米米蓮妖怪作品 -《旅行‧如此‧難以忘‧記 》(百集長篇): 第111集 ~ 欣︰對話。
第111集 ~ 欣︰對話。
家姐昆完「血面刀魔」之後…
「先生」就用佢嘅家傳之寶「青龍劍」打出一招「日月神劍」…
(嘭嘭嘭嘭嘭嘭嘭嘭嘭嘭~)
我眼見完佢嘅呢招全中「血面刀魔」之後，現場而家灰塵飛飛咁…
…
一段時間之後，灰塵慢慢散去，我見到…
「血面刀魔」得返四分三個頭喺地下…
身體就已經完全俾「先生」嗰招打到灰飛煙滅…
「哼，南轅老怪，你都抵有今日喇，落去見你最唔想去嘅地獄啦！」
「哈哈哈！」係淨返四分三個人頭嘅「血面刀魔」喺度傻笑。
唔通佢仲有後著？
「正派人總係永遠輸一樣嘢，就係太仁慈，有頭唔打打我個身？哈哈哈！」
「血面刀魔」一大笑完，迅間化成紫煙，再轉化返成為「大蕃薯」本來個樣…
左手邊身係冇咗，但係佢仲可以行動自如…
「身為一個邪士，點可以冇後著啊？我真身其實喺個頭度，而家…「骸骨屍城」！」
呢個招數令到地下慢慢由碎石堆變成無窮無盡嘅骷髏骨…
而「南轅」就向後面逃走咗…
「解籤先生，做乜唔追佢啊？」家姐問。
「「南轅」已經變咗做廢物，唔使追，反而我哋後面班男仔要理，D骷髏骨好可能變成怪物去攻擊佢哋，我哋就保護好佢哋先啦。」
「先生果然顧全大局。」我講。
我哋嘢都未講完，D骷髏骨就真係慢慢企起身喇…
「唔使驚，呢D骷髏骨好普通嘢，護身咒已經夠打佢哋。我去清理一下，你哋去睇睇後面班男仔先。」先生講。
之後，我哋兩姊妹就再去睇吓班男仔同老師點…
「你哋冇嘢丫嘛？」我問。
「冇嘢。」「細鬼」答。
「你哋呢？」家姐問。
「冇嘢，成個人好攰，郁唔到咁囉。」大寶答。
「你哋唔使理我哋，快D去搵返阿明阿輝佢哋啦。」阿倫講。
部份男仔係可以講到嘢，但係部份就好似死咗咁…
「攪掂！D男仔點啊？」先生佢清理完D骷髏骨問。
「講到嘢嘅都話自己冇事，但係點解有D男仔好似死咗咁嘅？」家姐問。
「Mmm…正常嘅，唔使擔心，反而…係講到嘢呢幾個有D唔正常…」先生講。
「咩唔正常啊？Eee…我嚟日本之後，已經接觸過幾次呢D靈異嘢，大師，唔知關唔關事呢？」「細鬼」問。
「哦， 唔怪之得啦，咁就唔奇喇，你哋幾個都應該係咁。人好神奇嫁，有一種適應嘅能力，開頭接觸呢D嘢就可能因為衰運或者命格等問題，但係接觸之後，就會越嚟越接近D鬼怪，其實係因為佢哋吸收咗靈界嘅力量。不過，我唔可以留低你哋喺度，太唔安全喇，而家一齊慢慢行去中心嘅石殿見「日本鬼王」啦。有我喺度，放心啦。」
「先生」雖然咁講，但係真係唔夠說服力…
頭先佢打「大惡鬼」同「南轅」嗰陣已經危危乎，而家仲要打「日本鬼王」…
大家點會放心丫，不過唔跟佢行就仲危險，所以大家只有無奈咁跟住佢行囉。
………
我哋互相扶持，總算可以行到呢個石殿嘅最尾，但係呢度…
「唔係吓話？走投冇路？」「細鬼」講。
「你收返埋你把臭口先啦。」大寶講。
原來呢度冇路可以走，因為前面有一塊巨牆，牆上面有三個凹位…
「唔通要放返啱位嘅嘢落去先開到？」「先生」講。
我見到地下有舊大得嚟有D閃光嘅石頭好似啱啱好可以放入去其中一格…
我隨手執起咗，好自然咁放咗落去…
(吱~)
佢發出閃光，似乎真係啱噃。
「細妹，你好叻啊，但係…其他兩舊呢？」
大家之後四圍搵…
………
可惜都係搵唔到…
「記唔記得我哋旁邊有兩座石殿啊？」「先生」突然咁問。
大家都及咗吓頭。
「我估另外兩舊就喺佢哋度，我亦估計「北鳳」同你哋D朋友就喺嗰兩座石殿度，仲要未打完添。」「先生」再講。
「乜原來我哋第一批打完架？佢哋會唔會有咩不測嫁？」「細鬼」講。
我聽到呢句，突然好擔心輝輝，眼淚就咁就流咗出嚟…
「收返埋你把臭口當做善事啦。」細寶講。
「細妹，唔使驚嫁。」
我見到家姐就諗起「袋袋」俾「日本鬼王」捉咗…
佢而家仲嚟安慰我，佢真係好勇敢堅強啊，我都唔可以咁懦弱…
「我哋要俾D信心，就休息一陣，等埋佢哋先一齊去消滅「鬼王」啦。」
「先生」講完就坐低咗，大家都跟住稍作休息。
我望望「先生」突然諗到D問題就問…
「先生，真係好多謝你嚟幫我啊，如果你有能力自己離開，記得要離開啊。」
「傻妹妹，嚟得救你就唔會留低你啦，你班朋友我都要救埋添啊！」
「嘿嘿，先生你真係…講嘢總係咁有自信，好容易俾到信心人嘅。」
「其實…我都係有少少私心嘅，我係想嚟睇吓一個…都唔知算唔算係我對唔住佢嘅人。」
「邊個啊？」
「你男朋友仔個老師，北鳳，陳鳳初，我當年叫佢初仔嫁咋。」
「你對唔住佢D咩啊？」
「關於佢師姐。」
「師姐！？」
「佢認定係我同我老豆殺咗佢師姐。」
「點解啊？你哋會殺人嫁咩？」
「唔係人，係鬼。當年「五絕大戰彊屍王」之後，我認識咗初仔，之後十幾年我都會同我老豆返吓大陸生活，亦會同初仔同佢師父交流，我哋都幾熟嫁，我當正佢係我細佬咁，所以佢都有講佢D嘢俾我聽，當年佢鍾意咗佢師姐，仲成日同我講佢點暗戀人哋，當時佢師姐仲係人，但係無耐，佢師姐因為一D意外死咗，我亦唔知點解佢師姐冇去投胎，去咗做遊魂野鬼，變咗鬼之後，反而同初仔產生真感情，人鬼殊途，所以我同我老豆，甚至佢師父都反對。之後，唔知發生乜事，我哋再聯繫唔到初仔同佢師父。過咗好多年之後，我喺香港遇返佢，但係佢就唔知做乜嬲咗我，仲最後俾我知道咗原來佢以為我哋殺咗佢師姐，呢件事真係奇怪，我亦一直冇辦法解決，因為係佢嬲我，唔係我嬲佢，所以我做乜都冇用。但係…人老咗，總係懷念以前，我只係想襯住呢次，解決埋大家嘅心結，希望攪清楚件事，邊個錯都唔緊要喇，我就只係想向佢道個歉，希望佢個心會好過D啦…」
「解籤先生，細妹，你哋睇吓！」家姐突然大嗌，似係發現D嘢。
我哋都唔傾計住，走咗去睇吓咩事…
「呢個機關睇嚟應該好廢，你哋睇吓呢舊石，後面原來係金屬片。」家姐再講。
「即係點啊？」「先生」問。
「你有冇金屬物品喺身丫？」
「Eee…銅錢劍嘅銅錢。」
「拎嚟試吓。」
一講完「先生」去攞銅錢俾家姐。
家姐將D銅錢放去凹位，點知…
(龐河河河~)
道牆向上開咗喇！
(待續)
下集預告︰
「陳Sir，陳Sir！」