男人唔可以窮: 5
我喺620蚊呢個位渣左三手貨，之後業仔叫我打比Jacky講聲，打比Jacky佢只係同我講信哂我就話做緊野收左線，我收左線之後有小小緊張，就周圍行，當然因為成間公司都有報價機，我除左屙屎之後都一定睇到個價。
行到去業仔個房，我走左去窗邊發呆，望望下，見到力寶大廈後面有好光既野，我先醒起果個係喺添馬鑑搞緊既冬季繽紛嘉年華，幾個月前以娜睇過雜誌仲話好想去，唔知佢有冇去呢？
「正，隻金開始起步，唔好行開。」突然業仔同我講，我望望報價機，見到個金價好窄幅上落咁跳，620.3 620.5 620.2 620.1 619.9 619.5………
「正，油價上緊，有冇膽搏一搏？」業仔問
我：「下？點搏呀？」
業仔：「金價咁窄幅似係有大戶做野，美國果邊油價咁升法隻金冇可能唔跟，渣多幾手貨，而家同你之前果三手個價差唔多，見625既就平哂佢每手執佢五蚊金，但記得set止蝕。」
見625平哂佢？咁如果615我咪仆街？
章文：「業仔你估個個係你咩，你睇正哥渣左三手而家都震過貓王。」
業仔：「得啦正，你唔想就由佢。」
講完業仔就自己打電話落盤，我望住章文望住我既咀臉，心諗橫掂又唔係我錢，不做白不做，約哂合約比我打理，輸左又唔使上身，驚乜野？
我拎起個電話，打去盤房，唔知邊度黎既勇氣，我渣多七手貨，即係總共手上持有十手貨，而家個市升跌一蚊金，對Jacky個倉就有七千八佰蚊既上落，我set左止蝕價喺617.5度，即係如果跌到去呢個價，呢十手貨就會自動平倉。但就算做左止蝕，落十手貨對一個只有二十萬既倉黎講，係一個錯誤既做法。
但唔會有人鬧你，業仔仲話我夠膽。
再坐多一陣，個金價依然係窄幅上落，我忍唔住就去左屙尿，去左兩分鐘，行番入業仔房，業仔問我：
「正你set左617.5呀？自己睇緊小小。」
我望一望報價機，仆街點解跌左去617.8架？
望到個報價機個價我真係震一震，我手渣左十手貨，平均價係619.5，即係如果617.5個止蝕價真係到左，個倉就輸足兩蚊金，總並一萬五千六佰蚊，加埋十手既手續費兩千銀，就即係一萬七千六佰蚊，仆街我只係玩左幾個字就要冇差唔多一成？
我望住業仔個樣佢又好似冇乜野咁，我係佢果team，乜佢唔會為我一次輸個客一成資金而有反應既？
個金價一路喺617.7 8 7 8 7 8 咁行黎行去，業仔就一路細細聲講「唔好踩呀唔好踩呀唔好踩呀。」
還掂都set左價，佢一掂到就會平倉，我都打定輸數，攬住個頭趴左喺枱面，突然成間公司既人「嘩」一聲，我起身望一望，個金價真係好似業仔咁講升左上黎，我第一時間問業仔：
「有冇掂到我口價？」
業仔：「冇呀冇呀，我都話有機爆上黎架啦。」
跟住我睇住個金價由618一路升 619..619.5..620.6…621之後升到626，霎時間公司有人大叫收錢，亦都有人大叫走唔切，因為對某種冇乜錢既戶口黎講，一支陽蠟六七蚊咁打上黎，係非常有可能會爆倉。
升到626蚊，業仔拍拍我：
「正，平哂十手佢。」
「得！」我拿拿聲拎電話打去盤房平左十手佢，仲拎到個靚價係626.5，即係每手執七蚊金，每手貨賺左五千四佰六十蚊，十手貨就即係賺左五萬四千六佰蚊，而我自己就幾下手勢賺左二千蚊佣，我當時係開心到唔識點形容，個咀角好想好想笑出黎，但又唔好意思。
一次有甜頭，我就想即時黎多次，
「業仔點呀，咩位再渣？」我問
業仔放低電話再同我講：
「沽佢啦，我沽左喇。」
我：「下？啱啱先渣完咋喎。」
業仔：「回吐呀傻仔，由今朝到而家升左差唔多十蚊金，點都應該有小小回，你敢就自己落啦。」
章文：「屌你唔敢就唔好問啦。」
我諗左一陣都係信業仔，因為時間太急我冇理到章文講乜，我打去盤房即時沽多十手貨，沽完先發覺，個金價真係回左個幾，我個價比業仔個價差左接近一蚊。
章文：「一早信咪有靚價囉，而家做左傻仔喇。」
拎完個價我已經有小小唔順，因為覺得自己應該果斷小小，而家仲要比章文串多一下，度火唔知點解走出黎，又或者覺得自己而家有倉開始有成績，諗都唔諗就指住章文話：
「屌你老母我有我做野，關你撚事呀？」
我呢句屌得章文非常大聲，就連業仔都呆左一呆，章文聽到之後第一句係愕然，跟住先打算反擊：
「乜撚野呀？唔撚比講野呀？」
我：「屌你老母句句頂埋黎，九哥呀你？」
章文：「我係你上司，教你就應份，唔撚受教你就行人。」
我：「上你老母，我上大陸開倉果時你縮撚埋喺公司打飛機咋，柒頭！」
章文：「喂唔好句句老母，撩尻打呀？」
「收聲啦兩個！同一Team嘈乜呀，正，章文話哂係你上一級，公司度比番小小面佢。」業仔食左兩粒花生之後出聲。
我：「知喇。」
業仔：「章文你都係呀，收下把口啦仆街仔。」
「挑唔講野囉。」章文明顯好唔妥咁行左出房。
其實我夠膽屌章文，係因為入左公司咁多日，我發覺呢度係冇乜階級架構，除左基本四個Team頭同一堆老闆之外，其他所有人你根本可以唔使尊重。呢一行，你有倉就會有注目點，無論你個人幾醜樣幾猥瑣幾乞人憎都好，只要你有一個或以上既倉，就會有人黎奉承你、跪拜你，因為一來知道你黎緊果期糧係好有錢，二來都想喺你身上索下有冇其他客既料。
既然係咁，我又使乜驚章文？我連最難果樣開倉都自己上大陸搞掂左，戶口又係授權比我，唔通我屌佢兩句公司就會炒左我呀？
業仔比我既反應正正係我預期之內，呢一度係英雄地，只要你有倉，你就可以擁有自己既一片天地，甚至隻手遮天。
到時，你想得到既野，大部份都可以得到。
最後呢十手反手沽貨，我係嬴埋手續費平手咁走，行內我地叫呢種做法叫『轉身』，即係話你入市之後基本係要賺番果五毫子差價，大約每手再賺多三毫子打番和果兩佰蚊手續費就可以轉身，例如600蚊渣左貨，你去到600.8沽貨平倉，咁個戶口就啱啱好冇蝕錢而你又賺到手續費，呢種轉身做法係最多基本新手會做既模式，因為唔係個個有耐性同膽色去等幾蚊金執，多數嬴小小就唔夠膽等而走左去。
第一日，我總共做左五十五張單，賺埋既佣有一萬一千幾蚊。
收市三點半，我同可勇阿栽仲有Yoyo去左食消夜，
坐低冇耐，突然阿媽打電話比我：
「正呀你喺邊呀仲未番，你阿爸頭先突然個肚好痛，而家白車送緊入醫院呀！」
收到電話，我即刻起身叫可勇走：
「阿爸入左廠，我地即刻飛的番去。」
可勇：「點解會咁，乜野事？」
我：「媽話佢個肚突然好痛，唔好講住，截左的士先。」
栽：「的乜鬼野士丫，我車你地啦。」
Yoyo：「我又去。」
我同可勇叫阿栽拓海上身咁有咁快踩咁快，半個鐘唔夠就由中環番到屯門，去到急症室，見阿媽好奉口擔心咁坐左喺度，但就見唔到阿爸。
可勇：「媽，阿爸呢？」
阿媽：「勇仔正仔，唉呀，頭先嚇死我呀，你阿爸訓訓下冇啦啦大叫肚好痛，個樣痛到口唇都白哂，我咪即刻叫白車送佢入黎囉，而家推左入去檢查緊呀。」
我：「媽唔使擔心，冇野既。」
阿媽：「咦阿栽你地又會一齊既，勇仔你今日去飲完呀，著哂西裝咁既。」
可勇：「係呀係呀，今日我同佢地一齊去飲之嘛。」
阿媽：「咁仲有呢位小姐係…」
Yoyo：「我叫Yoyo呀伯母，你叫我靜悠丫。」
「靜悠，個名咁熟既。」阿媽咦咦哦哦咁喺度講野，我驚比佢識穿就拉左佢埋一二邊。
等左半個鐘，終於可以入去見阿爸。
入到去急症室其中一格床果度見到阿爸訓著左，成個頭都濕哂，好明顯係流過好多汗，塊面好蒼白，個鼻插住既應該係止痛之類既野黎，
阿媽一見到就好緊張咁走埋去拖住阿爸隻手，對上一次我見到呢個情境，係阿爸做警察出事果次。
可勇去左搵醫生，阿栽同Yoyo就去左出面等，阿媽就一路拖住老豆就一路喊。阿媽成日話自己成世人乜都冇，就係最開心嫁左比阿爸，佢話後生果時好多女仔成日主動約阿爸，但阿爸都唔會話搞三搞四，所以阿媽成日都以呢個老公為榮。
我搭住阿媽膊頭，一路聽佢既喊聲，再一路望住阿爸，先發覺原來阿爸真係老左好多好多。我喺佢額頭上，好似搵到好多為我地兩兄弟憂心而留低既痕跡。
突然間，可勇走埋黎床邊，雙眼紅哂咁拖住阿爸另一隻手，一路望住阿爸，佢一路流眼淚，個身就不停喺度震：
「阿爸，對唔住，我係可勇，爸對唔住呀。」
可勇講對唔住？我講過由細到大可勇都好倔強，成日都話人唔可以認輸唔可以認錯，一認左就乜都冇，但點解佢會突然咁樣？佢見過醫生，一定係醫生講左乜野比佢知。
我：「可勇你做乜野？醫生講乜，醫生講乜呀勇！？」
可勇：「嗚…醫生話..醫生話….阿爸原來一早知…..自己有腸癌，係第四期….末期喇….嗚….」
阿媽：「下？點解會咁架？」
我：「個醫生呢？」
可勇：「隔離病房，佢係跟開阿爸病歷，咁啱有當值，醫生一收到阿爸急症就叫左個醫生落黎。」
我發左茅咁衝過去搵醫生，因為我希望係可勇聽錯，阿爸只係第三期又或者係第二期，甚至可能係搞錯，阿爸只不過係小病。
可惜，我搵到醫生，醫生話我知，阿爸三個月前已經知道自己有呢個病，醫生曾經叫佢做手術，但阿爸冇做到。
我問醫生而家有乜野藥可以用，佢話阿爸定期都有覆診，但我同阿媽根本冇發覺佢地平有食藥。
醫生問我地會唔會勸阿爸開刀，我地根本六神無主，跟住醫生又話阿爸而家食既藥係政府資助，我問佢有冇一種最有效最好既藥，佢話有一種標靶藥會有效好多，會集中追住癌細胞黎打，但就貴好多，每個月要三萬蚊。
同可勇阿媽講完之後，我同可勇都決定用新呢種藥，阿媽話佢同阿爸加埋都有幾萬蚊積蓄，必要時可以賣左層樓。
阿媽：「點搞呀你地？勇仔你搵到野做喇咩？」
可勇：「得喇媽，層樓比你同阿爸養老，總之阿爸藥費我同阿哥諗。」
我：「媽，你都要照顧好自己，阿爸仲要靠你好好咁看住架。」
我見阿媽完全冇哂主意既樣，真係覺得好心痛，可勇更加自責，因為佢覺得阿爸有咁重既病佢仲去激佢，成個人完全冇哂鬥志。
阿爸未醒但要留院，但醫院要探病時間先睇得，所以我同阿媽可勇就番左屋企先，阿栽就送Yoyo番屋企。
番到屋企，阿媽即刻行左入房，幾分鐘後搵到阿爸既藥出黎。
阿媽：「你阿爸收埋左喺鞋盒度。」
我同可勇冇出聲，因為我地仲未好接受到。
「可勇，其實你係咪已經去左阿栽果間公司度做？」阿媽突然問。
比阿媽咁問一問，我地兩兄弟都唔識點答，
可勇：「媽…」
阿媽：「可勇，你大個仔喇，如果你想做既阿媽一定會比你做，不過你可唔可以坦坦白白同阿媽講真話。」
阿媽近乎哀求既眼神，我知道可勇一定會講真話，但問題係，如果呢個時間連我都入左宏訊做呢個消息都比阿媽知，對佢會唔會係一個好大既打擊。
儘管我真係唔知點解阿爸阿媽唔比我地兩兄弟做。
「媽係呀，可勇佢入左阿栽果間公司做，仲做得幾好。」我快過可勇答阿媽
可勇用奇怪既眼神望住我，不過我知道佢清楚我點解會咁做。
阿媽：「嗯，但你地知唔知道阿爸已經估到。」
我 / 可勇：「點解？」
阿媽：「果日我拎左正仔你件外套張咭片出黎，你阿爸喺你面前就好似冇反應，其實自己第二日問我間公司係乜野名，跟住佢自己估呢張咭片既女仔就係阿栽同可勇同事，正仔你又有聯絡個細佬，佢咪覺得可勇已經入去做。
頭先醫院果個女仔應該就係咭片呢個女仔，幾斯文丫，係你地邊個女朋友？」
我 / 可勇：「唔係我架。」
阿媽：「唔係就由佢，不過你阿爸知道左之後都好似冇乜野咁，都十幾年，可能真係已經睇通左。」
可勇：「到底點解阿爸會成日都咁偏激？唔比我地做呢份工？」
阿媽：「你地知唔知，你地阿爸出事果次，係同邊個同事一齊行動？」
我：「興叔丫嘛，阿爸話佢追個賊唔小心跌落天井。」
阿媽：「係就係興叔，其實仲有一個，就係周常德。」
可勇：「係佢…？點解阿爸冇講？」
阿媽：「你阿爸呢一世，就只對我講過呢件事。果日佢地幾個一齊去一幢唐樓追一班大陸落黎既賊，你阿爸一路追到頂樓，同個賊打到碌黎碌去果時，周常德就黎到。」
可勇：「之後呢？但阿爸冇講過。」
++++++++++++++++++++回憶錄+++++++++++++++++++++++++
●唐樓天台上●
薛天來：「德，睇住條烏鼠，佢個身應該有狗。」
周常德冇應薛天來，只係走去另外一邊截住其他出路，大圈仔望住周常德，又望下薛天來，之後突然衝過去周常德度。
大圈仔同周常德兩個扭埋一齊，薛天來拎住支槍一時間唔知點做好，之後大圈仔一下將周常德推埋薛天來度，周同薛天來兩個跌埋一堆，個大圈仔就轉身走左去度後門落樓梯。
薛天來當差咁多年，有佢天生既直覺，佢好奇怪以周常德既身手點解會咁輕易就比個大圈仔推開，佢伸個頭出天井，見到個大圈仔一路順住樓梯咁跑落最底果層，薛天來一槍射埋去，個大圈仔跑到四樓，比一下槍聲就嚇到酸左落樓梯，另一個警察走上黎將呢個大圈仔捉住。
後面既周常德望到呢一幕，一滴好大既汗喺佢側額流落黎。
薛天來：「阿德，你頭先做乜野？」
周常德：「冇野呀來哥，條友捉左喇？」
薛天來：「係呀，我地落去跟埋佢。」
薛天來落到去，見到個大圈仔已經比其他軍裝警察捉住，薛天來叫班軍裝落番去，呢度由佢處理。
個大圈仔比幾個警察反手推左埋牆邊，完全冇機會走。
薛天來：「德呀，你落孖葉。」
周常德拎左個手扣出黎，眼見其他警察都走左，好細聲咁喺薛天來耳邊問左一句野：
「來哥，可唔可以放左佢？」
薛天來：「你講乜野呀？你警察黎架！」
周常德：「唔係呀來哥，我炒輸左孖展，爭人幾百萬，放左呢條大圈仔我就搞得掂架喇。來哥，你當幫下我啦！」
薛天來：「你知唔知自己講緊乜，唔怪得頭先放軟手腳，你而家同我塔條友番去，其他野我幫你慢慢跟。」
周常德：「你搞唔掂架，班友成批AK47落緊黎，你唔好幫我喇，走啦仆街！」
周常德放走大圈仔，一下推走左佢，轉身即時擋住薛天來：
：「來哥你唔好追啦，比佢走，你可以拉我，我搞掂條數佢地就唔會搞我屋企架喇。」
薛天來一鎚打落周常德度，跟住即時追出去，誰不知周常德情急之下爬起身，一撞就將薛天來撞出欄杆，薛天來就係咁由四樓跌落天井，一隻腳從此傷殘。
事後，薛天來去過周常德屋企，知道周常德細佬同細妹都因為佢條孖展數比班追數佬打傷過，周常德都因為呢件事冇再做差人，
後來警察部問番件事係點發生，個賊係點走甩，薛天來都冇將呢件事既真相再講出黎，只係話自己大意比個大圈仔走甩左。
周常德辭左職冇再做警察，消失左一段時間，到好多年之後，薛天來先喺電視見到佢出現，但已經係一間金融公司既高層。
薛天來成日覺得，係孖展炒賣害左周常德，亦因為呢類金融既投機令周常德害左薛天來自己一世，呢十幾年佢都諗唔通，點解周常德唔出現向自己講一聲對唔住，仲點解要留喺呢一行，
害左佢地兩個唔可以再做警察既一個行業。
++++++++++++++++++++回憶完+++++++++++++++++++++++++
阿媽講完，可勇同我對眼已經紅哂，我仲記得果次阿爸出事，我地去醫院睇佢，見到阿爸腳上面果條好大既傷痕，我地覺得好傷心，果時佢仲同我講冇野，好快就會冇事，我到而家先知，原來喺佢身上曾經發生過一件咁既事。
阿媽話阿爸一條根，好易信人，信一個人就係一世，而家咁聽番，阿爸係嬲周常德，或者係嬲佢點解到而家都仲未去填補番佢地友情上既呢一大個缺口。
夜晚訓唔著，一個人諗左好多野，呢一個月既變化真係好大，好唔慣，差唔多天光果時，我send左一個訊息比以娜，話佢知阿爸既事，可惜等左半個鐘，
以娜都冇覆我。
訓醒，又一日，今日星期六，啱啱唔使番工，起身就即刻去醫院睇阿爸，去到，阿爸仲訓到迷迷糊糊，成個人都唔夠精神。
阿媽同可勇一人拖住阿爸一邊手，勸阿爸做手術。
阿爸：「發覺果時已經太遲，排期又要時間，如果去私家醫院又會好貴，我唔想去到呢個時間仲浪費咁多錢。」
呢個係阿爸立場，但我地兩兄弟既立場係，就算要偷要搶，我地都要阿爸盡快做手術，一日都唔可以拖。
由阿爸醒番，佢知道我地已經知道佢有病，而我地亦都知道佢知道可勇而家做宏訊，但今日既探病時間入面我地一句都冇傾到宏訊既野，冇再爭拗大家價值觀既野，全家人都好開心好融洽咁傾計。
人既劣根性就係咁，當你怕失去一樣野果時，你就自自然然積極去對待佢。
探完阿爸，阿媽同可勇番左屋企準備晚餐比阿爸，而我，就去左搵王力維。
去到王力維樓下公園，我講左阿爸既事佢聽，之後我都好坦白咁講出我既來意比佢知。
我想盡快搵最多既客，可以搵到足夠既錢比阿爸去醫好個病。
王力維：「估唔到世伯原來以前咁堅。」
我：「你果邊既客準備好未？」
王力維：「如箭在弦架喇，但而家你阿爸咁既情況你有冇心機做架？」
我：「多多都有，而家唔做仲等幾時？阿爸個病唔拖得。」
王力維：「咁得啦，星期一番我打比你，比完客既資料你我再同你夾夾。」
我：「維，唔該哂。」
王力維：「戇尻我有得分架唔該乜野呀。」
星期六晚至星期日，我同可勇唔係陪阿媽就係去探阿爸，一家人心情都變得輕鬆小小，從來解決問題都係謀事在人，成事在天。
星期一晚，美國開市大升，油價回落，經驗尚淺既我自把自為，用Jacky果個嬴到二十三萬既倉，沽左二十手貨。
二十手，對一個二十三萬既倉黎講係一樣好危機既事，每一蚊金既上黎係一萬五千六佰，即係話只要我睇錯個市十五蚊左右，Jacky個倉就會爆。
但我冇辦法，一定要月尾之前做最多既單，下個月頭我就有錢比最好既醫療去醫阿爸。
我落左盤之後，屏息以待咁坐左喺條船度，一句野都冇講。
另一邊既可勇，個倉其實仲有十幾萬，之前只不過係個圍頭佬覺得佢炒得太勁所以唔比佢做，但經過說服之後好似又話比多次機會可勇，聽佢地講，說服圍頭佬果個竟然係Yoyo。
我開始想了解到底Yoyo點解成日都咁有辦法。
可勇同阿栽喺房入面做單，sms比我，佢都沽左五手。
搵錢搵錢搵錢，係我地兩兄弟既目標，諗得入神果時有人拍拍我，係業仔。
業仔：「點呀正，做左野未？」
我：「沽左啦，649.5沽左。」
業仔：「唔好咁重貨，而家窄幅上落，美市上緊個油價又回，分分鐘金價會打一針上多幾蚊先回落黎，太重貨我驚你未坐穩就比佢嚇走左。」
其實業仔既理論我一路都覺得係愈聽愈有道理，金市既消息講真有幾十個來源，美金、油價、需求、銀行儲備、政局乜都可以關事，開邊一瓣我地根本唔可以太明顯知道，所以倉既做法就係唯有穩中求勝，就好似業仔咁講，穩中求勝。
可惜我冇咁多時間。
我冇同業仔講我沽左幾多手，跟住佢就行開左，望住個報價機個價真係好窄幅上落，幾近係徘徊喺648.5至650之間，坐左差唔多一個鐘，我就走左入阿栽個房，阿栽同可勇出左去食煙，只係得番Yoyo好勤力咁喺度打比班客。」
「陳生你好呀，我係宏訊果個Yoyo呀，仲記唔記得我呀？」Yoyo見到我行入去，整個鬼樣同我打招呼就繼續做野，我坐喺房度百無聊賴，就企埋窗邊繼續望住果個仲未完結既繽紛嘉年華。
「點呀正呀，有冇做野呀？」Yoyo收左線之後問我
「有呀，沽左。」
Yoyo：「世伯果度而家點呀？」
我；「有咩點丫，咪比心機搵錢囉。」
Yoyo：「正哥，有小小野問你。」
我：「講囉。」
Yoyo：「李氏果邊有人撬我走，仲比我去果邊開條Team，你話走唔走好？」
「走？呢度好地地點解走？」我問
Yoyo：「冇自己既Team，我成世都係阿栽既伙記，搵既錢永遠唔夠佢多，就算我幾勤力都好。講真入呢行都係想搵錢，唔係使乜成日打開個領同客傾生意，我知個個客都係望我個胸多過望我份計劃書，但我冇所謂，目標為本，唔過低線就ok，
男人就係咁賤格，你講幾多都冇用，比小小佢望下你叫佢仆街都肯。」
我：「蝕小小佢地點會同你開倉。」
我暗示，因為我真係唔信Yoyo真係蝕小小就搵到生意，特別係上次我聽到佢果個電話。
Yoyo：「正哥，我知你地男人一見女人個胸大就覺得人地冇腦，但從來唔會諗人地有冇努力。我亦知你點解咁諗，因為上次你入房果時聽到我同個客傾野丫嘛。」
我：「Yoyo，老實講，我唔會睇唔起，因為我知道呢行搵錢咁做都係正常，我買份保險都搵個索既保險妹啦，何況幾廿萬幾廿萬咁拎出黎。」
Yoyo：「果個客係女人黎架，傾都傾左成個月，果次咪諗住快手去佢度搞埋個戶口佢囉，我屋企唔同你地，我單親家庭大，阿媽洗碗養大我，洗到十隻手指都係骨膜炎，而家想渣拳頭都唔得，我想比好日子佢過。」
我：「原來係咁，等我仲以為…對唔住。」
Yoyo：「唔使，係呀，頭先問你既野你唔好同阿栽佢地講，你知就算喇。」
我：「得，可勇都唔講。」
Yoyo：「信你就奇，兩兄弟有乜可能唔講。」
Yoyo行左出房，望住佢，我覺得呢度每一個人都有佢既一個故事，表面上你見好多人都係不擇手段咁去用客既倉搵錢，但其實佢地心目中都有一個信念，只不過你會唔會去探討，會唔會去關心。
望番個報價機，而家我個平倉價係648.7，即係如果而家我平倉，個客就執小小，小到可能係得幾百蚊，但我就有二千蚊佣。
但我想幫佢嬴多小小，一來真係多謝佢咁信我，放廿萬落黎，二來我想炒大個倉，咁搵既錢就仲多。
我望住個價，都係果幾毫子上落，等得愈耐，我就愈想快手平左倉佢落過盤走多轉，個金價愈黎就愈唔郁，我一路望住，648.7 648.6 648.5 ……
「648齊頭我就平你，同我快D去呢口價啦。」我心一路諗
突然個價一彈，我一望『652』，點解會咁架？跟住再望仲不斷升 652.3 653 653.4 654…
呢個時候阿栽同可勇即刻衝入黎：
「哥快D平左先，美國果邊有恐怖襲擊仲未知死幾多人，隻金似衝緊上黎呀！」
大家仲記唔記得細個第一次睇咸片既感覺？我十一歲果年有一次因為幫阿媽放好老豆既底褲，唔覺意喺老豆既櫃筒果度搵到一盒咸帶。第二日我就自己一個人偷偷地人生第一次去睇呢種「愛情+動作片」，我成個頭哄到好近電視咁去欣賞，首次見到陌生女性胴體既我，成身感覺就好似觸電咁，睇到緊張果時直情有頭暈既感覺。
十幾年後，我望住個金價一路衝上去，竟然再次出現呢種周身冷汗加想頭暈既感覺，我完全六神無主，見到可勇平倉我都仲未識去打電話，阿栽同可勇見我冇舉動，都繼續望住個報價機，冇再理我。
阿栽：「仆街，隻金咁樣挾上黎，好在阿勇你走得快，唔係仆街都似。」
可勇：「不過蝕左幾蚊都有排同圍頭佬解畫，阿哥你走哂喇下？」
「嗯…」我唔敢同可勇講，我完全唔敢同任何一個人講我而家既處境，而家個金價升到657蚊，個倉已經唔知蝕左幾多錢，但呢一刻我真係唔識處理，只係識坐喺度等，但我唔知自己等緊乜。
業仔行入黎問我：「正你走左架喇下？」
我：「係呀係呀…」
「隻金有排上呀，搵位再渣過佢啦。」業仔邊講邊走番自己房
「勇，渣番佢三手啦，似仲有得升呀。」阿栽話
可勇即刻打電話落盤，跟住兩條友又變番兩個大好友咁大叫升升升。
我一路叫自己等個價跌多兩蚊執番小小就平倉再搵位做過，可惜隻金就係一路咁升，可勇果三手貨一路嬴錢，佢地兩個就一路笑一路玩，而我就完全投入唔到。
阿栽：「喇勇，升左兩蚊就走，升多兩蚊就走。」
可勇：「得得得。」
佢地未講完，阿栽講果口價就已經到左，可勇正準備打電話平倉，同時我電話就響。
我一聽，係盤房打黎，Jacky個倉已經爆左。
收左線，阿栽同可勇問我邊個打黎，我冇答佢地就行左出房，
行出個大廳，夜晚留低既同事都做緊單，有好多好明顯已經渣左貨，討論緊執左幾多蚊金，今晚要做幾多幾多？
我冇檢討自己點解會搞到咁，反而覺得自己係最冇運氣既人，行下行下，我行左去電梯，落左樓下果個花園行。
中環夜晚既風特別凍，我坐左喺個花叢邊，旁邊有個女人咁啱都坐喺度食煙，我認得佢，佢係四個Team頭唯一一個女人，
Gini Chan 陳芷芳，年約三十五左右，個樣你就幻想下梁詠琪四十歲左右係乜野樣，同樣都似既，仲有佢既身材都係同梁詠琪一樣。
見到其他Team，循例點都要笑一笑，佢又禮貌向我笑番一笑，我擰番個頭去第二個方向，佢竟然撩我講野：
「你係咪業仔果Team架？早兩日見你簽左個大陸人戶口，好似做得幾好喎。」
我：「係呀，我新黎，我叫阿正。」
Gini：「我叫Gini，你應該識我啦，今日大升市喎，點解唔上去做野？」
唔知係我戇尻，定真係好失落，我下意識知道唔可以，但我最後都主動講左爆倉既事比Gini知，可能呢種就叫做六神無主。
Gini聽完件事之後，冇乜反應，只係點下個頭，好似完全唔當一回事咁。
我：「你有乜野意見？」
Gini：「乜野有乜意見？新入行爆倉好平常，你驚業仔鬧你？」
我：「點會唔驚，做得咁差，我仲未知點同客解釋。」
Gini：「傻仔，呢一行係唔使交代，就好似上擂台咁，你會唔會打完人一鎚之後怕比阿媽鬧？」
我：「唔明。」
Gini：「即係我地本來就已經喺一個鬥獸場入面，你搵到食物，你就要盡快食哂佢，就算有人鬧你，都只不過係想分你既野食，唔係真心想幫你。」
我開始明Gini講既野，
「好喇，我都要上去做野，喂正，頭先講既野，呢度講呢度散好喇，我係其他Team其實唔係好應該同你講咁多野，不過你咁唔開心就當過下料比你啦。」
我：「哦，知喇Gini姐。」
Gini：「Gini好喇，我未嫁架。」
坐多一陣我就走番上去，今日係大升市，成班好似遇大奇蹟日咁個個渣貨，最後大部份人都嬴錢。
落完去吹風，我個人好似冷靜左咁，行入業仔房，同佢講左我爆倉既事。
點知業仔好大力拍左張枱一下，從未試過咁大聲咁鬧：
「你有冇搞撚錯呀，我講既野你有冇聽架？」
「對唔住業仔。」我只可以講呢句說話。
業仔：「講對唔住做乜？講對唔住個倉會唔爆呀，我叫左你次次都要set價架啦。」
我：「我以後會。」
業仔：「咁辛苦山長水遠搵個客為乜，而家做果幾十張單就冇左，爆倉唔係重點，問題係你點操作，人地咁見到問我點教你，我點答？
你第一倉就咁爆，一陣個客上黎嘈又影響到公司，你叫我點保你？你番左幾多日工？」
業仔就係咁一路半鬧半教咁同我講左半個鐘野，直到佢要再做野。
我行出房，可勇行埋黎搭一搭我膊頭：
「對唔係阿哥，我頭先自己嬴錢都冇留意你有唔妥。」
我：「傻啦對咩唔住，你叻仔我自己蠢之嘛，都夜喇，我唔可以成日夜番比阿媽懷疑，我走喇，你番去未？」
可勇：「我未住呀，阿栽話仲有機會做多兩轉。」
我：「ok咁我走先，你都唔好太夜。」
一星期後，
每一個倉每一日都會有一張日結單寄比戶個客，不過由於Jacky個地址喺大陸既關係，我覺得佢應該唔會咁快知道，呢一個星期佢都冇打比我，而我都因為心虛所以冇打比佢。
呢一個星期我好比心機咁繼續搵新客，業仔既態度都好似冇事發生咁，只係之後叫我比心機再黎過。阿爸仲喺醫院，我隔日就會陪左阿媽去醫院睇佢先再番工。
今日起身果時先知自己訓晏左，阿媽放低字條話我知佢去醫院先，我起身即刻梳洗拎埋帶比阿爸睇既雜誌就出門口，點知一去到樓下，業仔就打比我，原來Jacky落左香港，黎左公司搵我，而家要我即時番去。
要面對既點都要去面對，不過我已經去到醫院樓下，打算拎左書上去就番公司同Jacky解釋。
仲有一途車程比我去諗點樣同Jacky解釋，但我兩野就輸左人地廿萬，我又有乜野可以解釋？業仔會唔會呢段時間幫我同Jacky降左火先，等我去到果時唔使咁難，我個腦一片空白，真係唔知用乜野藉口由乜野原因入手去解釋先。
諗下諗下就行到去阿爸病房門口，我打開門，坐喺阿爸床邊既人擰轉面望過黎，
係以娜。
行入門口見到以娜，我有小小不知所措，明明佢冇覆我SMS，而家又突然出現喺阿爸病房。
阿爸同阿媽都知道我同以娜既事，但佢地本來就已經感情唔錯，所以我未行入房之前，佢地應該傾得幾開心。
阿媽：「正，以娜黎左一陣架喇，幾有心呀，送左袋補品同張心意咭比你阿爸。」
「係咩…係呀阿爸你今日點呀？」我好唔自然咁行去阿爸旁邊放低堆雜誌，對眼一路都冇同以娜有接觸。
擦過以娜身邊，我有種好陌生好陌生既感覺，我故意行去窗邊開窗，因為咁樣以娜就會背住我。
我從後面打量以娜既打扮，照樣係果個新款LV手袋，其他既就好似冇乜野改變，咁樣既打扮同我諗預期有小小出入，因為我覺得佢同Grace走埋一齊，就一定好似闊太咁一身名牌，更過份既係我有諗過佢會唔會有保鑣喺身邊。
我就咁企左喺窗邊，而以娜就一路同阿媽阿爸傾計。
以娜同阿爸以前成日傾計，果時阿爸仲係好收埋自己，唯一係以娜先可以令阿爸講野，阿爸話以娜心地好，又尊敬老人家，所以好鐘意同佢傾計。
我以為以娜見到我會即刻走，但估唔到佢好似完全見唔到我咁，拖住阿爸隻手一路同阿爸細細聲傾計，阿媽見到呢個情況，望下我又望下以娜，場面非常尷尬。
十五分鐘後，以娜企起身：
「來叔叔，我走喇，我過多幾日再黎睇你，個湯煲我唔拎走喇，下次拎第二個黎換，阿姨我走喇。」
阿爸：「好呀好呀以娜，正，送以娜走啦。」
阿媽：「係啦，你都返工啦就，大家都去中環，送埋以娜坐車。」
以娜：「唔使喇，我有車走，我走先喇，再見。」
講完以娜就開門走左，我發左呆咁企左喺度，阿媽係咁揚手叫我追，阿爸就望住我搖下頭：
「正，以娜對你如果冇感情就唔會黎睇我啦，做男人有時行多一步冇蝕底架。」
聽完阿爸咁講，我又覺得有小小道理，講真果晚我自己都SMS左以娜，而家仲扮乜野有型唔理人？我走出門口，見到以娜啱啱走入電梯，我衝埋去，啱啱好趕得切入電梯。
電梯入面有好多人，仲有一張訓左個阿伯既病床，床上面有一部心電機，仲有幾支好似鹽水既野。
就喺呢張野隔住左我同以娜，我企喺度望住以娜，而佢，就一路都冇望過我。
我唔知用乜野做開場白好。
醫院既電梯多數都係層層停，呢部都唔例外，成部電梯既人出出入入，而我同以娜就好似停頓左喺另外一個空間咁，呢個空間，時間特別長。
電梯到左地下，我以為以娜會一支箭咁走左去，正打算跑出去果時，見到以娜好有禮貌咁讓哂所有人出佢先出去，以娜性格一路都係咁，佢永遠記得尊重同先觀察其他人既需要。
以娜行出電梯，我走上去，行到差唔多以娜身後果時，正打算開口叫停佢，以娜突然停左步，轉身望住我，之後竟然係一巴打落我度
「薛可正，你個大胸女朋友呢？」
比以娜一巴打埋黎，我第一個反應係發火：
「張以娜，你講乜呀？妳癲架？」
以娜：「我癲？我講乜？你唔記得上次你拖住個女朋友走咩？而家你仲走上黎做乜？」
我：「我拖邊個關妳乜野事？」
以娜：「咁你追上黎做乜？想鬧我？想話我比你見到我錫其他人？你講鬧啦。」
我：「係妳走左去，而家仲要鬧我？」
以娜：「薛可正，點解你覺得你可以鬧我？上次大家樂度我冇同你講清楚，你自己冇諗過我講乜野架咩？上次仲要喺我面前打我同事？你知唔知我地果日去邊？」
「我唔知你地去邊，我鐘意打就打，有乜野問題？」我實在講唔出口我打Frankie係因為我誤會左係佢撬走以娜，唯有硬住頭皮去死撐到底。
以娜：「上次電話就話要斬人，今次同我講打人有乜野問題，薛可正，到底你點解你成日要煩住我，你成日都覺得我張以娜係唔可以離開你？我頭先問你，你知唔知我地果日去邊呀？」
「係呀，男人係咁架喇，所以你咪去搵女……」我收聲，因為我知道醫院開始多人望住我地
以娜：「你望下你自己，乜野都係其他人既問題，自己永遠都係最完美，你既感覺永遠都要行先，你傷風仲緊要過人地入醫院，我問左你兩次喇，你知唔知果日我同班同事去邊呀？」
比以娜狂鬧一輪，身邊好多人已經望住我同佢指指點點，其實我一路都想怪以娜離開，但原因不過係覺得佢貪錢。
問題就係呢個薄弱既原因，根本唔足夠我去同以娜爭拗乜野，以娜走左之後我都有反思過，佢講得好啱，每個人都貪錢，我自己何嘗唔係，有好機會既話每個人都想搵更好既，我嬲既原來只不過因為我係比人拋棄果個，但客觀黎講，換轉係我我都會咁做。
再加上我見到第三者原來係Grace之後，唔知點解我反而釋懷左小小。
我：「妳好煩呀，我咪講左唔知妳地去邊囉。」
「我好煩，你只係覺得我問好多次好煩，但你從來唔會諗點解我會問咁多次，呢個就係我同你唔同既地方，你永遠唔會考慮我呀。」以娜雙眼開始變紅，眼淚開始喺眼入面打圈。
我：「妳有乜就講，成日問我我點知，我連妳想走我都唔知呀！仲問問問，我唔係妳肚入面條蟲呀。」
可娜：「你唔係我肚入面條蟲，哈…」
可娜眼淚開始流出黎，我心情好極端，我見到佢喊覺得好心痛，開心既係，佢仲會為我喊。
可惜我極端左兩秒，就唔使再極端落去，
「啪！」以娜用比頭先更大力咁再一巴打落我塊面度，然後聲嘶力竭咁大叫：
「果日係我生日呀，仆街！」