米米蓮妖怪作品 -《旅行‧如此‧難以忘‧記 》(百集長篇): 第092集 ~ 明︰踢波D嘢留返得閒再講啦，我呢邊有要事要處理…
第092集 ~ 明︰踢波D嘢留返得閒再講啦，我呢邊有要事要處理…
如題，我呢集真係唔得閒追返個時間線去阿輝嗰邊，因為我有重要事要做啊！
我自己嘅上集講到「喪狗」個死仔又幾鬼叻噃…
解通咗個密碼，仲帶我哋去「沙婆婆」屋企度搵出口添。
好在，我都唔輸蝕，好快咁喺「沙婆婆」屋企搵到個出口…
不過，當然係我「賢內在」小倩佢幫我手搵啦。
我哋好快咁就離開咗呢個鬼地方，仲好快咁就上咗返酒店嘅地鐵…
我之前都講過啦，我其實真係好擔心我阿公家嘛…
我睇一睇個錶，好在，而家先大約十一點，應該趕得切。
「阿公，一陣乖乖地啊，快D同我去投胎，知唔知啊？」
「點解好似你先係我阿公咁嘅？」阿公回應我。
「家明公公呀，我哋會陪你去嫁。」小倩佢好溫柔咁講。
「咦，人哋唔想走啊！人間咁好玩，一陣我投胎，閻羅王話我衰鹹濕，要我下世做雞咪大鑊。」
「放心啦！你唔會係雞，你肯定係萬能插蘇，前後左右都俾人插！」我頂佢唔順，所以出口都串串地。
「衰仔！」
「哎吔！」
被佢打咗吓個頭添，但係…唔知點解覺得好親切，好開心。
「家明公公呀，你唔好扭計啦，你咁錫家明，係個好公公嚟，你一定可以繼續做人嫁。」
「孫新袍仔，你真係氹死人嫁，不過你唔使咁叫我啦，你直接跟明仔佢叫我做公公啦。」
唔經唔覺，呢幾日大家都真係成長得好快，就連小倩佢都講嘢有晒尾音喇。
阿公之後摸摸小倩個頭，但係個樣就好似仲有D心事咁…
所以我又忍唔到口問多佢一問…
「阿公呀，你做乜仲有心事咁啊？」
「你個衰仔，仲好講，我想飲返杯孫新袍茶都冇啊！」
「得啦！返去酒店即刻整返杯你嘆吓！」
「家明啊！人哋…幾時話…做你老婆仔嫁？」
D女人真係口是心非，都等咗我成世人啦，仲扮乜鬼嘢啫，不過女人係要氹嘅…
「你唔嫁俾我，我都唔會再娶嫁喇，等到你嫁俾我為止囉。」
小倩佢紅晒個面仔，好甜好可愛啊！而阿公就…
「車，咁求其…但係都好嘅，起碼有得飲返吓丫。」
「去投胎嗰度可能要成半個鐘，你哋未必有時間飲茶。」「光管陳」突然插口。
「鳳初兄啊！」
「係啊，係啊，我睇D書都好似話投胎要D時間嫁！斟茶遞水攪儀式呢D嘢可能攪唔切。」「洋腸」都插埋把口。
「阿龜兄！」
阿公似乎美夢被「光管陳」同「洋腸」破滅得好嚴重，而家…
佢個樣一片愁雲慘霧咁。
「光管陳」見到佢咁，亦都好尷尬，好似好心做壞事咁，至於「洋腸」就…
依然嘻皮笑臉，喺呢個時刻，真係有D乞人憎，哈哈…
………
我哋就係咁，開開心心尷尷尬尬咁就返到去酒店。
一返到酒店，阿輝阿欣佢哋自己返房…
我就同小倩﹑阿公﹑「光管陳」同「洋腸」一齊返去我房…
「細鬼」依然唔喺房，我哋就企晒喺房中間…
「大家準備好未？」
「等陣！」
我扮衝去廁所，點解我話係扮，一陣大家就知喇…
「衰仔，懶人多屎尿！」
我好快就去完出返嚟…
「得喇！」
「衰仔，屙咩咁鬼快屙完啊？」
「唔係米就水嫁啦！準備好喇，出發啦，驚趕唔切啊！」
「等等！」
「又咩啊？」
「小倩都係鬼，洋腸又係妖，佢哋落唔落得去嫁？」
「呢D嘢使你諗？我一早諗好晒啦，唔使擔心嘅。」
「光管陳」幫我哋造咗少少符咒就開始作法…
話用佢嘅方法可以快D到「出入境關口」喎。
我哋眼都唔使合埋啫，就無端端向下飄喇…
無錯，真係向下飄啊，好似搭緊(車立)咁…
丫，唔啱，中伏喇，係過山車啊！
「哇~！丫~！」
………
我心神都未定啫，架「過山車」就停低咗…
「到達！仲有時間剩！」
「俾個心理準備嚟都好丫，無端端好似玩過山車咁，嚇死人啊！」
「衰仔，鳳初兄一早問你準備好未嫁啦，係你自己答準備好嘅。」
我嬲嬲地真係想唔俾準備好一陣要俾佢嘅嘢佢。
「咦，嗰個女人…」阿公突然咁講。
「都投胎啦，仲諗住其他女人，你諗吓阿婆得唔得啊？」
「咁似你阿婆嘅！」
「阿婆！？」我另轉頭一睇，我即刻就…
喊咗出嚟，因為真係阿婆佢啊！我出發前，佢明明好地地嫁，點解…
佢見到我哋，即刻就衝埋嚟…
「老嘢，終於趕得切搵到你喇！咦，孫仔，你做乜會喺度嫁，你又死咗啊？」
「阿婆啊，你做乜嘢啊？唔好玩啦，你明明身體健康嫁！」
「傻仔，阿婆幾十歲，隨時都死得啦，咁啱你上機嗰日，我掛住你噃，跟住又諗起個老嘢抱你玩噃，再跟住咪擒上樓上想攞本舊相簿睇吓囉，點鬼知跣一跣腳就跌咗落地，仲磕爆咗個頭，咁就死咗喇！」
點解死法都要同阿公一樣，仲有…
「阿媽阿爸喺電話唔同我講嘅？」
「鬼知咩？想你玩得開心D，唔想你擔心掛。老嘢，我一落嚟就去註冊處搵你，見到你登記咗今日投胎，我使咗D錢，可以同你下世又一齊喇，哈哈！」
「哈哈哈，咁咪好囉！」阿公佢把口雖然咁應，但係我睇得出佢一副「下世又係你呀？悶唔悶D啊？」嘅款。
「好嘢！好嘢！」連小倩佢都癲埋一份，拍晒手好開心咁，痴情嘅人都係痴埋一堆嘅，唉…
我同阿公都係同病相憐…
「咦，嗰個女人…」「洋腸」突然咁講。
「你又做咩啊？學我阿公講嘢！」
我另轉頭一睇，我吊！
一隻青蛙，竟然裝扮到成個女人咁…
「井底之蛙？」
佢行咗埋嚟…
「咦，洋腸？過咗兩世，終於見返你喇！上一世唔小心，跳咗入女人轉世處，而家我叫井邸芝娃，混血兒嚟嫁，靚唔靚呢？官邸個邸，芝士個芝，淫娃個娃？」
咁嘅談吐，再靚都死啦，何況佢咁嘅樣，最攞命係…
「好靚啊！唔知…我有冇機會同你交往呢？」「洋腸」竟然咁都講得出，唔好話識我啊！
「好喇！大波兄，係時候要入去喇，嗰邊隻出入境事務鬼催喇！」「光管陳」突然咁講。
阿公同阿婆都想入去喇，但係…
「咪住！」我大嗌。
「衰仔，又做乜事啊？」
「小倩，你跟住我做丫！」
我將我臨嚟呢度之前，喺廁所門口個茶几攞嘅…
兩個茶包﹑兩個紙杯同一袋水喉水攞咗出嚟，之後跪低咗…
「阿公﹑阿婆，飲茶丫！」
…
「公公﹑婆婆，請飲茶。」小倩都跟住我做。
「衰仔，乖…乖！」阿公同阿婆都喊住口咁接過我同小倩嘅茶，亦都飲咗一啖…
「好甜…好甘甜啊，乖。」
「死喇，冇利是封添。」
「我有！」「光管陳」又唔知邊度攞D利是封出嚟喇。
不過，冇仲好過有，阿婆佢竟然封「冥想銀行」鈔票俾我，我真係…唉…
呢一刻，乜都算啦，總算完到佢哋心願，令佢哋笑住咁上路都好丫…
佢哋飲完杯茶，轉個身就上路喇…
唔知點解，我總係多愁善感到有D煩嘅，我耳邊又泛起一首歌喇…
(不要問 ~ 不要說 ~ 一切盡在不言中 ~)(這一刻 ~ 偎著燭光 ~ 讓我們靜靜的渡過 ~)(莫揮手 ~ 莫回頭 ~ 當我唱起這首歌 ~)(怕只怕 ~ 淚水輕輕的滑落 ~)(願心中永遠留著我的笑容 ~)(伴你走過每一個春夏秋冬 ~)
我哋就係咁，睇住佢哋入咗「事務處」…
(傷離別 ~ 離別雖然在眼前 ~)(說再見 ~ 再見不會太遙遠 ~)(若有緣 ~ 有緣就能期待明天 ~)(你和我重逢在燦爛的季節 ~)
「公公﹑婆婆，再見喇！」
(待續)
下集預告︰
「天上地下唯我獨尊射球！」
註腳︰首離別歌係張學友嘅《祝福》。