《3.3》Vol.1: 【共剷宣言】旮旯《辛苦曬》

旮旯/《辛苦曬》

筆者先喺到同大家補祝返句聖誕快樂。（編按：出版日應該過左元旦添啦。）

兩日、甚至係半個月嘅聖誕假，唔知各位做咗啲咩呢？問到呢度要向做服務行業嘅讀者致敬，因為佢地從來都冇聖誕假。尤其係飲食業，每到大時大節就更忙喇！

有人係一般嘅五天工作周，連放四日假固然開心，不過好似筆者咁星期六都係工作天嘅人就冇咁好彩。

以自己為例，聖誕節正日根本就純粹瞓晏啲，夜晚先外出同朋友食餐飯，即使返工都唔影響當日節目。但偏偏啲派對就集中喺星期六，一年一度，只好請一日假。





幸好筆者嘅同事都好開通，不過倘若工作係忙到係「一個都不能少」嘅話，你一請假就會慘被標籤做「個個做到死，你連放四日，開心啦！」。

當然亦有聽聞朋友全個辦公室得返兩個人，又冇王管，呢啲畫面都係一年一度先見到，蔚成奇觀啦！

最後都係講返句老土嘅：假期都要做嘅打工仔，辛苦曬啦！