米米蓮妖怪作品 -《旅行‧如此‧難以忘‧記 》(百集長篇): 第110集 ~ 明︰我要大戰「熊貓人」喇！
第110集 ~ 明︰我要大戰「熊貓人」喇！
阿欣嗰邊有「南龍」嘅「青龍劍」…
阿輝嗰邊有「北鳳」嘅「鳳凰火炎」…
我呢？得返…(我望一望自己對手) 兩梳蕉…
(家明，唔好咁啦，你仲有我丫嘛。)
(井上先生，係囉，你仲有我丫嘛。)
上次講到我同小倩跌咗落嚟呢度…
對比起「異域魔城」，呢度真係成個仙境咁。
我哋仲喺呢度遇到…
「盲俠展昭」同佢老婆「阿信」。
見到佢哋之後…
我好自然咁跪咗喺地下，為嘅就係…
「高人，求你幫吓我哋！」
「細路，做乜嘢啊？起返身先講啦。」
「我自從有咗D能力之後，就識得睇人嘅氣牆，以高人你嘅氣牆，最少都有「星」老前輩咁勁，你未必識得「星」老前輩，但係你肯定有能力幫到我哋，求高人你出手幫吓我哋。」
之後我向「盲俠」磕頭，希望佢應承。
「你俾個原因我，點解我要幫你？」
「我…」我一時間真係乜都諗唔到。
我反而突然諗起「星」老前輩曾經教過我要靠自己唔好靠人，但係…
「我哋雖然有「南龍北鳳」呢D高手喺度，可能你又唔知咩係「南龍北鳳」，但係我睇得出佢哋雖然係勁，可惜氣牆真係只可以最多同「日本鬼王」打個平手。仲有，我哋底牌係咩，我見到晒，至於壞人嗰邊，我真係唔知佢哋底牌係咩，好似仲有好多好多我未知嘅牌可以出咁。我哋校長俾鬼怪攪到入咗醫院，我朋友又俾「鬼王」捉咗，「南轅北轍東歪西斜」四大高手又好似企晒佢哋嗰邊，我哋真係好無助，即使我點樂天，我都呃唔到我自己個心，我係知道呢次我係要死嫁，我就連再同我父母報個平安都冇勇氣，我…我覺得…我死唔緊要，我只係想…想最少可以將我朋友喺「鬼王」手上救返過嚟…」
「家明…」小倩憐惜我。
「細路，我睇得出你係真心，你講嘅人我都識，仲要好熟添。」
「唔通…唔通前輩你就係三光之一，日光，岑日君？」
「我先唔係嗰條打壞，我真係叫牛展昭，不過出名喺日本，唔喺中國啫。仲有，我同你講嗰班人唔同，我係真材實料，意思係我真係可以唔靠靈力就以一敵百，因為我係一個真正嘅武俠，離開呢度，我就真係唔會喇，人世間太混濁喇，不過，我可以速教你武學之道。」
「武學之道！？」
「一個字，我老婆最叻嘅…」
我望一望「阿信」，但係諗唔到係乜…
「一個字，捱同埋忍！你捱唔捱得，忍唔忍到？」
我下定決心及咗吓頭。
「妹妹，你都要跟我練阿信神功！」阿信捉住咗小倩。
「我！？我唔想練啊，好辛苦嫁。」小倩。
「你唔想練啫，我要教噃！」
佢一手就拉走小倩，仲攞住支竹半打半教咁…
「丫~！丫~！吔媽爹~！丫~！」
我哋…
「你哋兩個做乜硬晒啊？」「洋腸」唔知幾時跟咗落嚟。
聽到小倩咁叫法，仲要「吔媽爹」，塵世間邊有男人唔硬晒丫。
「老婆，唔該走遠D先「交」！」(個「交」當然本來係個「教」字啦)
我睇「盲俠」真係要用盡精力先谷得出呢一句走音嘅說話。
…
「阿信」將小倩帶遠咗…
「前輩，我女朋友佢唔會有事嫁可？」
「放心啦，冇事嘅，你女友返嚟之後會成個阿信咁，你話一，佢唔會話二嘅。」
其實我真係有少少犯賤，完全言聽計從嘅女伴，我真係唔想要…
不過既然「阿信」都帶走咗小倩，而小倩又冇事嘅，咁就算啦。
「盲俠」亦都正式開始教我…
「哎吔！哎吔！」
佢一吓又一吓咁大大力用支竹打落我D手腳度…
「哎吔！哎吔！」
佢仲專打我D較位同神經反射區，打到我好自然咁做出一系列動作…
「嗌乜嘢啊？講咗要捱要忍家嘛！」
「我自己去行吓街先喇，你哋慢慢玩啦。」洋腸走開。
我就繼續硬食…
「哎吔！我係擔心咁樣學嘢法，未返上去就手腫腳腫咋。」
「你唔使諗，只需要信，亦必須要信，你有嘅時間，應該唔可能會多過一個鐘，你再留喺度太耐，我肯定你以為唔使見你班朋友。」
………
我就係咁，俾佢打咗好耐，有幾耐我就唔知，不過我而家手腳已經腫到硬晒…
「好！差唔多喇！我叫「細細粒」同你打，打贏佢你就可以畢業喇！」
我心諗，我除咗被虐打完，根本乜嘢都冇學過，仲要同人打？！
好在，對手叫「細細粒」，我諗應該仲勉強有得贏嘅…
(龐~ 龐~ 龐~ 龐~ 龐~)
後面傳嚟龐然大物嘅腳步聲…
「細細粒，你同呢個細路打吓，唔好打死佢就得。」
我另轉頭一望…
黑色！我再向上望…
白色！我再向上望…
熊貓頭！？
一隻九樓咁高嘅巨型熊貓人！
我再另返轉頭對住「盲俠」講︰—
「佢就係細細粒？」
「係啊，打啦。」
「我…」
「我咩啫？打啦。」
「我唔係話我唔想打，但係…我同佢打完應該都再冇體力返上去救我朋友啦…」
「我有仙豆，可以迅間補回體力。」
「唔係龍珠嗰隻丫嘛？」
「效果一樣。」
「細路仔，唔使驚，我會用我拳頭嚟鍚住你。」熊貓人講。
「用拳頭嚟鍚我？」我呢一刻唔知好嬲定好笑。
我睇到佢一身賤肉橫生，肉騰騰，毛茸茸咁，根本冇位可以入佢…
「係咪覺得冇位入佢呢？面對高手，一般都會有咁嘅錯覺，其實一定唔係咁，破綻永遠都會係破綻，再高嘅高手都一定有破綻…」
大佬啊，知道又點啫，事實我係睇唔到佢破綻丫嘛…
(嘭~！)
我仲諗緊嘢，點知「熊貓人」突然一拳就打埋嚟…
好在佢出拳慢嫁啫，我總算可以用「天馬行空」避開…
「唔好淨係用肉眼睇人哋嘅破綻…」
大佬啊，唔用肉眼睇，仲有乜眼可以睇啊？
(嘭~！)
諗完，「熊貓人」又一拳打埋嚟，我再次用「天馬行空」避開咗…
「你肯定諗緊唔用肉眼睇，可以用乜眼睇，答案係—心眼！」
心眼！？同阿輝隻「胃眼」係咪差唔多嘅嘢呢？
究竟我可以點呢？
「試吓合埋眼睇。」
呢一刻，我真係戇居到跟住做，但係…
我真係睇到D嘢啊！
「係咪睇到D以前未睇過嘅嘢？」
「係啊！黑抆抆！」
「仲有呢？」
「光雲！熊貓人身形嘅光雲…」
「我叫細細粒啊！」「熊貓人」再次用力打埋嚟，呢一吓仲要大力D。
冇錯，我係合埋眼睇到佢打出呢一拳嫁…
「我睇到佢破綻喇！」
我立即運勁，將所有力量集中喺我右手，再全力打出去…
「隔勒底，接我爆烈神拳啦！」
(待續)
下集預告︰
乜原來我哋第一批打完架？
註解︰
底牌 — 呢度講緊隱藏咗嘅能力。