米米蓮妖怪作品 -《旅行‧如此‧難以忘‧記 》(百集長篇): 第099集 ~ 欣︰球場係妖怪，仲嚟咗「神秘人」救我哋！？
第099集 ~ 欣︰球場係妖怪，仲嚟咗「神秘人」救我哋！？
正如輝輝同阿明所講…
因為得到「居居」幫助，我哋追返三比一；
因為得到「袋袋」幫助，我哋追到三比二；
因為得到大家同心協力，我哋終於追成平手喇。
不過，之後場內嘅過程我就唔多講，等輝輝同阿明講啦…
我想講嘅反而係場外面…
入第二球嗰陣，家姐真係好開心嫁，因為佢想正式交往嘅男仔…
「袋袋」佢好英咁入咗一球波。
但係，「袋袋」佢唔知乜嘢事，一返到後場，就變得好痛苦咁，嗰種痛法…
真係令人好心噏，佢痛到反晒白眼，個人就不斷抽搐，完全不由自主咁…
個口就一直咬牙切齒，雙手就不斷咁喺個地度爪，仲爪到出晒血…
我望一望家姐，原來佢已經喊到花面貓咁，仲激動到衝咗出場…
「牛頭馬面」抬起「袋袋」出場，家姐就一直跟住佢哋離開球場，去咗醫療室…
我身為人哋細妹，當然要睇住傷心嘅家姐啦。
「小姐，你哋唔入得嚟嫁！」牛頭姑娘講。
「點解啊？我係佢…朋友噃！」
「女朋友呀？即使係，都唔得啊，會阻礙傷者被治療嫁！」馬面姑娘講。
「女朋友」三個字令家姐面都紅晒…
但係唔俾入去，我哋唯有喺醫療室門口等啦。
呢段時間好似好漫長咁…
好在，呢度有個窗口位可以望返出球場睇吓輝輝佢哋嗰邊嘅情況…
我見到，輝輝佢哋追成三比三喇！不過…
我一另返轉頭，見到家姐擔心「袋袋」個樣，我心情就變得好複雜…
又想戥輝輝開心，又想替家姐擔心…
………
我同家姐就係咁，等吓等吓，又過咗十幾分鐘…
一直只係聽住「袋袋」嘅房裡面嘅慘叫聲…
「哇丫 ~~~ 依 ~~~ 丫 ~~~」
………
「你唔入得嚟嫁喎！哇 ~~~」
房裡面突然傳嚟好似係馬面姑娘嘅叫聲，我同家姐即刻敲門問︰—
「姑娘！係咪有乜事啊？…姑娘！姑娘！…」
「姑娘！姑娘？」
(嘭 ~！) 家姐終於忍唔住一腳就踢開道門。
我哋亦隨即衝入去裡面睇吓咩情況…
但係…點解…
「袋袋」佢唔見咗，牛頭姑娘同馬面姑娘訓咗喺地下，冇面醫生就呆咗，但係…
其實我都唔知佢係咪呆咗，因為佢冇面。
雖然我好緊張，但係我亦都唔知問唔問佢嘢好，因為佢冇口…
「醫生，發生咩事啊？病人呢？」家姐問。
「佢…佢俾「鬼王」捉咗…」
雖然我唔知醫生邊度發出聲音嚟…
但係佢話「袋袋」俾「鬼王」捉咗，我就知大件事喇…
家姐聽到呢個消息之後，傷心到暈低咗…
「家姐，家姐！」
「小姐，你可以放心，你姐姐佢冇事，需唔需要喺度休息吓丫？」醫生睇咗兩睇家姐之後講。
「唔使喇！」
呢度都唔安全嘅，我帶返家姐去搵陳老師佢哋好過。
………
我一出返球場…
「咦，欣欣，你姐姐做乜事啊？」陳老師問。
「嗚…嗚…嗚…」我對住陳老師喊起上嚟。
「欣欣乖，唔好喊住啦，究竟發生咩事啊？」
「袋袋佢俾鬼王捉咗啊，家姐傷心到暈咗…」
「咩話？祥仔俾鬼王捉咗！？唉…」
「其實都係意料中事，你都唔使太擔心，祥仔唔會死住嘅，鬼王係想將佢變成大惡魔啫。」陳老師皺住眉頭再講。
「咁…輝輝佢哋場比賽點啊？」
「而家就嚟加時都踢完，準備踢十二碼，三比三之後，佢哋刻意去守和，唔贏亦唔輸，為嘅就係拖時間。」
之後，我亦暫時冇出聲，一直睇住輝輝佢哋同暈咗嘅家姐…
………
(咇 ~~~~~！)
加時完場，準備十二碼，但係…
(龐趴 ~！洪洪 ~！隆隆 ~！)
天空突然滿佈烏雲，仲雷電交加咁…
「哈哈 ~！你哋以為拖時間有用咩？而家我唔玩波喇！我要你哋全部都要死！」
天空突然傳嚟「鬼王潮童」嘅聲音…
佢啱啱先講完，現場就一片混亂…
「哇丫~！」
「救命啊~！」
「走啊~！」
所有現場觀眾都癲晒咁，大家都想離開呢度…
(龐龐龐 ~！龐龐龐 ~！)
成個球場就好似郁動緊，我見到…我見到…
球場上面個天幕變成滿佈尖牙利齒咁…
而且牆邊同地下都開始滲出一D液體…
「丫~~~！好痛啊~~~！」
D液體似乎係帶有腐蝕性嘅…
「大家快D返埋嚟先！」陳老師大嗌。
「輝輝，你冇事丫嘛？」
「我冇事，場內隊友都冇事，欣欣，你家姐…」
「家姐冇事，係傷心到暈咗。」
「傷心！？大袋呢？」
「俾鬼王捉咗！」
「而家唔好理其他住喇，諗咗點離開呢度先啦！」阿狗講。
「呢個球場根本係隻妖怪嚟，我哋而家喺佢個肚裡面，要離開呢度，似乎就只有天上一個出口！」連陳老師都咁講。
唔通，我哋就要喺度慢慢被消化？
「陳Sir！我用天馬行空，一個一個帶你哋走得唔得呢？」阿明講。
「唔係唔得，但係你睇吓隻「球場妖怪」個口，我驚你飛上去嗰陣，佢咬你一啖就呵可喇。」
「呢樣唔得，嗰樣唔得，咁我哋可以點呢？」輝輝問。
「都唔使太擔心，你哋嗰十幾個人我一定可以保護到，但係呢度D鬼怪就…」
原來陳老師根本唔係擔心我哋走唔到，而係擔心其他妖魔鬼怪…
呢D係咪就係大愛啊？
(嘭 ~！龐 ~！) 天空突然傳嚟兩聲巨響…
我向上一望…
我見到…
鏡！？點解上面又有個足球場嫁？仲有…
兩隻巨型嘅手？佢哋抓開咗呢隻「球場妖怪」個口。
究竟發生咩事啊？天上面個球場仲好似熟口熟面添嫁！
「咩話！？香港大球場？」王老師最熟呢D嘢，佢大嗌咗出嚟。
乜原來係我哋香港嘅大球場啊！？佢過咗嚟救我哋？
「妹妹！唔好意思啊，我遲咗，我嚟救你哋嫁！」
一把似曾相識嘅聲音喺「香港大球場」嗌過嚟啊！
我認得喇，係「先生」佢啊！
(待續)
下集預告︰
異域魔城！