米米蓮妖怪作品 -《旅行‧如此‧難以忘‧記 》(百集長篇): 第128集 ~ 明︰金身VS巨人？
第128集 ~ 明︰金身VS巨人？
河童老兄究竟做乜嘢會出現呢？又係邊個叫佢嚟嘅呢？
呢D嘢希望可以喺今集分解啦！
「二郎神」及時上咗阿輝身，令我哋都放心晒，始終佢真係神嚟丫嘛。
佢亦真係三兩吓手腳就將「大袋魔」搓圓撳扁，但係好可惜…
條友真係「神」嫁！竟然俾空間「大袋魔」變身！
而家人哋「金城武」咁嘅樣，淨係賣樣都贏你個「二啷神」成條街啦！
阿輝把聲仲要大嗌出嚟話「二啷神」整親埋條腰，咁點算好啊？
好在，有「肥龍大師」隻「脫苦海」！(人哋叫「殺龍巴斯」啊！)
兩樣嘢有咩分別呢？我唔識分，淨係知「佢」幫到「二啷神」頂痛…
之後，佢哋大戰幾百幾千個回合，睇嚟「二啷神」有返D力量喇！
但係，佢哋大鬥嘅途中，PAKKA突然嚟咗…
「我收到料，有人叫我嚟呢度，我都唔知咩事嫁。」PAKKA咁講。
「咁你嚟呢度有咩要做啊？」我問。
「個FAX叫我佈置吓呢度喎，話係神嘅旨意。」
「咩神叫你嚟佈置呢度啊？咁大整蠱。」
「俾我睇吓個FAX。」「南龍」先生出口。
佢之後望咗兩眼…
「點啊，先生？」阿欣問。
「「風婦」前輩已經喺我部「衰風」度幫緊我哋，我估…呢個應該係…「臣婆」前輩嘅訊息。」
「神婆！？」我嗌。
「風婦，臣婆，兩大世外高人，兩條友都神神地，佢哋D嘢睇落無厘頭，實際真係好神，所以我都唔考究，淨係信嫁咋。」「南龍」先生回應。
「咁河童先生麻煩你佈一佈置丫。」佢另個頭向PAKKA講。
「好，但係個FAX上面仲有一句嘢唔關我事嫁喎。」
PAKKA講完就去咗佈置。
「其實我都見到，係未諗到啫，呢句嘢呀，咩咩咩「叫陰陽人快D去冥想成神」喎，都唔知噏乜，我哋成班人都正正常常，邊有陰陽人啫？」「南龍」先生咁講。
「你肯定？」我同阿狗一齊問，不過似乎捉虫。
「起碼我係正常，你哋我就唔知喇。」「南龍」先生錯愕回應。
「我正常嫁，你都知嫁。」阿狗望住阿妮講。
「我正常嫁，我真係正常嫁！」我望住小倩講。
「我知啊。」小倩講。
「唔係噃，係你！」阿狗突然另返轉頭指住我講。
「黐線架！你就陰陽人，使唔使我露械嚟證明吓啊？黐孖根。」我講。
「唔係啊，我意思係你個名啊，個「明」字啊，日月即係陰陽囉。」
「又好似有D道理噃。」「南龍」先生都咁講。
「加上我哋呢度得返幾條友打得，當中係你最似陰陽人嫁喇！」阿狗再講。
我冇回應，因為我個心都信咗，但係都係做咗呢樣嘢…
我分開咗「護身咒」嚟對住佢，即係兩隻中指。
「家明，唔好做粗口手勢啦。」小倩講。
我及咗吓頭回應小倩，之後就向「南龍」先生問︰—
「咁我要冥想D咩啊？」
「Eee…就試吓諗吓你認為可以打贏「佛地魔」嘅神明啦。」
我「哦」咗一聲，之後就開始冥想…
但係「二郎神」對「城武魔」大戰真係太精彩…
同埋太嘈喇，我點靜靜地冥想啫，所以我又開咗眼睇戲…
我見到阿輝嘅身影越嚟越似一個人…
「直刺式！」
「橫削式！」
「斜斬式！」
「旋風式！」
「順劈式！」
「拖劍式！」
「推刃式！」
我諗大家都知係似邊個啦，聽到呢一連七式劍式，我眼淚就流咗出嚟…
真係好想大嗌一聲「光管陳」啊！
「鋼鐵神拳！」
「巨樹神拳！」
「海量神拳！」
「赤煉神拳！」
「大地神拳！」
「通臂神拳！」
「兩儀神拳！」
你老味丫，連「佛地魔」都玩呢味嘢，玩紀念特輯咩？！
我嬲嬲地就唯有︰—
「俾返兩個老師我啊！」
我用「九陽草薙」一吓斬出巨型光波飛向「城武魔」，點知…
啱啱撞正剛剛…
「鳳移換影！」
做乜鬼嘢要換位啊？「二郎神」同「城武魔」突然調轉咗個位…
攪到我個光波「爬」一聲打中咗「二郎神」背脊…
呢鑊杰喇！
之後「城武魔」立刻抓緊形勢…
「奧義流鬼影破滅斬！」
「嘭」一聲成個「二郎神」飛開…
「城武魔」唔俾佢有返身嘅餘地，立即就再嚟一招…
「血鬼頭真義﹒邪咬！」
佢隻手突然變成巨型蟒蛇，一吓咬向「二郎神」…
「二郎神」想用氣牆光盾硬頂，可惜都係頂唔住，俾佢一吓打飛，仲…
跌咗落PAKKA啱啱佈置好嘅河流裡面…
「哈哈哈哈，連神都唔夠我打喇，哈哈哈哈！」「城武魔」大嗌。
「點算啊？」我問。
「最衰係你條友個光波啊！」阿狗鬧我。
「唔關佢事，其實原本已經出現問題，因為神上人體，時間一耐就有排斥，相反，妖人配合妖刀，時間越耐力量越大，阿明個光波其實根本傷唔到「二郎神」，事實係幾百個回合之後，「二郎神」力量已經剩返一兩成，根本已經唔夠佛地魔打。」「南龍」先生咁講。
「咁仲有咩方法啊？」小倩問。
「船到橋頭自然直，唔好問我點解直。」
「輝輝！輝輝好似唔識游水嫁，我要落去救佢！」阿欣傻嗌。
阿欣一衝埋去，突然河流閃出金光，慢慢又有團白光升上嚟…
「河仙？」
我望真D…
「PAKKA？」我大聲提出我疑問。
「唔係，而家我個角色轉咗，我係河仙姑！」佢咁回應。
「你做河仙已經醜樣，仲要加個「姑」字喺後面做乜嘢啊你？」我再講。
「唔理你住，我講返我D對白先，請問邊位掟咗呢個人落嚟嫁？」
「好話喇，係我！」「城武魔」懶醒咁講。
「哦，咁你掟落嚟嘅係金色呢個，銀色呢個，定係肉色呢個呢？」
「肉色嗰個。」
「好，見你咁誠實，三個都俾晒你！」
「咩話？我吊！」
嗱，粗口係「城武魔」講嫁，唔關我事。
之後，「銀色」同「肉色」嘅「二郎神」就企喺岸邊猜枚…
而「金身二郎神」立即衝向「城武魔」…
「鳳凰擺駕！」
「鳳凰來儀！」
「鳳凰于飛！」
「鳳泊鸞飄！」
「鳳舞龍飛！」
「鳳舞九天！」
「鳳毛麟角！」
「鳳翼飛翔！」
「鳳，凰，火，炎！」
「金身二郎神」一連九式打到「城武魔」趴晒街…
呢次仲殺你個「城武魔」唔死！？
但係，突然，「城武魔」佢竟然使出呢招…
佢個身上面，閃出「大袋」嘅身影，咩事呢？
「二郎神」始終係阿輝軀體，所以一時間阿輝唔忍心一劍拮死「大袋」…
而喺呢個時間仲…
仲有兩條光線突然射向「城武魔」，又發生咩事呢？
大家另轉頭一望，見到…
「叮噹？」(即係多啦A夢)
我見到欣家姐手上有兩支電筒…
如果我冇估錯，一支係「復元光線」，而另一支就係「放大燈」…
而家「城武魔」肥咗又靚咗，唔係呀？仲要打？
(待續)
下集預告︰
冇用嫁，你試走去窗口望吓，睇吓睇唔睇到…
註解︰
(1) 搓圓撳扁 — 就好似當對手係麵粉咁，意思係壓倒性咁欺負人哋。
(2) 二啷神 — 個「啷」字係刻意用嚟反映阿明當時唔滿意二郎神嘅表現嘅。
(3) 脫苦海 — 都係止痛用嘅膏藥。
(4) 黐孖根 — 感覺好似比「黐線」更強烈。
(5) 啱啱撞正剛剛 — D老人家好鍾意咁講，即係「咁啱得咁橋」。
(6) 呢鑊杰喇 — 杰，即係好似唔夠水嘅粥咁，或者成PAT痰咁，總知就煩啦。
(7) 船到橋頭自然直 — 上網搵，解「任何事情都是有轉機的」。
(8) 猜枚 — 猜拳。