米米蓮妖怪作品 -《旅行‧如此‧難以忘‧記 》(百集長篇): 第093集 ~ 欣︰咁我試吓講少少波啦，最後仲會出現咗「佢」！？
第093集 ~ 欣︰咁我試吓講少少波啦，最後仲會出現咗「佢」！？
上次我講到喺陳老師同黃老師個房度見到條乾晒嘅屍…
我開頭仲以為係黃老師俾邪魔外道殺咗，仲將佢整成咁…
但係，原來佢幾衰啊 ！竟然整咗個陷阱嚟害我哋…
好在，有陳老師喺度咋，唔係我哋成班人都中晒毒喇！
(細妹，放心啦，如果冇陳Sir，我哋都入唔到呢個房啦，又點會中毒呢！)
咁即係點啊？D毒…係想害陳老師？
唉，我都唔理得咁多喇，總知呢度就因為陳老師而冇事喺啦。
但係…阿狗手上封信叫我哋…
「好！我哋就去「大阪市長居陸上足球競技場」度會一會佢，睇吓佢攪得D乜都好！」
去呢個足球場！？黃老師或者係個神秘人究竟想做咩呢？
我擔心起嚟咪講囉︰—
「陳老師，「肥高人」我哋已經聯絡唔到，我有個朋友，佢都好犀利嫁，不如等埋佢先一齊先去丫，佢叫「白百龍」啊！」
但係，佢似乎唔係太鍾意「先生」佢，所以佢一句「唔使」，我就再冇問嚧。
之後，大家都跟住陳老師佢出發去嗰個足球場。
………
而家，我哋班人有我﹑輝輝﹑家姐﹑袋袋﹑陳老師﹑阿明﹑小倩﹑阿狗﹑阿妮﹑荷瑪﹑洋腸﹑仲有…
「居居」都跟咗嚟，但係…點解好似唔見咗阿明公公嘅？
我諗，頭先佢哋梗係去咗送公公佢上路喇，我記得喺地鐵度佢哋講過D咩投胎咁嫁。
………
唔經唔覺，我哋都到咗球場喇，呢度就好似「鬼門關」咁…
唔知邊度嚟種感覺，覺得入到去，就好有可能返唔到出嚟咁，個心有D驚，有D怕啊。
門口又的確好配合咁，等我哋一入去，就「嘭」一聲閂埋咗…
我哋入到去…場內就有把廣播聲音叫我哋去更衣室，好似一早就等緊我哋嚟咁…
仲唔單止咁，連球場出面都好嘈，睇嚟呢次…
我唔敢想像喇，我淨係捉緊輝輝隻手，跟住佢行。
………
「麗麗，呢度男更衣室嚟嫁，你唔係想跟埋入去呀？」
「袋袋」雖然咁樣同家姐講，但係我都真係好想跟埋去啊！
得返我哋幾個女仔喺門口，好驚家嘛！好在…
「妹妹你哋四個唔好入住，我唔會閂更衣室呢道門，我帶頭行入去，你哋四個男仔排成人鍊慢慢行入嚟。」
陳老師都總算錫住我哋。
我哋就係咁，排成一條人鍊，慢慢行入去…
我戰戰兢兢咁，唔敢四圍望，直至…
「哇！陳Sir！我啊！Kenny啊！」
「係我哋啊！」
咦，咁似輝輝朋友嘅聲嘅，但係我都唔敢行前去望，因為…
點知人哋有冇著衫褲噃。
「唔好理啦，都唔係啊，係踢足球啊。」
我冇望，淨係一直揸住輝輝隻手，一邊聽佢哋講嘢，不過…
佢哋講嘢我都唔明嘅，呢度係足球場，當然係踢足球啦，講嘢都怪怪地嘅。
「呢度有個窗口，你望完我哋對手個樣先講我諗會好D。」
輝輝扯住我行咗去窗口位，我亦都見到晒佢班朋友喇，原來都著好晒衫嘅…
但係，我望返去輝輝度，點解佢個樣咁嘅？
我跟住佢望嘅方向去望，而家…
原來足球場上面已經有一隊妖怪等緊輝輝佢哋開波，仲望晒上嚟添…
至於佢哋係咩樣，一陣落場先講啦，總之冇好嘢啦！
「請香港代表隊出場！」場內突然廣播。
「你哋恨到啦！做香港代表喇！」
「睇完點啊，阿輝？」
「感覺還可以。」
「你唔係覺得可以贏呀？」
「最多咪輸！」
「你會唔會太天真啊？」
「同妖怪踢波同陪太子讀書一樣，伴君如伴虎啊！」
「邊有得贏丫！」
「胖虎係咪即係技安啊？」
「妖，你去死啦！」
「你哋換返正常裝先啦，我哋就去正正常常踢返場波囉！」
「好~~~」
佢哋都冇嚟心機咁嚧。
「你哋好，我係負責帶你哋出去…嘻嘻…死嫁！」
一隻小妖怪走咗入嚟，講嘢仲鬼死咁乞人憎！真係想打巴佢。
不過，我冇咁做到，大家換返正常球衣就跟住呢隻乞人憎嘅小妖出場喇！
………
「餓呢~ 餓呢~ 餓呢~ 餓呢~！」
出到場，全場都咁叫，個感覺就好似一班餓鬼等住食我哋一樣。
呢個場好大，全場幾萬個座位滿晒，都係妖魔鬼怪…
我一望埋去，佢哋仲玩緊「鬼浪」…
我哋同後備球員一齊坐，輝輝就正選出場…
但係呢D時候，係咪做後備好過正選呢？
我坐低咗，就只有祈禱，同聽佢哋講嘢。
「踢法照舊，穩守突擊，由Kenny策動攻勢，阿明你負責釘死人哋前鋒…」
阿明突然舉手。
「王Sir，唔釘得唔得啊？你睇吓隻妖怪個樣，好似想食人咁款，你叫我跟住佢？」
王老師望一望出面…
「咁算啦！大家自由發揮，唔死就好喇，出場啦！」
好似好勉勵咁，但係又好似推D學生去死咁，D老師總係做埋呢D嘢嘅。
「王Sir，D鬼怪應該唔介意我哋用邊十一人出場嘅，不如，我都出埋場丫！」
陳老師呢D叫做有承擔，佢呢D先係老師嚟家嘛！
「陳Sir，唔使喇，你幫我哋保護D女仔丫！」
輝輝，好英啊！
佢哋之後走咗入場…
(咇~~~！)
開波喇！小心啊！輝輝！
對手先開波，一開波，有隻好似鴨咁嘅妖怪就一腳抽射，仲大嗌︰—
「天上地下唯我獨尊射球！」
力量好強大啊！個波就好似炮彈咁！但係…
點解佢向上踢嘅？
我雖然唔係好識踢波啫，不過都知個波係要射入龍門先有分啦。
全場球員﹑球證，就連球迷都望晒上天，好虔誠咁祈求個波會跌返落嚟…
………
唔經唔覺已經5分鐘喇，個波仲未跌返落嚟囉…
咦，係個波啊！跌返落嚟喇，但係…
(咔勒~！咔勒~！咔勒~！咔勒~！咔勒~！)
全場突然傳嚟一大堆咁嘅聲！咩事呢？我見到…
一個妖怪嘅頭碌咗喺我腳邊…
原來係大家條頸望上去太耐喇，好多妖怪條頸都硬咗…
見到個波一跌落嚟，成班都望返落嚟，點知…
連條頸都斷埋，個頭甩咗落嚟…
「哇丫！波啊！天上地下唯我獨尊射球！」
(嘭~！)
個波又俾隻鴨妖射咗上太空，大家又唯有望返上去繼續祈禱…
我好心咪執起頭先喺我腳邊嘅頭幫佢望返上去囉…
佢哋就繼續望住個波，我冇乜興趣咪同…
連小倩﹑阿妮同家姐都望咗上天，我唯有同荷瑪傾啦。
「足球比賽咁悶，點解D男仔咁鍾意睇波嘅？」
「睇波唔係關鍵，佢哋最鍾意係D女仔問佢哋呢樣嘢，之後喺女仔面前威！」
「邊樣嘢啊？」
「你知唔知越位係咩丫？」
「我知，我知，身體好多，噤落去痹痹地嘅！」
「唔係身體D穴位，係足球術語，越位啊！」
「超越個越呀？我諗…過咗唔知邊位咁囉！」
「嗱！呢，見唔見到龍門旁邊有條線啊！出咗條線咪越位囉！」
「嘩，荷瑪，你好叻啊！」
「梗係唔係，過咗禁區條線先啱啊！」阿妮講。
「好似唔係，好似係小禁區條線先啱。」小倩講。
「你哋都唔識嘅，係過咗對手條最後防線啊！」家姐講。
「家姐，你好叻啊！但係…最後防線喺邊嫁？」
「Eee…守龍門嗰個人就係喇！」家姐再解。
「哦~！」「哦~！」「哦~！」我哋三個女仔都表示明白晒。
「無錯！就係咁喇，D男人就係鍾意問到你唔識，之後講到幾頭頭是道咁樣，喺你面前威威，佢哋成日睇波都係等你哋問呢個問題咋。」
「唔該晒你啊，荷瑪，下次我都扮唔識，問吓輝輝佢，等佢威吓先。」
「喂，個波跌返落嚟喇！」家姐大嗌。
「唔知會唔會又踢返上去呢？」小倩講。
「條頸有D攰喇！」阿妮講。
「再踢返上去，我就忍唔住衝出去殺死佢嫁喇！」家姐再講。
「妖怪朋友！你做乜嘢啊？」我問個妖怪頭。
「俾你哋頭先嘅對話激死咗啦。」陳老師突然咁講。
至於出面…
「哇丫！波啊！天上地下唯我獨…」
………
突然，全場靜晒，因為…
「酒吞童子」佢一啖食咗隻鴨妖，冇人，亦都冇妖怪敢出聲…
我都唔記得咗介紹敵方球員添，無錯「酒吞童子」就係敵方嘅隊長。
「浪費咗我足足十幾分鐘，唔食咗你真係難消我心頭之恨。叫第二個出場！」
「冇球員離場，唔可以俾第二個出場！」
「你邊位啊？喺我地頭博我嘴，你係咪唔想活啊？」
但係…
個球證竟然唔驚，仲用佢凶狠嘅眼神啤住「酒吞童子」，之後講︰—
「世界最佳光頭球證，哥，連，拿！」
(待續)
下集預告︰
小你媽媽個些丫！牆嚟嘅？
註腳︰哥連拿係意大利一位足球裁判，光頭係佢象徵。呢位曾執法意大利甲組足球聯賽嘅球証執法唔少國際賽事，當中包括世界杯，佢最犀利嘅地方係…當佢啤住你，塵世間係冇一個足球員夠膽再博嘴嘅，好霸氣嫁！