愛在宇宙大爆炸前: （三）
之後既一個月，我幾乎每日都同林若妍討論周杰倫。
「佢係暑假出果隻《葉惠美》我到依家都仲聽緊。」每次講周杰倫，林若妍都笑得好開心。
「你連佢隻《周杰倫》都仲聽緊，《葉惠美》已經好新嫁喇。」而我只要見到佢笑我就開心。
「11月佢會黎香港開演唱會，不如到時一齊去吖？」
林若妍約我去街！林若妍約我去街呀！
我開心到淨係點頭，完全講唔到野。
放學返到屋企，我即刻上網買飛，之後打比林若妍同佢報告。
「喂？林若妍，我已經買咗飛喇！」
「不愧係張浩賢呀。」
唔知點解，中學時期既朋友都會連名帶姓咁稱呼大家。
但係比起大學時期所認識既果堆英文名，呢句「張浩賢」令我感到更加窩心。
之後，我地既話題開始由周杰倫慢慢延伸。
我地加埋林逸峰同蔡婉玲四個經常係小息圍埋一齊傾計。
「原來你有學彈琴嫁？我依家先知喎。」原來林逸峰對林若妍一無所知。
「佢好勁嫁，已經考到演奏級嫁喇！」蔡婉玲講到好似自己考到演奏級咁。
「講開又好似有印象係周會既時候見過你係台上面彈琴…」林逸峰仲係度兜。
比佢地捧到上天既林若妍仍然若無其事咁溫書。
而佢既側面，真係靚到無與倫比。
「你細細個已經學彈琴嫁喇？」林逸峰問咗一個連我都唔知既問題。
林若妍只係擰頭。
「大個咗先學？點解既？」梁逸峰追問。
「連我問佢都唔肯講，你算數罷啦。」蔡婉玲既語氣其實有點兒乞人憎。
就係咁，我地四個基本上無所不談，除左林若妍學鋼琴既原因之外。
而我亦都發覺到，蔡婉玲應該係鍾意林逸峰既。
不過林逸峰作為一名連我都認可既靚仔，應該唔會對佢睇得上眼。
唔係我自誇，我覺得因為我既出現，林若妍開始笑多咗。
而我最擔心既情況終於發生，就係同班既男同學開始發現林若妍既優點。
當中來意最明顯、經常撩林若妍傾計既果條友，叫做羅偉倫。
點解偏偏有個「倫」字？林若妍會唔會因為佢同周杰倫一樣有個「倫」字而產生移情作用？
就好似我地之間既引力咁，莫非林若妍同佢之間都有一股我睇唔到既引力？
佢就想，佢有機會同林若妍一齊睇周杰倫演唱會咩？
《周杰倫無與倫比演唱會》呢個名改得真係好，一流！恰好用黎形容我同林若妍既關係。
到左演唱會當晚，我著住一件淺藍色既摺袖恤衫，加條米色褲。
歌神教落米襯藍，對唔住喇周杰倫，今晚全個紅館最型應該係我。
我擔心林若妍會係演唱會途中覺得肚餓，偷偷地買咗排朱古力放咗係袋。
細心的男人。
林若妍依時赴約，佢著住白色短袖恤衫，加條酒紅色既及膝裙。
佢既打扮其實好簡單，但係果份氣質真係…無與倫比。
我地一齊去咗附近一間茶餐廳食晚飯，當侍應放低兩碗麵既時候，佢遞咗張紙巾比我。
溫柔的女人。
我拎住佢張紙巾，講真有啲唔捨得用。
林若妍連食麵都食得好斯文，反觀隔離枱果個男仔拖住件極品港女，又嫌茶餐廳污糟又話要去食刺身，林若妍贏佢成條街。
「你估吓佢陣間會唔會唱《愛在西元前》吖嗱？」睇黎林若妍真係好鍾意呢首歌。
「唔知嫁，我又唔係佢。」
「如果佢唱就好喇。」
「如果佢冇唱，我唱比你聽喇。」
「你行開啦。」林若妍好鍾意叫我行開，咁又係，對佢黎講講粗口實在太遙不可及，呢句「行開」襯佢好多。
我地掛住講東講西，碗麵食咗大半個鐘。
當我地企起身埋單既時候，隔離枱果個男仔都拎起張單行去收銀處。
我見到個港女拎住個名牌手袋，一臉不屑咁跟住個男仔行。
個男仔埋單時同個港女講咗一句：「下次陪你去食刺身喇。」
港女即刻小鳥依人咁挨住個男仔既膊頭，講：「唔駛，你錫我多啲就得喇！」
林若妍贏咗，但係我輸咗。
唔知會唔會有一日，林若妍好似頭先個港女咁，小鳥依人咁挨住我個膊頭呢？
不過最好唔好食魚生啦。
我地係紅館出面既空地等開場，有小販兜售我地買熒光棒，但係林若妍全部都唔要。
突然有一陣風吹埋黎，佢好自然咁縮埋一舊。
「覺得凍既話就投入我溫暖既懷抱啦。」我攤開雙手。
「你行開啦張浩賢！」又黎喇。
我真係好鍾意見到佢似笑非笑果個樣，嬲爆爆但係又甜絲絲。
我承認，我冇膽明刀明槍咁追佢，只係用朋友既身份係佢身邊嘻嘻哈哈又一日。
總有一日，佢會覺得我係佢身邊係一件非常美好既事…掛？
講吓笑吓終於夠鐘開場，我地踏入咗紅館，搵到自己個位之後坐低。
我望住林若妍，佢全身都散發住一種好特別既氣質。
以前我以為佢鍾意一個人，呢一晚我終於發現，原來佢同一個曲高和寡既音樂家一樣，一直等待緊一個知音人。
而果個人，咳咳，極有可能就係我喇。
當晚周杰倫唱咗廿幾首歌，林若妍聽得好投入。
唱《晴天》同《擱淺》果陣，佢傷心到好似就黎喊咁。
唱《星晴》同《簡單愛》果陣，佢又笑得好甜、好甜。
直到周杰倫唱完最後一首歌。
周杰倫唱咗廿幾首歌，偏偏冇唱《愛在西元前》。
散場既時候，我望住林若妍耷哂頭好失望果個樣，我個心好痛。
我唔知道點解佢對呢首歌咁執著，但係我覺得佢對周杰倫有一種近乎崇拜既感情。
因為太夜既關係，我又有藉口送佢返屋企。
一路上我講哂呢十幾年黎聽過既笑話，希望佢可以笑返。
「係呢，最後果首歌叫咩名？」原諒我啦，我只係聽咗佢兩個幾月咋。
「《軌跡》，收錄係《尋找周杰倫》果隻碟，下次借比你聽。」
「不過其實佢咬字真係唔太清，我都聽唔清楚佢唱乜。」
「行開啦，會唔會係你既普通話有待改善咋？」又黎喇，似笑非笑。
終於返到佢屋企樓下，我先醒起袋入面果排朱古力。
究竟溶咗未呢？仲食唔食得呢？我應該依家比佢，定係暗啞底自己食咗佢呢？
「張浩賢，多謝你今晚陪我睇演唱會呀。」林若妍微微一笑。
見到佢笑得咁甜，我鼓起勇氣拎咗排朱古力出黎。
「個演唱會睇咗咁耐，我以為你會肚餓，所以事先買比你醫肚…」我有啲想搵窿捐。
林若妍係我手上接過朱古力，笑得好開心。
「其實我係中一果年先開始學彈琴。」莫非林若妍打算…
「因為周杰倫。」
「我聽完《范特西》之後一直好欣賞佢既才華，我知道佢彈琴好叻，所以我叫屋企人比我學彈琴。」
「我知道自己比其他人遲起步，所以我花好多時間去學琴。直至識咗蔡婉玲，仲有你同林逸峰，我既世界唔再只得音樂。」
「多謝你呀張浩賢。」
我冇出聲，耐心咁等林若妍將最後一個字講完。
「點解你連蔡婉玲都唔會講既事會同我講？」我問。
「我都唔知點解，係你身邊我好安心。好似果日你拖住我行出去冒險樂園咁，雖然唔知道你打算帶我去邊，但係我從來都冇擔心過。我覺得如果係你，應該會明白我。」林若妍又耷低頭。
「咁我地以後無論事無大小都同對方分享，好唔好？」久違喇，打蛇隨棍上。
林若妍笑住咁點頭，然後同我揮手道別。
我正式宣佈，林若妍一直等待緊既果個知音人就係我！