米米蓮妖怪作品 -《旅行‧如此‧難以忘‧記 》(百集長篇): 第127集 ~ 輝︰神VS神。
第127集 ~ 輝︰神VS神。
相信大家都知道「二郎神」已經上咗我身啦，所以我而家就…
可以用第三身去講呢集喇！
我嘅上一集…
「冇得錯嫁喇，有單眼仔呢隻「慧眼」，又有三尖兩刃嘅「鳳凰火炎」，仲有隻哮天傻狗，係你喇，二郎神！」
「南龍」先生講完呢句之後，就想盡辦法幫請「二郎神」上我身…
最後仲用埋打電話CALL馬呢招…
點知「二郎神」咁回應︰—
「你都幾精甩尾噃，電話就你打，妖怪就你朋友打，十分鐘啦，等我沖埋個涼先。」
用我身體去打冇所謂，但係要等十分鐘，我當時真係驚「大袋魔」佢唔等。
我已經驚緊喇，點鬼知「司徒不正」仲要避開咗「肥龍大師」個「黑龍波」…
個「黑龍波」仲要中正「大袋魔」不突止…
隻死人龜仲要笑「大袋魔」佢露出個「咕咕」，仲笑到咔咔聲…
咁樣俾人笑法，唔嬲就假喇！
「笑丫嗱，去死啦！」
點知喺呢一刻，我身體突然不由自主，仲喺耳邊聽到…
「細路，我沖完涼喇，借你身體一用！」
之後我個身體就迅間飛到埋去「大袋魔」身邊，仲用左手捉住咗佢右手…
「咪住！」
仲唔知喺邊度傳嚟一隻「如來神掌」嘅音樂…
其實「二郎神」關「如來神掌」咩事啫，擺明就係播錯歌，但係…
「咩話？二郎神？」
嘩，「大袋魔」竟然認得出用緊我呢個身體嘅係「二郎神」！？
之後「大袋魔」想擺脫「二郎神」，所以就左手一吓伸向「二郎神」…
點知「二郎神」冇閃不突止，仲兜巴打埋去…
「啪」一聲，「佛地魔」飛開九丈遠…
即使佢再起返身衝向「二郎神」，結果只係變得更慘…
「二郎神」一拳，一劈，一射，直頭當「大袋魔」係波咁玩…
但係之後我見「二郎神」冇再出手，淨係企咗喺度睇住「大袋魔」嘅方向…
所以我咁問︰「二郎神先生，點解唔乘勝追擊啊？」
「唔知係咪頭先射嗰腳太用力，整親條「大陣」，仲有少少抽筋添，等我抖吓先。」
我無奈到唔想講嘢…
我哋就係咁等，等到「大袋魔」起返身…
「竟然出到二郎神嚟對付我？」
「咩啊？唔順超，可以再嚟挑我機丫，打我丫，笨！」
我望住「二郎神」嘅右手仲係撐住條腰，我就知佢係拋浪頭…
喺呢個時候，「大袋魔」仲要發脾四，我真係驚「二郎神」奶嘢，點知…
「…歌聲魅影！」
「二郎神」就叫「居居」用把口吠出「將軍令」嚟應對…
好在唔使佢出手咋。
「…動感十字死光！」
「…AB眼嚟抵擋你…C眼嚟爆射你啦！」
又唔使出手，真係夠著數噃！
「你兩條友玩夠未啊？唔好咁重口味得唔得啊？」欣欣發脾氣，我都驚驚啊。
「Sorry囉，玩吓啫。」我都驚到跟埋口講。
「咁正常對決啦…」
…
「二郎神」兩句唔埋，可能見自己條腰冇咁痛就一吓飛埋去「大袋魔」度…
仲一拳將佢打落地下，再一腳踩住佢個頭，手執住劍就隊住「大袋魔」…
但係我睇得出「二郎神」其實條腰仲痛緊…
佢只係想用「大袋魔」嚟平衡一吓啫…
「大袋魔」之後另側少少頭就講︰—
「…我元氣整頓好，用上妖刀，你肯定後悔！」
「…我真係好想睇吓你有幾勁添！」
「唔好犯同樣錯誤啊！唔好俾機會「佛地魔」啊！」
「南龍」先生雖然咁嗌，但係「二郎神」只係揚揚手回應佢就算…
至於「大袋魔」就慢慢爬返起身，再慢慢坐低回氣…
…
「哈哈哈哈，你真好人，好啦，可以一戰喇！「妖刀村正」歸位！」
「大袋魔」講完之後，一舊白雲遮蓋咗佢…
「司徒不正」就化成一道紫光飛入白雲之中…
幾秒過後，白雲散去…
「大袋魔」竟然變成咗「混血亞洲男神 — 金城武」。
「哈哈哈哈，我佛地魔嘅真身回歸喇，二郎神！？我呸！」
「嘩，咩你咁老嘢腔，個「呸」字，我阿爺都唔用啦！」
「你理我丫！我而家就斬死你呢個二郎神！」
「哈哈，喂，又試吓丫喂，我都想知我可以點死？」
嘢都未講完，「城武魔」迅間轉移到「二郎神」身邊，仲一個滕撞…
將「二郎神」撞開…
「哎吔！」
原來我個肉身俾人打，我都仲係會痛嫁！
但係點解條腰唔痛嘅呢？
「城武魔」一刀橫斬過嚟，「二郎神」揮動「鳳凰火炎」將佢格擋…
我就襯呢個時候…
「二郎神大人，點解你腰痛我唔痛，但係頭先俾隻「佛地魔」打就痛嘅？」
「我上到你身係因為你同我身軀配合到，但係無奈我同你始終會有D差別，而而家因為我嘅唔小心，整傷條腰，造成我個神明體同你嘅人體差別大咗，所以力量配合都會差咗，肯定就用唔返我十成力量嫁喇，我諗而家最多得返三成力量！」
「咁點算啊？」
「希望我三成力夠佢打啦！」
「接招！」「城武魔」再次窮追猛打！
佢一個「十字追魂斬」將紫光十字光波斬過嚟…
而「二郎神」就用一招「火光城璧」格擋…
但係「城武魔」並冇停手，立即又嚟招「靈魂百烈斬」連斬數百刀…
雖然「二郎神」一個退步，又使出一招「鳳舞炎龍」製造咗一圈圈防衛…
但係「城武魔」精力明顯更旺盛，數百刀之後，接住又嚟招…
「邪影勾魂斬！」
一道開山刀光猛力劈向「二郎神」嘅「鳳舞炎龍」…
就連「二郎神」嘅防衛都俾佢打破咗…
「城武魔」見有所突破，立即就迅雷式飛向「二郎神」再嚟招…
「陰魂歸天！」
向上一斬…
「二郎神」唯有強行用「鳳凰火炎」打橫一擋，可惜…
「城武魔」呢一吓力量太大喇，「二郎神」連人帶劍被斬到彈飛數丈，仲要…
「咩原來「二郎神」係得咁多料嫁咋？」俾「城武魔」串。
「「十二路勾魂斬」只係我當年成名嘅招式，已經可以打成你咁喇，你頭先D霸氣去咗邊啊？」
「你條廢物，唔係「二郎神」佢整親條腰，你一早死咗喇！」我唔小心爆咗出嚟。
「二郎神」亦都立即顯得無奈…
「乜原來係咁呀？多謝你講我知噃，咁我就追住你條腰嚟斬啦！」
死喇，我累事添！點算呢？
「腰痛咋嘛，用佢啦！」
「肥龍大師」突然喺自己後欄掟咗一大塊白色嘅嘢出嚟！
「二郎神」一手揸住咗，就問︰—
「咩嚟嫁？FAX呀？」
「全日本銷量第一，藥性滲透力強，有效舒緩肌肉勞損及工作引致的各種痛症和炎症，迅速恢復最佳狀態嘅，殺，龍，巴，斯！」
「咩話？就係嗰條呻吟到天庭都聽到嘅日本佬用嘅…又係最出名IQ題嘅答案嗰隻「殺龍巴斯」！？」
「冇錯！」
之後「二郎神」一吓就將塊嘢撻喺條腰度，再…
「阿~~~~~~~~~~~~~~！」
聲音爽到衝上雲霄…
再之後，「二郎神」就飛埋去「城武魔」一連幾千吓格劍…
刀光劍影之快…
令到我呢個跟隨住「二郎神」身軀嘅靈魂變到好似睇緊雪花一樣…
「匙哩沙喇」咁，雖之言，「城武魔」並冇輸上數招…
但係「二郎神」總算回覆一定水平，可以一鬥…
之後，「城武魔」一連使出「十二路勾魂斬」…
而「二郎神」亦使出佢哋「楊家槍法」…
佢哋一直「PINK拎攀冷」咁，現場都冇人夠膽去插手…
佢哋就係咁一直打一直打…
打咗幾百個合。
之後突然…
我聽到地下「匙匙~」聲。
再有一個禿頭生物彈咗出嚟…
「係PAKKA啊！」
河童？佢嚟做咩啊？
「我收到料，有人叫我嚟呢度，我都唔知咩事嫁。」河童咁講。
(待續)
下集預告︰
河仙？
註解︰
(1) 大陣 — 尾龍骨或者腰骨，踢波D人好鍾意咁形容條腰骨。
(2) 發脾四 — 同發脾氣。
(3) 奶嘢 — 唔要第一第四同第五聲，用第二聲讀個奶字，意思係中伏。
(4) 老嘢腔 — 老人家專用說話技巧。
(5) FAX — 本來想用中文，不過諗唔到個FAT字中文點寫。
(6) 殺龍巴斯 — 本來個名同呢個有D分別，不過個音一樣。上面講到咩日本佬用到好爽嘅廣告，可以上網搵吓﹔IQ題就同巴斯光年有關，大約係咁問嘅︰「巴斯光年殺死左侏羅紀條恐龍會變咗做咩？」
(7) 匙哩沙喇﹑PINK拎攀冷 — 聲音嚟，好似咁多年嚟D人都係咁形容D聲。
(8) 楊家槍法 — 二郎神本來個名叫楊戩，所以我老屈佢個槍法叫楊家槍法。