米米蓮妖怪作品 -《旅行‧如此‧難以忘‧記 》(百集長篇): 第098集 ~ 明︰「大袋」唔掂，就等我嚟啦！
第098集 ~ 明︰「大袋」唔掂，就等我嚟啦！
「金翅仆佳鳥」並唔係一個招式，純粹只係想講粗口。
好在，就係有「大咀」個「大咀」頂咗一吓，所以，我哋仲未失波…
個波仲彈返咗出去，去咗「童子」隻手度，攪到佢攞咗第一張黃牌添。
不過，佢老羞成怒，追住「大咀」個嘴嚟射，為嘅…
好明顯就唔係入波，係要射爆「大咀」個嘴。
佢成功咗，仲順便入埋波，領先我哋一比零。
之後，阿狗諗咗條「屎橋」出嚟，話可以趕走條死人「童子」喎…
不過，其實係好冒險嫁，如果佢唔中計，我哋就「呵可」喇。
阿輝佢忍辱負重，跟足阿狗條「屎橋」，連傳三次俾「童子」去入波，為嘅…
就係要「童子」攞第二張黃牌。
「屎橋」到最後真係成功咗，呃咗「童子」用手入波，佢亦只好無奈離場…
但係，就造成而家三比零嘅戰況，我哋輸緊，我哋真係要急起直追喇！
好在，之後得到「居居」嘅幫助，總算可以追返一球，半場就係咁樣完咗。
………
下半場一開始，「大袋」條友就好似癲咗咁，表面上，我哋係喺佢旁邊保護佢…
但係實際上，我哋根本只係陪住佢走…
佢根本冇理過其他人同妖怪，一直就逆風衝去對手禁區…
到咗禁區，佢就企到定一定咁喺十二碼點…
佢就當十二碼咁直射個波，唔啱，佢根本就係「射龜」咁射，而佢嘅目的…
根本就係想射死隻「石牆」，我見到佢咁，真係有D心寒。
(咇 ~~~~~！)「三比二！」
全場冇歡呼聲，只有一片寂靜，就好似哀悼「石牆」一樣。
「睇你哋仲有邊個可以阻我入波？」大袋佢…
就連講嘢嘅語氣都唔同咗。
「狂風老妖」對「大袋」應該再起唔到任何作用，睇嚟我哋有機會贏，不過…
都係算啦，而家都唔理得咁多喇。
佢哋換咗第二道「石牆」出嚟做「龍門」。
但係，估唔到嘅係，「大袋」一返到後場就…
「哇丫 ~ 丫 ~ 嗚哇 ~！」
佢噤住自己個頭，訓咗喺地下，典來典去咁…
嗰種痛法就同佢第一次俾「童子」條蛇咬嗰陣一樣。
「大袋！」「大袋！」「大袋！」大家都亂晒…
而「紅髮青椒」佢哋竟然襯呢個時候開咗波，仲傳咗個波俾隻「掃把腳」…
佢乘住「狂風老妖」所吹嘅風，一吓就飛到去我哋禁區，仲…
「無敵掃把腳！」
佢射波啊！
(噗 ~！)
「你哋唔使驚，有我喺度！」
「達叔」將個波撲咗出底線，而我哋就襯空檔去睇睇「大袋」先…
「牛頭馬面」又再出咗嚟，仲將「大袋」抬走咗…
「而家，得返我哋三個，睇嚟可能要用阿明個方法喇。」「喪狗」講。
「咩方法啊？」
「吞咗個波，再衝入龍門。」「喪狗」答。
「好，咁等我嚟啦！」
「係喪狗你先答佢嫁咋，死返出去先啦，洋腸！」我講。
「洋腸，呢D粗重嘢都係等居居嚟啦！」阿輝講。
「汪 ~！汪 ~！」
「喂，你哋得未啊？好在人哋隻「掃把腳」有體育精神俾返個波我咋，唔係我俾人狂攻緊喇，你哋仲傾計？」達叔講。
達叔講完就將個波掟咗俾阿輝…
「居居，準備好未啊？」
「汪 ~！」
「居居」一啖就吞咗個波，仲即刻向對方龍門狂跑…
(咇 ~~~~~！)
好可惜，唔係入波嘅笛聲…
「哥連拿」走咗埋我哋度，扮晒警告我哋咁同我哋講…
「咁做會太過份嫁，如果俾你哋入咗，觀眾肯定踩台，所以我勸你哋唔好喇！」
「贏到就得啦！唔係咩？」阿輝問。
「你真係入世未深，唔明白世情，你知唔知做球星最緊要係咩啊？同影星，同歌星一樣…」
我哋一時之間真係答唔到佢。
「水能載舟，亦能覆舟，做影星，最緊要有影迷；做歌星，最緊要有歌迷；而做球星，最緊要有球迷；你哋要籠絡佢哋嘅心，所以一定要顧及佢哋，到咗適當時候，話唔定，佢哋可以幫到你好大忙嫁。」
「但係…呢樣唔得，嗰樣唔得，咁我哋點贏啊？」我問。
「阿明！」「喪狗」嗌。
「又點啊？」
「天馬行空！」
「天你阿馬個行空咩… 」我第一時間嘅回應，但係…
「咩話！？我嘅「天馬行空」！？我應該點做啊？」
「無錯，你要用「天馬行空」帶波飛上天，風點吹，你都只會喺空中，「狂風老妖」同「石牆怪」佢哋始終有生命，老妖會吹到冇氣，或者要換氣，石牆亦一定會向上望而露出罅位，所以，一陣就靠你喇！」
「喪狗」咁講，就好似將個波已經交咗俾我一樣，我一定唔可以辜負佢哋嫁…
「好！」
要入第三球波，梗係要整返首歌啦！
(長傳急攻踢法陳舊 ~)
雖然係對手開波，但係「喪狗」迅間就搶返個波，仲…
(現代的足球整體戰入手 ~)
大腳向住對手龍門方向將個波踢咗上天…
(全場奔走永無走漏 ~)
而家，所以人同妖怪都跟住個喺空中嘅波走…
(猛虎衝力都可以射球 ~)
不過我未射，我只係即刻用「天馬行空」飛咗上天去追個波…
(底線出界 ~)
未出！我趕得切喺底線度撈返個波…
(從左邊彎到右 ~)
我再一腳傳中，傳俾走好位嘅阿輝…
(直接攻擊對手 ~)
阿輝即刻嚟個凌空抽射，不過被擋出…
(最後關頭~ 就要放棄去守 ~)
而家，就連達叔都衝咗出嚟，佢再一腳踢咗個波上天俾我…
(出倒掛金勾 ~)
我即刻嚟個 —「倒，掛，金，勾！」好可惜，都被擋出…
(我要改寫積分牌上雙方的比數 ~)
但係換嚟嘅，係我更旺盛嘅鬥志…
(穿起波衫縛好波鞋認真的態度 ~)
就連廿四秒先郁得一吓嘅隊友都排成一條人牆，幫我哋擋風啊！
「高速閃身 ~！」「喪狗」。
「推左走右 ~！」阿輝。
(起腳要一早~)
「得喇！等我嚟啦！」當然係我嗌啊！「無敵射穿牆！」
(貼柱掛網我亦射得到~)
多得「大袋」之前嘅凶狠，「石牆怪」俾我嚇窒咗，以為我真係會射穿佢，而個波就貼住柱掛住網咁入咗喇！
(連阿叔都讚好~)
「好波 ~！」
(連阿媽都讚好~)
「好波 ~！」
(連，阿姐阿哥阿吱阿喲~ 都，讚，好~)
(咇 ~~~~~！)「三比三！打和喇！」
(待續)
下集預告︰
咩話！？香港大球場？
註腳︰
1) 呵可 — 弊，弊家火之類，失敗之後仲帶嚟一D惡果。
2) 射龜 — 用足球玩嘅一種遊戲，輸者企定定俾勝者射，不過細路仔玩多，大力極有限，所以冇乜傷害性，純粹玩吓。
3) 體育精神 — 呢樣嘢好抽象，仲難解過「越位」。呢集嘅意思講緊隻「掃把腳」妖怪冇因為阿明佢哋嗰邊D人睇緊受傷倒地嘅「大袋」而攞便宜不斷狂攻，反而好有心咁先俾返個波阿明佢嗰隊個守門員「達叔」。
4) 踩台 — 對台上表演者不滿而做出破壞行為。
5) 首歌係李克勤嘅《現代足球小將》。