【現場直播】365日浪漫進行曲: 第二十章 : See you Again‏

第二十章 See you Again‏
 
 
彩葵送了我下樓，我身上的力氣也恢復了七八成，除了撞傷的鼻梁依然感到痛楚外。在漆黑的夜空下，我們二人沒有多餘的說話，更確切的是沒有任何交談，回憶起我和彩葵的初遇，也是一個痛楚的開始，莫名奇妙地被她扭斷我的尾指，而這次離別也是一個血流的終結。
 
" 同佢一齊開唔開心？"
 
" 幾好呀。。不過我地都係岩岩開始，暫時幾好 "
 
" 佢有咩吸引到你？"




 
" 嗯。。感覺囉。。"
 
又是這一句！估計大家已經聽過不少這句話，只要遇到一些不好意思直接回答的問題時，「感覺」這個萬惡之詞就會出現，往往令人無法展開話題，畢竟對方給出一個虛無漂泊的答案，潛台詞就是不讓你問下去。我從來不相信世上會有喜歡一個人時，而不知道其中的原因。
 
” 你呢？有女朋友未？上次個個係你女朋友？”
 
” 唔係！個個只係普通朋友者，我仲係單身，你快D介紹D空姐比我啦！"
 
” 好呀！你鐘意邊種類型？我幫你物色下！"




 
" 嗯，高高瘦瘦，同我差唔多高，皮膚偏白，之後係長頭髮，唔係話無時無刻都係長髪髮型喎，係可以間唔中會換下其它髮型，仲有笑起黎個時會比人一種治療既感覺 "
 
" 係。。。"
 
" 性格方面要獨立，唔洗咩千依百順，咩溫柔體貼，最好有小小傻大姐既感覺，但又會好容易怕醜，成日好多野都唔好意思咁 "
 
" 點解你好似形容緊咩個特定既人咁 "
 
" 係？嗯。。"




 
Shit ！！又好似真係形容緊某個人，但究竟係邊個！一時間又想不起是誰呢！！正在我處於思索之際，我與彩葵已經走到了巴士站前，只見兩對情侶緊抱在一起，還有一名身影單薄的老漢，低頭看著手上的手機。
 
" 到啦，你返去啦 "
 
" 嗯，咁你自己小心 "
 
" 洗唔洗我送你屋企？嘻 "
 
" 啊？"
 
" 我講笑咋！你唔洗咁慌張喎！"
 
" 噢。。我仲諗緊好似好奇怪咁。。"
 




" 你成日都咁認真，好得意好搞笑 "
 
" sorry 。。我都唔想。。我成日都分唔清對方咩時候係認真定講笑。。已經搞錯過好多次。。"
 
彩葵低著頭說話，目光不確定是看著腳上的鞋子還是地上的雜草，我只能確定迷茫中的彩葵十分迷人，讓人想指點這只純白的小羔羊走出迷霧中。
 
" 咁。。我走啦。。都好夜啦。。"
 
" 嗯，係幾夜下，你返去先，我諗都好快有車黎 "
 
" 嗯，咁，拜拜 "
 
" 嗯，拜拜 "
 
彩葵對著我展露了一個微笑，點了點頭後轉身離開，我的視線直到她在轉角前一直跟隨著她，依然記得她那瘦弱的背影，獨自一人來到陌生的國度生活，努力地追逐自己理想中的生活，手上的尾指偶然會感到痛楚，彷彿提醒我彩葵的曾經，如果彩葵當時轉身，結果會否變得不一樣。或許世界上總有很多「如果」，只是結果從來都是一樣。




 
 
當我在幾天後的一個早上，從電視新聞上得知她被人殺害的報導後，有一段時間，我忘了當時自己做了什麼，後來我朋友向我描述，在電影院看「Furious 7」時，片尾響起音樂 See you again時，我比任何人都哭得大聲，失控得影院中彷彿只有我的哭泣聲。