米米蓮妖怪作品 -《旅行‧如此‧難以忘‧記 》(百集長篇): 第089集 ~ 明︰點知問咗D煩膠嘢出嚟！
第089集 ~ 明︰點知問咗D煩膠嘢出嚟！
上次講到，我同「洋腸」發現咗「井底之蛙」留低嘅招式…
原來係可以令到個人輕飄飄咁…
睇嚟我哋可以靠「佢」幫我哋離開呢度喇，所以…
我同「洋腸」每訓練一陣就試一吓…
………
我哋差唔多試咗幾十次，而家…
我同佢可以喺呢個唔算好大嘅環境底下跳來跳去，又幾好玩噃！
「好喇，係時候返上去試一吓喇！」
「OK，咁你跳入我個口度丫！」
我望一望佢個口…
「你估你仲係之前咁大隻咩？咁細個口，點跳啊？」
「嗱！」
我都未講完啫，佢就雙手掹大咗個口，大到成隻大笨象都吞得到。
咦，我好似又搵自己笨添。
「唔使啦！好遠距離嫁咩？我識游水嫁喎！」
「距離就唔係好遠，但係我驚你濕晒身，一陣冷親就大鑊喇！呢度冇醫生睇嫁！」
我心諗，一隻喺井底咁多年嘅龜都咁識關心人嘅…
睇嚟我要同佢結下不解之緣喇！
「OK！」
我之後走咗入佢口…
………
一陣之後，我哋就到返井底嘅位置…
其實呢個位又好似唔應該叫井底噃，不過我真係唔識形容喇…
嚟到呢度…
「洋腸，準備好未？」
「準備好！」
「咁…你跳先丫！我5秒之後就跟住嚟，你要快D啊，唔係我就撞到你個屎忽嫁喇！」
我驚佢覺得如果我跳先，會好似「井底之蛙」咁離開佢…
所以好想俾多D信心佢。
佢講聲「OK」就出咗發，一直彈吓彈吓咁向上跳…
「喂！快D喇！我而家跟上嚟追你喇！」
「好！」
「追咩話？好咩話？」
我頂！係阿公把聲！攪到我起步都跣腳添…
「係咪家明啊？我係小倩啊！你係咪有方法返上嚟啊！加油啊！」
咦，小倩都聽到我把聲噃，即刻跣腳都冇有怕…
仲要越彈越精神，越跳越高添…
「井上先生，你朋友叫你呀？」
「係啊，其實我真名叫家明啊，洋腸你就叫我阿明啦！」
「哦，好，井上家明先生，我哋繼續努力啦！」
我哋就係咁一直向上跳…
「咦…哇丫！」
「洋腸」佢突然停低咗喺井中間，仲…
「嗚…嗚…嗚…原來…原來你冇呃我！」
我跳到撞到佢之後，我見到佢攬住咗舊嘢喺度喊…
好在呢度個位D牆壁已經基本係石頭嚟，唔跣手，但係…
我要雙手撐一邊，雙腳撐一邊先唔跌返落去，而家成條人棍咁…
「洋腸，乜嘢事啊？」
「哇~~~~ 丫~~~~」
………
我同佢都跌返咗落井底，而「洋腸」依然係好傷心…
「井上先生，佢啊！」
佢遞咗佢攬住嘅嗰舊嘢俾我…
係一隻青蛙頭嘅人型怪物，仲要係條死屍，雖然係恐怖…
但係我直接了解到佢就係「井底之蛙」…
佢個口塞住咗罐珍寶裝奶粉，心口就俾條魚叉天線插穿咗…
我明白到，原來佢喺係離開井底嘅中途，俾D人掟落嚟嘅嘢整死咗。
我一時之間唔識安慰「洋腸」，唯有一直冇出聲，陪住佢喺度喊…
………
過咗冇幾耐，我聽到出面好嘈，應該係「光管陳」佢哋班人都到咗…
「洋腸，「井底之蛙」先生嘅心願就由我哋完成啦，你將佢放咗入口，我哋三個一齊離開呢度啦！」
佢喊住口咁及頭回應我。
之後，將「井底之蛙」放咗入口，佢就開始向上跳…
我一直跟住佢跳，一直彈，一直跳…
突然，腦河裡面覺得要諗返個好聽嘅名以祭「井底之蛙」先生之靈…
所以，我諗好咗呢招就叫做「天馬行空」…
最少呢個世界上，有我呢個人覺得係好聽丫！
點知，我興奮得頭，跳得太快，仲帶埋「洋腸」佢跳咗出井口添…
「天，馬，行，空！」
我見到返晒佢哋班人喇！佢哋都喺井邊啊！
「死仔，趕唔切喇，快D跌返落嚟，一齊去出口啊，得返唔夠兩分鐘咋！」
但係我收唔到制啊！
「哎吔！」
我掛咗喺棵樹度…
………
之後，「大袋」同「光管陳」上咗嚟扶我返落去…
「點啊？你冇事丫嘛？」小倩問我。
「冇…冇事。」第一聲就係佢問我，真係好啊！
「咦，呢隻嘢係？」阿狗問「洋腸」係邊個。
「佢係…我朋友，龜仙人！」呢個名正氣D。
「睇龍珠太多咩你？」「大袋」講完之後，仲行咗埋去摸摸「洋腸」…
「唔好摸我龜頭！」
我知「洋腸」應該仲有D唔開心，但係佢都有介紹自己。
之後，我哋就跟住「光管陳」同「寶寶」一齊諗住行去出口…
………
點知，真係連呢度都閂埋咗門，我哋似乎走唔到…
就連「沙婆婆」都俾「西斜」捉埋，唉…
不過，「光管陳」似乎有方法離開呢個鬼地方…
佢請咗「地藏菩薩」上嚟，仲威逼利誘佢供出出口…
不過好似淨係得威逼，冇咗利誘…
終於，「地藏菩薩」雖然冇辦法俾到個出口出嚟，但係就俾咗個線索我哋︰—
----------------------------------------
吾 乃 千 年 二 岩 村 石 所
化 修 桂 七 得 魔 二 性 六
練 成 妖 家 邪 八 一 七 之
一 體 現 六 婆 於 此 八 與
沙 五 四 妖 共 一 同 死 建
六 造 迷 離 五 九 境 婆 界
境 死 內 二 進 之 出 必 九
須 二 一 得 我 批 准 方 內
九 家 可 此 死 地 除 外 七
----------------------------------------
而家唔知幾點添啊，阿公佢仲要趕住去投胎嫁，我真係好擔心！
唯有用我嘅神腦極速解答佢啦！
「我有五支筆，兩張紙！你哋抄嚟一齊諗吓啦！」
「陳Sir，你邊度嚟紙筆啊？」又係「大袋」出口問。
「我身為一個教師，有紙筆喺身邊，係好合理嘅！」
問題嚟喇，佢「五筆二紙」仲勁過耶蘇「五餅二魚」…
佢竟然可以派到每人每妖一張紙一支筆，真係耐人尋味！
我哋抄低晒，我真係好用心咁諗，淨係諗到…
「吾乃千年岩村石所化，修桂得魔性，練成妖家邪之體，現婆於此與沙妖共同死建，造迷離境婆界境，死內進之出必須得我批准，方內家可此死地除外！？」
咩嚟嫁？我真係諗唔明。但係…
我見到「喪狗」喺度喪圈喪畫咁，唔知佢畫緊D咩，不過佢似乎諗到D嘢噃！
「OK！攪掂！我哋應該走到喇！」
嘩，佢真係諗到呀？而家，全場人同妖都一齊望住佢…
仲帶住一副期待嘅眼神。
之後，佢就長篇大論咁講︰—
「呢個石碑表面係一塊廢噏嘅石碑，實際係一個根據日本好流行嘅遊戲所設計，個遊戲叫做SUDOKU，當中最重要嘅係堆數字，一個版面，九九八十一格，每橫每直都包含晒由一至九嘅九個數字，每個三乘三嘅小方格亦都包含晒由一至九嘅九個數字，仲要係唔可以重覆嘅…」
「咁即係點啊？」
「首先將D非數字嘅嘢勾走晒，淨返D數字，再用呢D數字去搵返晒所有其他數字，你哋想唔想玩吓丫？」
「玩咩丫！唔好賣關子啦！快D解釋啦！」
「哈哈哈，你哋應該會諗唔到，因為呢個嘢有個出奇位，就係將個死字代替咗個四字，而個四字本來係冇用嘅，即係咁…」
----------------------------------------
口 口 口 口 二 口 口 口 口
口 口 口 七 口 口 二 口 六
口 口 口 口 口 八 一 七 口
一 口 口 六 口 口 口 八 口
口 五 口 口 口 一 口 四 口
六 口 口 口 五 九 口 口 口
口 四 口 二 口 口 口 口 九
口 二 一 口 口 口 口 口 口
九 口 口 口 四 口 口 口 七
----------------------------------------
「再咁！」
----------------------------------------
四 一 七 五 二 六 三 九 八
八 九 三 七 一 四 二 五 六
二 六 五 三 九 八 一 七 四
一 七 四 六 三 二 九 八 五
三 五 九 八 七 一 六 四 二
六 八 二 四 五 九 七 三 一
七 四 八 二 六 三 五 一 九
五 二 一 九 八 七 四 六 三
九 三 六 一 四 五 八 二 七
----------------------------------------
「因為三字冇出現過，所以將本來三字嘅位一睇，就會出現…」
----------------------------------------
口 口 口 口 口 口 村 口 口
口 口 桂 口 口 口 口 口 口
口 口 口 家 口 口 口 口 口
口 口 口 口 婆 口 口 口 口
沙 口 口 口 口 口 口 口 口
口 口 口 口 口 口 口 婆 口
口 口 口 口 口 之 口 口 口
口 口 口 口 口 口 口 口 內
口 家 口 口 口 口 口 口 口
----------------------------------------
「桂，家，村，沙，婆，婆，家，之，內！」
原來係咁！會唔會複雜得頭啊？其實，係咪有其他快D嘅方法嘅呢？
(待續)
下集預告︰
咩話？佢哋俾人捉晒？