈師父在大笑著。
 
陳偉說：「我地今晚主要係黎問路，簡單啲即係同隻鬼講數，講得成就當然好，講唔成我地就會收復佢或者打散佢，只要而家我地可以做既就係等待，因為我地想見隻女鬼，但唔代表隻女鬼想見我地，明唔明？」
 
子嫣聽後感覺踏實了一點，我安慰子嫣說：「係囉，有兩位大師父響到，我唔會有事架，你放心啦！」
 
子嫣給了我一副鬼臉後，便和大口哥一樣，隨便的找了個位置坐下。
 




看見子嫣和大口哥坐在地上休息，陳偉說：「你地休息一陣好啦，我地陣間仲要四圍去探路，如果我地搵唔到同女鬼有關既物件，咁我地去搵女鬼上黎講數就冇咁易。」
 
「同女鬼有關既物件？」
 
「冇錯！你地兩個朋友因為某啲原因同女鬼連繫上而被女鬼害死，我地最多聽到既係有人響荒山野嶺四圍疴尿而招惹到鬼魂，所以同一道理，我估計響呢個沙灘應該仲有一啲野係屬於隻女鬼既，唔好問咁多啦，講你都唔明，總之你地休息一陣我地就要出發去尋寶。」
 
「我行得架啦！唔好浪費時間！」子嫣聽到陳偉的說話後立即站起。
 
「咪撚住先！我講明我唔出去架，我響度等你地返黎！」大口哥激動的回應著。
 
「無膽匪類！」子嫣暗暗地道。
 
大口哥激動的摺起自己的衣袖說：「講乜撚野呀你！死靚妹！我大口哥有咩未撚見過呀，你而家即係睇小我呀？我只係覺得你地出晒去搵野要有人睇住，咁我咪幫手睇撚住囉！既然你以為我唔敢，我而家就出去搵俾你睇！」
 
「你係至好呀！如果唔係我睇你唔起架！」子嫣說。




 
子嫣回身向我展示了一個「勝利」手勢。是的，在夜裡的大浪西灣，我們要找一件屬於女鬼的物件不是一件易事，多一個人幫忙，我們找到的機會便越大。
 
我一直認為今晚的事是衝著自己而來，有很多事我不方便，亦不好意思的向別人要求太多，幸好有子嫣的激將法，我們才可以讓大口哥協助幫忙。
 
沈師父行到我們眾人的面前說：「陣間我地出去探路，一定要好小心，仲有呢度有幾個銅鈴，我地用唔到電話溝通，有咩事我地就搖動銅鈴，咁大家就一定要衝過去幫手，仲有，如果遇到一啲事你地處理唔到，就立即走返入個圈入面，你地明唔明？」
 
「明白！」
 
「最後，我要同你地認真講一次！記住！未害死過人既就係鬼，害死人既就係妖！我地而家面對既係已經殺左兩個人既妖魔，大家一定要小心，我地搵到咩野都好，每一個小時就要返黎呢個圈一次報到，如果冇問題就出發啦！」
 
我們握著沈師父剛給我們的銅鈴，便轉身預備出發，搜尋女鬼的遺物。