《我老婆教我追女仔》: 第十四章
「點呀?今日個show好睇嘛?」經小惠開解之後，我放下心理包袱，跟Fiona聊起來。
「好呀！好精彩呀！」Fiona的聲音聽起來還是很興奮。
「係呀?好睇咪好囉。」
「可惜得兩張飛啦......」她好像覺得很可惜。
「今次去唔到咪下次囉。嗯...或者我哋去做其他嘢都得㗎。」
「嗯?例如呢?」
「例如行山囉，你有無興趣呀?」
「都有㗎，幾時呀?」
「你幾時去完旅行返嚟先?」
「嗯...下個禮拜四。」
「咁下個禮拜六好唔好呀?」
「好呀！......剩係我哋兩個?」Fiona疑惑的問我。
「係呀，有咩問題呀?」
「小惠唔去咩?」
小惠?小惠當然不會去壞我好事。
「佢唔鐘意行山㗎，唔駛理佢，我哋兩個自己去啦。」
「係呀......」怎麼?你很想小惠跟來做電燈泡嗎?
「係喎，你去旅行要買手信俾我喎！」我拉開了話題。
「嘻！你想要咩手信先?」
「嗯......等我諗下法國有咩出名先......聽聞法國啲女仔都幾靚喎，帶個返嚟俾我呀唔該。」
「嘻......點帶俾你呀?唔可以寄艙喎！」
「咁呀......?其實你送咩比我我都鐘意㗎，所以無所謂啦~」
「係呀?咁我要諗吓先，你比定個地址我呀，我可以寄俾你。」
「好呀。」然後我將我的地址告訴了她。
「得閒send啲相俾我睇喎。」
「好呀！下星期六見！拜拜~」
「玩得開心啲啦！拜拜~」
接下來的幾天，我不時收到Fiona發來的相片，有去巴黎鐵塔的相片，有去凱旋門的相片，當然少不了是與羅浮宮的合照。我在這個復活節假期也沒有閒著，努力的替學生補習，賺取追Fiona的本錢。沒辦法，草根就是這樣的了。小惠嗎?她說要回去未來一趟，假期完了才回來。至於回去幹甚麼，我就不知道了。
星期日的下午，我剛替一個學生補完習，正在回宿舍的路上，剛走到又一城，電話響了起來。
嗯?Fiona發訊息給我。
「我而家喺香榭麗舍大道一間有百幾年歷史嘅coffee shop度，呢度嘅咖啡特別香濃，真係別有風味^_^」然後附上一張她坐在木桌前，手中捧著紅色咖啡杯微笑的照片，背景是裝潢樸實的老店。
啊！真好！如果可以跟她一起在法國喝咖啡就好了......
我轉念一想，走到商場內的連鎖咖啡店，買了杯咖啡坐下來，拍了張照片發給Fiona。
「我而家喺地球另一邊，同你一齊享受呢個咖啡時光~」我發覺對著喜歡的人，本來多做作的對白也不覺兀突了。
「嘻~咁我哋飲杯啦，cheers~」
「cheers~」
我和Fiona聊著聊著，不知道過了多久，我的眼角看到了一個熟悉的身影在遠方走過。
小惠?她不是回去未來了嗎?怎麼這麼快就回來了?
我跟Fiona結束了對話，想走過去跟小惠打招呼，不料她卻走得甚快，轉眼已經走到了下一層。
我馬上跟了上去，在她消失在我的眼皮子下之前，我看到她走進了超級市場。
我跟了進去，因為範圍很大，我來回轉了幾圏也找不到她，正當我想離開時，赫然見到小惠在前方轉角處走過來。
「嗨！小惠。」我向她打招呼。
她看到我一臉愕然，有點不知所措。
我邊走向她邊道﹕「你唔係返咗去咩?咁早返嚟嘅?」
這時候我背後傳來一把中年女士的聲音﹕「小惠?你喺邊呀?」我向後一望，那位女士正好望過來﹕「女呀，原來你喺度，過嚟幫媽咪睇吓......」
我突然感到手上傳來一股拉力，在我還未搞清楚發生甚麼事，小惠已經拉著我跑了出去。
「喂...喂......小惠...做...做咩呀?......」我茫然跟著她極速狂奔。
「唔...唔好問住...我哋快啲走咗先......」小惠拉著我繼續奔逃。
終於我們從其中一個地鐵出口跑到了地面，我跟小惠一同停下來喘著氣。
「嗄...嗄...做乜突然拉住我係咁走呀......」我喘著氣問小惠。
小惠因為心跳加速而滿臉通紅，喘著氣道﹕「嗄...嗄...嗄...嗄......頭...頭先...好危險呀......」
我一臉問號﹕「吓?咩呀?有咩危險呀?頭先嗰個女人好似......」
小惠搶道﹕「嗰個...嗰個係時空巡警嚟㗎，佢...佢係嚟捉我返去㗎！」
我還是一頭霧水﹕「時空巡警?坐住時光機去捉啲時空罪犯嗰啲呀?」怎麼跟叮噹裏的一樣?
小惠點點頭﹕「咪...咪就係佢哋囉......」
我發現有點不對勁﹕「但係頭先嗰個女人，佢叫你做『女』喎，佢唔係你媽咪咩?」
小惠眼睛骨溜溜一轉，解釋道﹕「我哋成家人喺呢個時候都唔喺香港，我媽咪又點會喺度喎......」她頓了頓，又道﹕「佢哋會偽裝成熟人，等你放低戒心，咁樣容易捉啲嘛。」
我心想剛才的女人雖然看起來沒甚麼攻擊力，但可能真的如小惠所說偽裝成她媽媽來捉她的。
我還有一個疑問﹕「咁佢做咩要嚟捉你呀?你犯咗法呀?」
小惠結結巴巴的﹕「可...可能係我...我用時光機用得太頻密啩?」
我奇道﹕「時光機有限使用次數㗎?」
「有...有㗎，不...不過我唔係好記得限用幾多次啦......」
我有點擔心﹕「咁你會唔會比人捉去坐監㗎?」
小惠鬆了一口氣﹕「坐監就唔會，但要罰錢囉。」
我鬆了一口氣﹕「哦，咁小事咋......咁佢哋都要化哂妝嚟捉你呀?」
小惠道﹕「佢哋盡責呀嘛！」
奇怪的時空巡警，吃飽了撐著沒事做嗎?
「咁你而家仲駛唔駛返去呀?」
小惠想了想﹕「唔駛啦，不過我仲有啲嘢做，呢幾日都唔返Hall住。」
我奇道﹕「咁你呢幾日住邊呀?」據我所知她應該只有宿舍這個落腳點。
「我...我呢幾日住酒店......」
「有Hall唔住專登去住酒店?你發咗達呀?」小惠也未免太富貴了吧?
「你理我啫！又唔係用你啲錢！」小惠轉身就走。
說的也是。......等等...她用的錢不會就是未來的我的錢吧?小惠！
我轉過頭去，小惠已經在我眼前消失了。
「仔！你有掛號信喎，放咗喺你書枱上面。」我回家時媽跟我說。
「哦，唔該。」我走到房中，拿起放在書桌上的包裹。
甚麼東西?要寄掛號信來。
我拿著沉甸甸的一包東西，看到了上面的郵票和郵戳。
法文?Fiona寄來的?
我馬上拆開了包裹，只見裏面有一個信封和一包咖啡豆。
信封面用秀麗的筆跡寫著﹕To﹕ Sam
我認出了字跡，沒錯，是Fiona寄來的。
我興奮的打開信封，裏面只有一張照片。
鏡頭下的正是Fiona，她坐在路邊的咖啡店，悠閒的呷著咖啡望著遠方。紅撲撲的臉，被斜陽映照得泛著金光，髮絲被微風拂起飄盪在半空。
很棒的照片！景色美！構圖美！人更美！
我看著照片中的Fiona看得著迷，好一會兒，我才發現Fiona在照片背面寫了字。
Sam，法國真的很美！每個地方名勝都像藝術品一樣！嘻...我快要捨不得回香港了......
就如這張照片一樣，我每天都會到咖啡店喝杯咖啡，感受一下這裏的氣氛，很羨慕吧？嘿嘿......有機會真的很想跟你一起在這裏喝一杯啊！
現在先送上我在這裏喝到最好的咖啡豆，分享一下我嘗到的味道，香港見~^_^
我拿起咖啡豆，放到鼻端深深吸了一下，隨著淡淡的咖啡豆香味，幻想著與Fiona在香榭麗舍大道邊喝咖啡，邊談天說地的情景。
日出日落之間，已經來到和Fiona相約行山的星期六。
「我哋今日行邊度呀？大東山呀？」Fiona離開東涌地鐵站時問我。
「唔係大東山，我哋今日行個簡單啲嘅，我哋搭360上昂坪，再行昂坪棧道返嚟。」
「咦？呢條路線我想去行好耐啦！又搵唔到人陪我...」她頓了頓，又道﹕「聽聞呢條棧道係起360嗰陣比騾仔運嘢上去喎。」
我笑道﹕「係呀，一陣行行吓我行唔郁就要勞煩你呢隻騾仔將我運返落山。」說罷我作勢想跳上Fiona的背脊。
Fiona笑著避開﹕「呀！走開！由得你留喺山上面啦！」
我扁扁嘴﹕「嗚...乜你咁殘忍㗎......」
說說笑笑，我們已經來到了纜車站。
「你有無坐過呀？」我問Fiona。
Fiona微笑道﹕「無呀！你呢？」
「我都無喎......呀，我聽聞好似要同其他人搭枱㗎...」
「搭枱?」Fiona不明所以。
我解釋道﹕「因為個車廂可以坐十幾人，除非無人排隊啦，如果唔係都要同陌生人一齊坐。」
「噢...係呀......」Fiona的表情好像有點可惜。
我心裏祈求著纜車站沒有人，好讓我和Fiona能二人獨處一個車廂。
我期待的結果，終於也沒有出現。纜車站雖然人不多，但我們還是要和另一個家庭共乘。
「咦?！」我剛走進車廂，看見了認識的人，驚訝得張大了口。
Fiona同樣驚訝得合不攏嘴，呆看著車廂裏的人。
「咦？又係你哋呀？哈哈！又會咁啱嘅？」車廂裏的大叔跟我們打招呼，更特別給我打了一個眼色。
不是別人，這個大叔正是上次在濕地公園遇到的那個。
我跟Fiona一起坐下，然後我笑道﹕「係喎！你哋去睇大佛呀？」我見他帶著一個中年女士，還有兩個五、六歲的小女孩坐在另一邊看著窗外的風景，該不會是行山吧。
大叔笑道﹕「我帶我老婆，同兩個孫女去睇吓大佛，食吓齋囉。咁你哋呢？後生仔無理由上去大佛度拍拖㗎？」
Fiona聽到「拍拖」後雙頰緋紅，連忙搖手道﹕「我...我哋唔係......」
大叔搶道﹕「而家唔係啫，好快係啦！」
說得沒錯！
Fiona滿臉通紅，低下了頭沒有回應。
大叔的老婆看不過眼，對著大叔道﹕「好心你就唔好亂噏嘢啦！你睇下搞到人哋幾唔好意思。」
大叔反駁﹕「我邊有亂噏啫，呵~」然後望向我。
「吓...?」我尷尬非常，雖然我很想認同大叔的說話，但這時候我卻不知道可以說甚麼。
大叔的老婆友善的道﹕「你哋唔駛理佢㗎。」
我道﹕「講咗咁耐都未介紹自己，我叫做Sam呀。」然後我指一指Fiona﹕「佢係...Fiona。」「我女朋友」四個字給我吞回肚子裏。
大叔愉快道﹕「你哋叫我明叔啦，呢個我老婆。」
我們齊聲道﹕「明叔明嬸你好。」
明叔繼續道﹕「呢兩隻馬騮係我哋孫女，你兩個快啲過嚟同哥哥姐姐say hello啦！」他朝兩個小女孩招手。
兩個小女孩蹦蹦跳的走到我們面前，對Fiona叫了聲「姐姐」，然後向我叫了聲「叔叔」。
！?叔叔?我樣子很老嗎?
Fiona已經忍不住「咭」的一聲笑了出來。
明叔見我愕然的樣子，馬上教訓她倆﹕「叫哥哥呀，唔係叔叔！」
束馬尾，年紀較大的一個小女孩指著我，向明叔道﹕「爺爺，佢同二叔差唔多大咋嘛，咁叫叔叔咪啱囉。」
明嬸拉了兩個小女孩到身邊，摸著她們的頭，柔聲道﹕「二叔係稱呼嚟㗎，叫其他同你二叔差唔多大嘅就要叫哥哥，知唔知?」
四隻大眼睛水靈靈的看著明嬸，樣子看起來好像不太明白，但還是轉個頭向我道﹕「哥哥！」
Fiona微笑著對束馬尾的小女孩道﹕「妹妹你叫咩名呀?」
馬尾小女孩道﹕「我叫做馮芷晴，今年六歲。」
Fiona微笑道﹕「晴晴你好。」然後轉向鬢著孖辮的小女孩﹕「咁你呢?」
孖辮小女孩有點害羞，半邊身子躲在晴晴背後﹕「我...我......」
晴晴搶答﹕「佢叫馮芷瑩，係我妹妹呀！」然後牽著她的手。
Fiona笑道﹕「咁瑩瑩你幾多歲呀?」
瑩瑩怯生生的舉起四隻手指﹕「我...我今年四歲。」然後又躲在晴晴身後。
Fiona柔聲道﹕「瑩瑩你過嚟呀，姐姐請你食朱古力。」說罷從袋中拿了一顆朱古力遞給瑩瑩。
瑩瑩看了看朱古力，又看了看晴晴，晴晴將瑩瑩推到Fiona面前，對瑩瑩道﹕「要記得講多謝喎。」
瑩瑩點點頭，從Fiona手上接過朱古力，然後道﹕「多謝姐姐。」
Fiona愉快道﹕「晴晴好乖喎，識教妹妹，姐姐都請你食一粒。」說罷拿了一顆朱古力遞給晴晴。
晴晴接過後大聲道﹕「多謝姐姐。」然後就將朱古力放入口。
我對明叔笑道﹕「你兩個孫女都好乖喎！」
明叔洋洋得意﹕「緊係啦！係我湊大㗎嘛！」
明嬸白了他一眼﹕「唓！你有湊過咩?你剩係同佢哋玩咋嘛！」
明叔馬上陪笑道﹕「係嘅係嘅，係老婆你湊嘅......」
我看著明叔怕老婆的樣子，心裏暗暗好笑。
「呀係呢，你哋上昂坪真係去睇大佛呀?」明叔拉開了話題。
「我哋諗住去行山呀。」我回答。
「昂坪棧道呀?」
「係呀。」
「咁你哋要小心啲喎，今朝東涌有陣過雲雨，呢排又潮濕，山路可能會跣。」明叔提醒我們。
「哦......」我應著，然後看了看天色，自然自語道﹕「希望一陣唔會落雨啦......」只見天空灰濛濛一片。
此時，晴晴和瑩瑩坐在Fiona身旁，貼著玻璃窗看著窗外的景色，不時指東指西問這問那，Fiona微笑著一一解答。
「Fiona，不如我同你哋影張相呀！」我突然很想拍下Fiona這個樣子。
「好呀！」Fiona甜甜笑道。然後將兩姊妹拉到身旁坐好。
兩姊妹一左一右親密的挽著Fiona，然後露出燦爛的笑容。
「一、二、三，笑」
咔喳~
明叔見狀，馬上道﹕「不如我同你兩個影張啦。」
最期待的畫面終於出現了！明叔，多謝你！
「好呀！唔該你！」我大聲應道，將電話遞給明叔，然後馬上坐到Fiona身旁。
正當我等待明叔的「進一步」指示時，晴晴和瑩瑩坐到我倆旁邊，嚷道﹕「我哋又要影！我哋又要影！」
明叔道﹕「你兩個返過嚟先，同哥哥姐姐影完先同你哋影。」
晴晴搖著Fiona的右臂，瑩瑩爬到我腿上去搖Fiona的左臂，不斷嚷道﹕「我哋又要影！我哋又要影！」
Fiona抿嘴一笑﹕「好啦好啦，一齊影啦~」
「好嘢！」兩隻小傢伙拍手喜道。
Fiona微笑道﹕「好啦，瑩瑩你坐喺哥哥度，好唔好?」瑩瑩點了點頭。
「咁晴晴你坐喺我度啦~」說罷抱起晴晴坐在大腿上。
噢...真羨慕晴晴......
「哥哥，望鏡頭啦。」瑩瑩抬起頭，瞪大眼睛看著我。
「哦..哦......」我扶著瑩瑩坐好，轉個頭望向鏡頭。
「嚟啦，一、二、三，笑」
咔喳~
明叔將電話遞給回給我。
「比我睇！比我睇！」兩隻小魔怪伸手來搶。
雙拳難敵四手，我馬上投降﹕「唔駛搶唔駛搶，我比你哋睇......」然後打開了照片讓大家一起看。
照片中的我們笑得燦爛自然，就像是一家人一樣。
晴晴突然從她的小手袋拿出電話，道﹕「哥哥姐姐你哋睇下。」
晴晴打開了電話裏頭的一張照片，照片上一男一女抱著晴晴瑩瑩，輪廓跟她倆很像，大家都笑得很燦爛。
瑩瑩指著照片裏的男女叫道﹕「爹地媽咪！」
我看著兩張照片，感覺上我和Fiona就像成了她倆的父母。我不由自主轉過頭看了Fiona一眼，發現她正好跟我的眼神接上，然後又各自臉紅紅的避開了。
Fiona在跟我想著同一件事情嗎?
我們說說笑笑，半小時的車程轉眼就過。
下車後，我們一同走到昂坪市集。
「好啦，咁我哋有機會再見啦。」明叔道。
我笑道﹕「我哋咁有緣，一定會再見嘅！」
明叔笑道﹕「哈！咁又係。」然後拍著我的肩膊﹕「咁你加油啦！」然後瞄一瞄Fiona。
我會意，笑道﹕「一定一定！」
明叔對晴晴瑩瑩道﹕「同哥哥姐姐講拜拜啦~」
晴晴瑩瑩向我們揮手﹕「拜拜~」
「拜拜~」我和Fiona笑著跟他們揮手道別。
跟他們別過後，我們朝著棧道出發。
我們沿著棧道隨意的走著，看見美麗的景色就跓足欣賞、拍照，累了就坐下休息、談天。不知不覺，我們已經走了兩個多小時。
我們坐在路旁的石塊上休息，我感到一陣涼風吹來，抬頭看看天，見天色有點轉黑，擔心會下起雨來，於是我道﹕「Fiona，個天好似想落雨，我諗我哋要行快啲啦！」
Fiona看了看天色，道﹕「我哋仲有幾耐到呀？」
我看了看手錶，我們走了兩個多小時，但因為我們沿途走走停停，又拍照又休息甚麼的，現在大概只是走了一半多一點而已。
我道﹕「我諗最少都仲要行個半鐘呀...」
Fiona樣子有點擔心﹕「係呀......」
我安慰她﹕「唔駛驚喎，我哋行快小小就得啦，天黑之前一定落到山。」
Fiona微笑著點頭﹕「嗯！」
我們開始加快了步伐，就算看見美麗的景色，也只是匆匆看了幾眼就算。
「嘩！Sam，我哋到咗頭先喺纜車上面望到嗰度呀！」Fiona喜道。
我們站在一個山頭上，纜車的支架聳立在我們旁邊，頭頂上來來回回不斷有纜車經過。
我們滿有興致的跟纜車上的人揮手，纜車上的人看見我們，亦揮著手打招呼。
Fiona轉個頭來笑道﹕「咁樣睇番上去個感覺好得意呀！」
我笑著回應﹕「係呀......」
我還沒說完，感到有水滴到了臉上，我用手抹了一下，又感到有水滴下來，我抬頭看天，隱隱約約看見有些水點從天而降。
我苦笑道﹕「開始落雨啦......」
Fiona抹了抹臉上的水珠，急道﹕「咁我哋要行快啲啦！」說罷一馬當先走在前頭，我見狀馬上跟了上去。
由於急著趕路，我們都沒有怎麼談話，只是默默的走呀走，幸好雨勢一直很微弱，我們還不致於濕透。
我看看周圍的景色，喊道﹕「我諗我哋仲有半個鐘就行完啦！」
Fiona在前面大聲應道﹕「係？好嘢！」言畢她加快了腳下的步速。
看見Fiona快速走下梯級，我趕緊的跟了上去。說時遲，那時快，我聽見Fiona一聲「哎呀！」我已經看見Fiona倒在前面的梯級下。
我大驚，馬上走過去問Fiona﹕「你無事呀嘛？」
Fiona面露痛楚﹕「隻右腳...有啲痛......」
我看了一下，發覺沒有表面傷痕，於是我問﹕「右腳邊度痛？」
Fiona痛苦道﹕「腳腕......」
我聽後皺起了眉頭﹕「我幫你除咗隻鞋睇吓先啦...」
Fiona點了點頭，於是我單膝跪在她身前，輕輕的將她的右腿放在我的膝上，然後小心翼翼的將鞋子脫下來。
Fiona閉上了眼皺著眉，忍著鞋子碰觸到腳踝帶來的痛楚。
我將鞋子脫下來後，看見襪子包著的腳踝處腫起了一塊，然後我再慢慢將襪子脫下。
「...呀...」Fiona悶哼著，看來她痛得很厲害。
只見她的右腳踝處，紅紅腫腫的像藏了一隻雞蛋在裏面，我看得心痛不已。
「你拗柴呀...腫得好犀利呀......」我憐惜道。
Fiona沒有說話，只見她扶著梯級，想慢慢的站起來，但右腳剛碰到地面，就忍不住痛得叫起來。
「呀！......」然後又失平衡跌倒。
我在她跌坐地上之前扶著她，讓她輕輕坐在梯級上。
「嗚......點算呀？」Fiona語帶哭音。
我看了看手錶，大概還有一個小時太陽就會下山。報警嗎？我看最快也要大半個小時才來到，然後還要花半個小時走出去。若果沒有下雨，報警倒是好辦法，但雨點好像越來越密了，在這裏等待半個小時，就算Fiona的腿沒問題，我倆都會被淋得感冒了。
看來只能這樣了......
我將Fiona的鞋襪放進背囊裏，然後將背囊掛在胸前，再蹲在Fiona身前。
我道﹕「上嚟啦，我孭你落山。」
Fiona﹕「但...但係...你要孭住我行成半個鐘喎......」
我轉個頭捲起衣袖，勉強谷起手臂上的肌肉，笑道﹕「你睇我咁大隻就知我無問題啦！」
Fiona被我逗得笑了起來﹕「係啦！知你大隻啦！」
我笑道﹕「知就快啲上嚟啦，再講我哋變落湯雞啦！」我指了指從天而降的雨點。
Fiona沒有再說甚麼，雙手搭著我的肩膊，正準備騎上來。
我想起了一件事﹕「等等。」然後我脫下風衣，讓Fiona穿上身，再替她將帽子戴上。
準備完畢，我解釋道﹕「咁你就唔會淋濕啦！」
Fiona訝道﹕「咁你呢?」
我聳聳肩﹕「有你幫我擋住嘛~」
「但係都擋唔到個頭㗎！」
「淋一陣無嘢嘅，唔好講咁多啦，快啲上嚟啦！」
Fiona無奈，唯有騎了上來。
還好Fiona不是太重，我慢慢的站起來，道﹕「扶穩啦，火車要開啦！」
Fiona雙手輕輕搭著我的肩膊，笑道﹕「開車！」
我以比正常緩慢一點的步速走著，每逢下斜或者梯級時都會加倍小心，以防滑到。
走了大概二十分鐘，我開始有點喘氣，速度更明顯的慢了下來，畢竟我是揹著一個人走路。
Fiona聽到我的喘氣聲，擔心問道﹕「要唔要停低抖下先呀?」
我看了看雨勢，有點越來越大的趨勢，還是快點走下山吧。
我答道﹕「唔駛...我哋繼續行啦......」
還好現在每朝早也有去跑步，我的體力還是應付得來。
我續道﹕「不...不如你同我傾偈.....等我...無咁悶呀...」
於是Fiona道﹕「咁呀......係呢，你收到份手信未呀?」
「收...收到啦，張相影得...好靚呀！」
Fiona笑道﹕「我爹地幫我影㗎，我都覺得影得好所以專登曬比你㗎，當係名信片。」
刻意給我的嗎?那麼Gary是沒有的吧！嘿嘿！
我笑道﹕「嗄......得我一個有咋?...咁...咁我要搵相架鑲起佢啦！」這個倒不是說笑，我真的要將這張照片放進相架然後擺在書桌上，那麼無時無刻都能看著Fiona了！
Fiona好像窘道﹕「唔...唔係得你一個有呀，我爹地咪有囉......」頓了一頓，又道﹕「咁包咖啡豆呢?你有無沖過嚟飲呀?」
我搖搖頭﹕「...未呀......嗄...我無咖啡機......沖唔到嚟飲...不過我聞過...好香......」
Fiona語氣有點可惜﹕「係呀......」
我安慰她﹕「我諗...會有啲cafe，可以幫客人...沖佢哋自己帶嘅咖啡豆......嗄...」
Fiona愉快道﹕「係?咁下次我哋一齊去囉~」
我道﹕「好呀...」
Fiona又問﹕「係呢，放假咁耐你做咗啲咩呀?」
「...我...我呀?...我差...差唔多日日都去同人補習......我唔想...嗄...成日問呀爸呀媽攞錢......」這個時候裝孝順，裝上進是常識吧！當然我說的也是事實。
Fiona沒有回應我，我以為她聽不到，於是我稍為轉過頭道﹕「Fiona?」
Fiona應道﹕「吓?咩..咩呀?」
我正想說話，一個沒留神右腳一滑向前，差一下子就失去平衡跌倒。
「呀！」Fiona驚叫了一聲，手臂緊緊摟住了我的脖子。
我重新找到了平衡站好，問道﹕「你...你無嘢呀嘛?」
「無...無呀，你有無事呀?」Fiona呼了一口氣。
我頸側被Fiona的呼吸搔得癢癢的，有點尷尬道﹕「無事呀，咁我繼續行啦。」
「嗯。」
這時候Fiona繼續摟實了我的脖子，身子緊緊貼著我的背部，像是怕被我摔下來一樣。
我感到背部傳來柔軟的質感以及Fiona的體溫，令我有點心猿意馬。為免沉溺於幻想，令我滑倒第二次之前，我收攝了心神，專心走路。
還沒走出多少步，Fiona突然問我﹕「Sam呀，其實...你...你同小惠呢...係咪真係表哥表妹咁簡單呀?」
我心裏打了一個突﹕「吓?點...點解你突然間咁樣問嘅?」Fiona在懷疑甚麼?懷疑我跟小惠有甚麼嗎?
Fiona遲疑道﹕「其實呢......你係咪同小惠住埋同一間房呀?」
甚麼?你怎麼會知道的?樂言說的嗎?沒可能！小惠說的嗎?更加沒可能！現在怎麼辦?說謊?不說謊?說謊?不說謊?
我心念電轉，既然Fiona不知道為何知道了，我也沒法子瞞下去，還是老實交代吧，於是我道﹕「係...我係同小惠住埋同一間房，但...但係係有原因㗎......」我感到額頭涼風颯颯，是雨水還是冷汗?
我腦細胞高速運轉，馬上想了個藉口出來﹕「係...係咁嘅......小惠去外國讀書之前去...去過我屋企住過一排，嗰陣...嗰陣我同佢同我阿妹一間房，咁跟住佢嚟住Hall嗰陣又話...唔慣同...同陌生人一間房，係都要同樂言調房，咁啱樂言同Kitty又係情侣喎......咁咪調咗房...囉......」我越說越心虛，這番話能忽悠Fiona嗎?
我沒等Fiona反應過來，馬上續道﹕「我同小惠真係齋同房，你唔好誤會我哋會有啲咩喎！」其實我倒希望Fiona在吃小惠的醋，證明Fiona是有點喜歡我。
Fiona平靜道﹕「哦係呀，我都係八卦問下啫。」言下之意是沒有吃醋嗎?
我心裏暗暗失望。
只聽得Fiona又道﹕「不過呢...其實我睇得出，小惠佢係鐘意你。」
我又被Fiona嚇著，腳步不由自主的慢了下來，訝道﹕「點...點解你咁講呀?」
Fiona道﹕「女人嘅直覺囉，我覺得小惠望你嘅眼神係唔同啲。」
當然不同啦，小惠看著我時應該是把我當作了她老公。我試著解釋道﹕「咁...咁我係佢表...表哥嘛，望我嘅眼神...應該係會唔同啲嘅......」
我感到Fiona搖了搖頭，然後又道﹕「我睇得出...嗰種眼神，係對住鐘意嘅人先會流露出嚟。」她頓了頓，又道﹕「咁你呢?呀Sam...你鐘唔鐘意小惠呀?」
我嚇得又差點滑到，顫道﹕「緊...緊係無啦...我...我當佢係...細妹咋......」
這時候我心裏好像有另一把聲音問我﹕『你真的只是當小惠是朋友?一丁點兒也沒有喜歡她?』
我也不知道，雖然小惠沒有Fiona給我的那種心跳的感覺，但無疑小惠也十分吸引我，無論是身材還是樣貌，而且跟她相處很舒服，完全沒有和Fiona一起時有時會因沉默而出現的別扭。
但這是喜歡嗎?
我搖了搖頭，拋開心裏的胡思亂想，嘗試拉開話題﹕「Fiona，你可唔可以幫我抹走額頭啲水呀?啲水係咁滴落嚟我睇唔到路啦。」
「哦。」Fiona應了聲，然後拿出紙巾溫柔的幫我印走額上的水點。
接著我聽到背後傳來窸窸窣窣的聲音，之後我感到頭上罩上了風衣的帽子。
「咦?」我發出疑問的聲音。
只聽見Fiona溫柔的聲音在我耳邊響起﹕「你個頭比雨水淋濕哂啦，我咪除咗件褸粒住你個頭囉。」
我道﹕「咁你咪遮唔哂囉?」
Fiona將整件風衣罩住我倆，有點難為情道﹕「咁你孭住我㗎嘛，我...我攬實啲，件褸咪可以遮埋我囉.....」說罷繞著我脖子的雙手緊了一緊，胸脯緊緊貼著我的背脊，再將頭枕在我的肩膊上。
還好這件風衣比較大，不然一定會被我倆撐破。
這樣親密的身體接觸，讓我彷彿能感到Fiona傳來的心跳。
我面紅耳赤道﹕「咁...咁我哋行啦......」
「嗯。」Fiona的回應輕輕拂在我的脖子上，讓我怪難受的。
我壓下身體的燥動不安繼續前進。在剩餘的路程裏，我和Fiona沒有再談甚麼，只是默默的走著。雖然身體很累，但我卻很享受這段旅程，希望可以一直揹著Fiona走下去。
我刻意調慢了步伐，但還只是花了不到一小時就走完這條棧道，天色剛好暗下來。
********************************************************************************************************************
嗄...嗄...嗄...嗄...
耳邊一直傳來呀Sam有節奏的呼吸聲，我從後看著他的側臉，發覺他這刻很有魅力，於是我又緊緊的摟實了他。
很溫暖...很安全...很幸福...可以就這樣一直被他揹著嗎?
不知道過了多久，聽到呀Sam長呼一口氣﹕「呼......終於行完啦......」
我不禁有點失落，但我知道到他現在應該很疲累，於是我道﹕「快啲去馬路睇下截唔截到的士啦！」
這時候呀Sam沉默了一會，然後又尷尬道﹕「其實我帶唔夠錢，應該唔夠搭的士......」
我想起我帶的錢應該足夠，於是我道﹕「我......」突然又想起了若果不能乘的士，呀Sam就要慢慢揹著我回東涌，我可捨不得現在就離開他的背脊，於是我馬上改口﹕「我......其實都帶唔夠錢，我諗要你孭我返東涌啦......」
我充滿歉意道﹕「對唔住呀...你係咪好攰呀?」我在為我的自私道歉。
呀Sam的聲音精神奕奕﹕「唔係呀，孭到你返屋企都得呀！」
我被他逗得笑了起來﹕「係咪㗎?我真係要你孭我返屋企個喎~」我倒希望這是真的。
他笑道﹕「其實而家都無咩分別啦，我都要孭住你搭地鐵返去啦。」
我有點不好意思﹕「sorry呀，你咁攰仲要你一直孭住我......」
Sam笑道﹕「傻啦，咁你受咗傷嘛，想多謝我就一陣請我食飯，我而家好鬼肚餓呀！」
我笑著點點頭﹕「嗯！」
呀Sam背著我走著走著，過了一會，他道﹕「嗰邊係逸東商場呀，我哋去睇下有無跌打舖，順便食埋飯啦。」
「哦，好呀。」
呀Sam背著我走進商場，將我放在一間茶餐廳裏面，然後對我說﹕「你坐喺度唔好四圍走呀，我去睇下有無跌打舖，好快返嚟。一係你叫住嘢食先啦。」說罷已經一溜煙的走了出去。
我對著他的背影喊道﹕「你食啲咩呀?」
他頭也不回﹕「你嗌咩我食咩啦。」說罷已經不見了人影。
我隨便點了幾個小菜，靜待他回來。不一會，只見他喘著氣跑進來。
呀Sam拿起桌上的杯子，喝了一大口道﹕「我搵唔到跌打舖呀，啲私家醫生又閂哂門，我剩係喺藥房買咗枝跌打酒咋，一陣食完飯我同你捽啦。」
我臉紅了一下，答道﹕「哦......」沒想到這次輪到他替我塗跌打酒。
吃過飯後，他揹著我走到附近一個小公園，將我放在椅子上然後坐在我旁邊。
他輕輕拿起我的右腿放到他的大腿上，再倒了點跌打酒在手心搓著。
Sam皺眉道﹕「好似又腫過頭先啦......」
然後他又倒了點跌打酒在傷處上道﹕「我而家捽啦，你痛就出聲啦。」
我看著他輕輕揉著腳踝，一絲絲的痛楚就一直傳了上來。
我咬著唇，忍著痛。呀Sam看見我很痛的樣子，關心的問道﹕「係咪好痛呀?我再細力啲吖。」
我看著他一臉膽心的樣子，心裏暖暖的很受用，痛楚頓時少了一點，我搖搖頭道﹕「你捽啦，唔駛就住。」
結果Sam還是很溫柔的替我揉著，過了好一會兒，我好像感到好了一點，於是道﹕「我覺得無咁痛啦，之後我返屋企自己捽啦。」
Sam應道﹕「哦，咁我幫你用繃帶包住佢先啦。」說罷用繃帶幫我固定腳踝。
包紮妥當，他去公廁洗手，然後回來又揹起我。
「我知道嗰邊有巴士返東涌呀，我哋過去囉。」Sam邊走邊道。
「哦。」我現在唯一要做的事，只是緊緊摟著Sam就可以了。
********************************************************************************************************************
還好Fiona也沒有帶足夠的錢，不然剛走出棧道就乘的士回九龍塘的話，可沒有幫Fiona揉腳這種好康。我想起能一直揹著Fiona，又能替她塗跌打酒，我就打從心底裏笑出來。
「往香港嘅列車即將到達，請勿靠近車門。」地鐵的廣播響起。
「有車啦，你可以抖下啦。」Fiona柔聲道。
列車到站，我輕輕放下Fiona，然後一屁股癱軟在她旁邊。
Fiona柔聲道﹕「係咪好攰呀?我幫你按摩吓隻手啦。」然後在我的手臂肩膊等位置輕輕按摩著。
Fiona按起來我才感到雙臂酸酸的，心想明天一定雙臂無力。
「乞嚏！乞嚏！」突然鼻癢癢的連續打了兩個噴嚏。
Fiona擔心道﹕「你係咪比雨淋親呀?鼻水都流出嚟啦！」然後馬上拿出紙巾遞給我。
我接過紙巾抹著鼻子，道﹕「個鼻突然間有啲痕啫，無嘢嘅。」
抹了兩下鼻子，又好像沒甚麼事了。
轉過荃灣線，再轉過觀塘線，好不容易終於回到九龍塘。
我揹著Fiona出了地鐵站，走著走著又到了往常分手的地方。
Fiona馬上道﹕「你喺度放低我啦，我自己返去得啦。」
「你咁樣點行返去呀?我孭到去你屋企門口啦。」說罷我已經沿斜路向下走去。
Fiona急道﹕「Sam！Sam！......你都係放低我啦，我真係自己返去得啦！」
我停了下來，柔聲道﹕「Fiona，其實我知你住又一村㗎啦。」然後又繼續走。
Fiona有點愕然﹕「呀Sam我......」
我微笑道﹕「其實呢，屋企係點都同你個人無關係㗎，唔通我住公屋就要自卑，唔敢去同你做朋友咩?」我頓了頓，停下了腳步，裝作委屈道﹕「除非你唔想啦......」
Fiona急道﹕「唔...唔係呀......」
我笑道﹕「唔係咪得囉，咁我以後可以送你返屋企啦?」然後又繼續走。
Fiona甜甜笑道﹕「咁我就準你送到我去屋企門口啦~」
走到了一個岔路，我問Fiona﹕「直行定轉左呀?」
「轉左。」
我走向左邊那條路，續道﹕「你知唔知呀，我之前以為你屋企門口養咗隻老虎，所以先唔俾我送你返屋企咋。」
Fiona笑道﹕「都係㗎，我養咗隻狗，佢見到陌生人就會吠㗎啦。」
我笑道﹕「吠啫，唔咬就得啦。」
Fiona道﹕「到喇。」
我站在一棟只有兩層的平房前，心裏想著不知裏面有多大。
Fiona伸手按著閘外的門鈴，道﹕「我返嚟啦﹐開門比我啦。」
門口的對講機傳來一把少女的聲音﹕「家姐?你無帶鎖匙咩?」
Fiona道﹕「我唔方便開門呀，你幫我開吖。」
「哦，等等。」然後鐵閘傳來解鎖的聲音。
我輕輕推開鐵閘走了進去，只見是一個跟我家差不多大的花園。花園中栽種著不少植物，中間還有一把太陽傘，太陽傘下擺有數張滕椅，還有一張茶几，看來像是喝下午茶用的。
就在我還在驚嘆時，大門打開了，一張跟Fiona有點像的臉探了出來。那個少女看見了我，表情有點驚訝，然後看見我背上的Fiona，馬上露出了曖昧的神色。
一隻松鼠狗突然出現在門口，朝我吠了兩聲，又走過來在我的腳邊嗅了幾下，然後抬頭看著Fiona，最後搖著尾巴圍著我團團轉。
我笑著跟Fiona道﹕「佢好似認得你喎。」
Fiona笑道﹕「係呀，佢好醒㗎！」
我走到門口慢慢放下Fiona，然後有點尷尬的對著少女道﹕「你...你好呀......」
Fiona單腳站著，用手扶著我，有點靦腆對少女道﹕「嘉寶，呢位係我朋友Samuel呀，我拗柴所以佢送我返嚟呀。」
叫嘉寶的少女曖昧笑道﹕「哦~『朋友』呀?...Samuel你好呀，我係Fiona個妹呀，你叫我嘉寶得啦。」
聽她強調「朋友」二字，我們尷尬得不得了，我滿面通紅道﹕「呀...嘉寶，你...你好呀......Fiona佢拗柴呀，所以麻煩你照顧吓佢......」然後我將背囊裏的鞋襪還給Fiona，再將跌打酒遞給嘉寶。
嘉寶接過跌打酒，又扶著Fiona，笑道﹕「Samuel不如你入嚟飲杯咖啡先走啦，仲可以幫家姐捽跌打酒嘛，我都唔識捽。」
甚麼?現在?現在很晚了吧?
Fiona耳根發紅嗔道﹕「嘉寶！」
嘉寶笑笑口﹕「唔緊要啦，反正爹地媽咪出咗trip又唔喺屋企。」
我不知所措﹕「唔...唔好啦...而家咁夜，而且Fiona都要休息啦...」
Fiona忙不迭的道﹕「係呀，呀Sam你都好攰啦，你早啲返去休息啦！」
嘉寶似笑非笑的看著我倆﹕「哦咁呀...咁『下次』先啦，拜拜~」
我依依不捨的看了看Fiona，跟她揮了揮手﹕「拜拜~」
Fiona微笑著跟我揮手道別，轉過頭瞪著嘉寶，然後就關上了門。
我呼了一口氣，轉過身離開。
當我走到又一城，看到遠處有兩個熟悉的身影，是呀Roy和Mandy，他們好像言談甚歡。
Roy跟Mandy?他們搭上了嗎?
想起上次呀Roy的說話，我有點擔心Mandy，正當我考慮著要不要跟Fiona商量一下時，發現他倆身後不遠處有一個鬼鬼崇崇的身影跟蹤著，而那個人竟然是樂言！
樂言跟著他們幹甚麼?
我想著想著，鼻子陡然一癢又打了個大噴嚏。
當我回過神來，他們已經全部消失了。
怎麼走得這麼快，你們都會瞬間轉移嗎?
鼻水又流出來了，我抹抹鼻，難道真的感冒了?
********************************************************************************************************************
我關上了門，還未呼出一口氣，嘉寶就纏著我﹕「家姐家姐！係咪男朋友呀?都ok吖，斯斯文文怕怕醜醜咁，同你都好襯呀！」她扶著我慢慢走到沙發讓我坐下，又道﹕「你哋拖手未呀?唔.....頭先都已經孭返嚟啦，點會未拖過手喎。咁你哋kiss咗未呀?」然後一臉期待的看著我。
我大窘，滿臉通紅道﹕「咩...咩kiss啫！我...我哋係朋...朋友咋嘛，無...無拖手，無kiss過呀！」
嘉寶疑惑道﹕「真係無?」
我尷尬道﹕「咁...咁佢係我跳舞partner，咁緊係有拖過手啦......但...但係我哋無kiss過囉......」
嘉寶一臉古惑看著我﹕「咁家姐你鐘唔鐘意佢啫?」
我面紅耳赤，別過面道﹕「唔...唔知呀！」
嘉寶繼續逼問我﹕「咁你鐘意呢個Samuel多啲呀?定係上次揸車送你返嚟嗰個呀?」
我瞪大雙眼看著她，訝道﹕「你又知?」
她聳聳肩﹕「嗰日咁啱我喺二樓見到你落車。」然後又用手肘撞我﹕「唔好拉開話題，你鐘意邊個多啲啫?」
我搖頭道﹕「嗰個真係朋友，嗰日我同佢係......」
嘉寶沒等我說完，已經歡呼起來﹕「哈哈！咁即係Samuel唔係『朋友』咁簡單啦！」說罷蹦蹦跳的跑上二樓，消失前對我大喊﹕「放心啦，我唔會話比爹地媽咪知......住㗎！」
我嗔道﹕「嘉寶！......」然後頽然躺在沙發上。
我又坐起來，拆開了繃帶，塗了點跌打酒輕輕揉著，不期然想起呀Sam幫我揉著時那個溫柔的樣子，又想起他揹著我那個一臉堅毅的樣子，我不禁面紅耳赤。
今天我忍不住問了他和小惠的事，他果然和小惠是住在同一個房間，老實說我真的很介意，不過他說對小惠只是像對妹妹一樣，倒不像說謊。但小惠真的喜歡他啊，他會怎麼做呢?
********************************************************************************************************************