愛在宇宙大爆炸前: （四）

於是，我地開始傾電話，開始係上堂既時候傳紙仔。
我知道蔡婉玲成日想偷睇我地寫咗啲咩，不過我知道林若妍一定唔會比佢得逞。
因為呢個係屬於我地兩個人既秘密。

「林若妍，有冇興趣放學一齊留低溫書呀？」係羅偉倫。
「下年就會考，係時候要溫書嫁喇。」仲有三個月先到中四下學期考試，咁早講會考？
林逸峰、蔡婉玲同我同時望住林若妍，大家都好想知佢會點樣拆解羅偉倫既攻勢。

「不如我地一齊留低吖？」林若妍選擇拉埋我地落水。





於是，我地四個，加埋羅偉倫五個就開始係放學既時候留校溫習。
我同林逸峰從來都坐唔定，望住本書半個鐘都唔夠就落咗操場打波。

終於，因為個天黑到伸手不見五指，所以我地走返上班房。
一返到去，見到得返羅偉倫同林若妍兩個。

「蔡婉玲呢？佢去咗邊呀？」一諗起我親手製造機會比羅偉倫，我就心急如焚。
「佢話今晚有親戚去佢屋企食飯，要早啲返去喎。」林若妍完全冇望過我，淨係望住本書。
而佢本書，已經寫滿哂筆記，仲要係由羅偉倫提供既筆記。





「天都黑哂，不如今日溫到呢度先啦，林若妍你住邊呀？我送你返去吖？」睇黎羅偉倫打算完全擊退我。
「不嬲都係我送佢返屋企嫁啦，你返自己屋企啦！」我講完果刻已經覺得好後悔。
「我會照顧好自己，你地有時間既用黎溫書啦。」雖然林若妍既語氣好平靜，但係我知道佢好嬲。
佢嬲我冇正正經經為自己既未來做好準備，佢嬲我將全副心機擺係玩樂同男女私情上面。

林若妍係為我好，所以先會嬲。

我拎起書包，跑咗返屋企。
一路跑，我一路係度諗自己將來想做啲咩。
郵差？科學家？消防員？太空人？





林若妍將來又打算做啲咩呢？點解我一啲都唔清楚既？
莫非一直以黎，我只係一個係佢身邊陪佢吃喝玩樂既酒肉朋友？

知音人，唔應該係咁。

第二日返到課室，我坐低係個位度，一粒聲都冇出。
林若妍比我遲少少返到課室，佢經過我個位既時候，放低咗張紙條。
我滿心歡喜咁拆開張紙仔，上面寫住：呢張係最後一張紙仔。

果日開始，我冇再參加留校溫習。

每日放學，我都拎住一疊筆記去屋企附近既自修室，堅持坐到夜晚10點先返屋企。
當然唔係溫足咁多個鐘，不過當我解答到以前令我束手無策既題目既時候，的確有一種成功感。
林若妍，你要等我，等我有資格同你坐埋一齊溫書果日黎到。





終於，經過咗冇林若妍既三個月之後，就係中四下學期考試既開始。

「呢種題型一定會出，你記得背熟相關既公式。」羅偉倫企係林若妍隔離，果個位以前係屬於我既。
林若妍一邊點頭，一邊抄低羅偉倫所講既題型同公式。

「佢地企埋一齊個畫面，真係好唔協調。」林逸峰企咗係我右邊。
「唔知係羅偉倫差定係你好，如果我係林若妍我一定會揀你。」蔡婉玲企咗係我左邊。
「一場兄弟，我每日放學都有留係班房溫書，唔比羅偉倫有機可乘。」林逸峰蹙一蹙眉。
「我都有幫手嫁！」蔡婉玲又邀功。我冇出聲，淨係望住林若妍。

係呢三個月，我除咗諗F=ma會點樣影響我既將來之外，仲有諗林若妍既將來。
究竟佢將來想做咩呢？考試完咗我一定要問吓佢。

最重要既係，佢既將來有冇我份呢？





校鐘嚮起，我地開始排隊上班房考試。
排係我前面既蔡婉玲一直係度撩林逸峰傾計，我都無謂阻頭阻勢喇。
我係腦海入面重溫呢三個月以來做過題目，係呢個時候，有啲野掂到我隻手。

我擰轉頭見到林若妍，佢塞咗張紙仔比我之後就急步行咗上班房。
我打開張紙仔，入面係一堆物理公式。

果堆應該係來自羅偉倫既公式對我並不重要，重要既係紙仔最底果兩個字：加油。

中文、英文、數學、物理、化學、生物，我會將你地一一打敗。
唔係因為我讀書叻，亦都唔係因為我將勤補拙，而係因為林若妍呢句加油，我就會戰無不勝。