米米蓮妖怪作品 -《旅行‧如此‧難以忘‧記 》(百集長篇): 第096集 ~ 欣︰係啦，隻「鬼王」黐線嫁。輝輝，加油！
第096集 ~ 欣︰係啦，隻「鬼王」黐線嫁。輝輝，加油！
「哥連拿」三個字一出，就連「酒吞童子」呢隻咁嘅「鬼王」都冇晒符…
佢只可訓喺地下度扭計，佢咁廢咁，都係叫佢做「潮童」算喇。
輝輝襯佢哋理論嘅呢個空檔，即刻就嗌阿明去搶攻…
之後，輝輝﹑阿明﹑阿狗，三個合作，總算造成咗第一次攻門…
(嘭~！)
可惜，對手幾奸啊！竟然搵道「牆」嚟守龍門喎，我哋點入噃？
個波仲飛返去我哋嗰邊個龍門度，好在…
我哋「龍門」幾勁啊，用個口就擋咗個波，個波仲…
飛咗去「潮童」度，而且攪到佢「Hand Ball」同攞咗張黃牌添啊！
原來踢波踢得勁，係可以去到呢種境界嫁，真係好犀利啊！
好可惜，擋咗個波，累咗隻「羊」，一隻「嬉羊羊」因為太嬉皮笑臉喇…
所以激到「潮童」發脾氣，佢仲就將「嬉羊羊」食咗…
罰球雖然係我哋開出，但係就俾對手隻「紅髮青椒」攞咗個波…
仲交返俾「潮童」添…
佢真報仇咁報，佢竟然…踢到我哋個「龍門」…
唔講喇！佢黐線嫁，整到人哋成身都係血，入波咪入波囉，使唔使咁茅啊？！
佢真係好討厭啊！但係…
咦，我見輝輝佢哋好似密謀緊D嘢噃！
而隻「潮童」就無端端行到場邊同個阿叔理論，睇嚟個阿叔都唔少嘢噃。
講返輝輝個受咗傷嘅朋友先…
牛頭馬面！？幾時轉咗做救護員嫁？佢哋兩個抬走咗輝輝個朋友…
當王老師諗緊想出邊個隊員之際…
一個熟悉嘅身影喺我後面行出嚟…
「請換入我！」
係美奈子啊！
「師兄！？」陳老師望到佢，仲突然咁講。
乜呢個世界好似咁多師兄咁架？連美奈子都係佢師兄！？
「黃老師…」我講。
「咩事啊？」
「佢係你師兄！？」我問。
「係啊，佢就係我失散多年嘅師兄喇！」
「係咪…即係偷咗嘢走咗嗰個啊？」係「先生」之前講我聽嫁。
黃老師呆咗一陣，仲有少少嬲咁樣…
「哼，肯定又係嗰個「白百蟲」講嫁啦，佢有冇…講過…我師姐啊？」
「師姐！？」
「冇就算啦！」
我俾佢攪到我亂晒，不過之後佢解釋返原來達叔先係佢師兄…
至於美奈子就唔關事嘅，佢師姐又係另有其人。
「黃老師」講完之後，就走咗前去同王老師講嘢…
淨係見到王老師及咗吓頭就俾咗「達叔」出場，「哥連拿」都批准咗。
而場邊兩個講波佬就咁講︰
「嘩，呢個阿叔都學人做香港代表啊？」
「阿叔好失禮你咩？你都唔識貨，香港D阿叔先好波啊！」
「阿伯會唔會仲好D啊？」
佢哋你一言我一語咁，原來踢波仲有D咁嘅趣味喎。
「達叔」出咗場，我見輝輝佢哋即刻捉住佢傾咗陣…
唔通佢哋諗都咩計仔可以羸？
「餓呢，餓呢，餓呢，餓呢！」乜D鬼怪成日都咁肚餓咁嫁。
「家明，加油！家明，加油！」小倩真係一個好好嘅女朋友啊。
「鉅祥，鉅祥，踢波，最強！」家姐都癲埋一份。
「狗狗，狗狗，踢波，用手！」究竟阿妮知唔知踢波係用腳嫁？
等我都支持吓輝輝先…
「朱嘉輝，你好有型，好靚仔啊！」
輝輝佢一開波，就開咗俾…
「潮童」！？
係咪我嚇親輝輝呢？攪到佢傳錯波？
「唔該晒噃！」
「你恃住對腳利害喳嘛，夠膽唔用腳入波丫！」
「潮童」嗌一聲「好！」就抆甩咗自己頭出嚟…
再將自己個頭連住條脊骨，成支「珍寶珠」咁…
「鬼王硬頂！」
佢用雙手揮動「珍寶珠」去頂個波，就好似打哥爾夫球咁，個波…
(咇~~~~~！)「二比零！」
「達叔」唔係出去守龍門嫁咩？做乜佢唔擋波啊？
不過，講到尾最衰都係我，做乜嘢嚇親輝輝，攪到佢傳錯波噃…
試吓調轉嗌先…
「朱嘉輝，你好樣衰，好乞人憎啊！」
(咇 ~~~~~！) 開波。
點知…
「吓！？咁冇體育精神呀？不過，再唔該你噃！」「潮童」講。
輝輝做乜嘢啊？又傳個波俾「潮童」！？
「車，你恃住個頭利害喳嘛，夠膽唔用頭入波丫！」
「潮童」嗌一聲「好！」就抆甩咗自己條…
唔講喇，D男仔總係咁肉酸嘅…
「鬼王硬FING！」
(咇 ~~~~~！)「三比零！」
輸成咁，輝輝佢哋點算啊？
「朱嘉輝，人哋好擔心你啊，衰人！」我大嗌
(咇 ~~~~~！) 再開波。
(噗 ~)
輝輝佢就好似傻咗咁，又開咗個波俾「潮童」，而我就真係喊咗出嚟…
(嗚嗚嗚 ~ )「輝輝係咪傻咗啊？呢場波輸咗，大家都要死嫁…」
「車，你恃住條嘢利害喳嘛，夠膽用手入波丫！」
吓！？
「潮童」依然嗌一聲「好！」就用手一吓拍咗個波入網…
… (全場都呆咗)
(咇 ~~~~~！)「HAND BALL！兩黃一紅！立即離開球場！」
「哥連拿」咁講，仲用佢凌厲嘅眼神兇「潮童」…
「潮童」想發嬲都唔得，唯有無奈咁離開球場…
「YEAH~！」「YEAH~！」「YEAH~！」全場大嗌。
就連D鬼怪都冇一隻支持「潮童」，做「鬼王」做到佢咁，都算折墮囉！
原來係咁，唔通輝輝頭先咁做係戰術嚟？佢想趕走「鬼王」？
不過…
「鬼王」臨離開球場之前，同佢D隊友好似交代咗D嘢咁…
佢仲好似好有信心咁…
之後佢就離開咗球場。
…
我冇再理佢，睇返我輝輝先…
「係我哋反勝嘅時候喇！」
我亦都做好晒支持嘅準備喇！
(咇~~~~~！)
(看看威風的他~)
輝輝開波喇！呢次冇交錯啊！
(雙腿好似摩打~)
佢交咗個波俾阿明，佢就走上前喇！
(扭波踢波頂瓜瓜~)
阿明再交返俾輝輝，佢扭過一個，就直接傳咗個波出去…
(有嘴巴的都讚他~)
「朱嘉輝，你好有型啊！」
(身手最啿誇~)
「身手最啿誇~！」唔識郁嘅隊友都出聲支持啊！
(小子志可嘉~)
「小伙子志可嘉~！」陳老師﹑王老師同張老師講嫁！
(陣法腳法日練夜練~)
「真功夫冇花假~！」講波佬都出埋聲啊！
(踢得好~ 誇啦啦~ 活力拼勁加兩把~)
阿狗走位去攞返個波，佢跑起嚟真係成隻狗咁啊！仲傳咗個波俾「袋袋」…
(射波招式創新~ 一絲不會差~)
射波就射波啦！唔使一絲不掛呀？！「袋袋」做乜甩褲嫁！？
「條褲頭帶鬆咗咋！攻呀攻~ 快搶攻啦~！」「袋袋」甩住褲都傳咗個波俾輝輝。
「知喇！射呀射~ 射它吧~！」輝輝再傳俾阿明。
(穿梭對手之間~ 獨有腳法像玩耍~)
阿明雖然係後衛，但係原來佢扭波咁叻嫁喎！
(歡呼聲~)
「家明，加油！」
(與讚美~)
「鉅祥，好波！」
(出於他的腳下~)
「狗狗，記得踢波要用腳啊！」
(攻呀攻~ 快搶攻~ 射呀射~ 射它吧~)
佢哋四個平排，你傳俾我，我傳俾你，攻到入禁區喇！
(扭得好~ 踢得鬼馬~)
佢哋仲喺禁區又傳又扭咁，最後喺輝輝腳度…
(可稱霸只有他~)
「居居，靠你喇！」
居居！？關居居咩事呢？
(待續)
下集預告…
咩話？狂風老妖！？
註腳︰
潮童 —「在性格方面，與他們不熟悉的人會覺得他們冷酷，關係友好的人會覺得他們瘋狂」上網係咁解，不過有D怪。呢個故事度，解為傻仔就得。
隻歌係張衛健嘅《足球小將》