米米蓮妖怪作品 -《旅行‧如此‧難以忘‧記 》(百集長篇): 第088集 ~ 輝︰咪就係走唔到囉，唯有試吓請神問啦！
第088集 ~ 輝︰咪就係走唔到囉，唯有試吓請神問啦！
睇死條友仔係聽到我哋講嘢，先喺度扮晒嘢咁，懶有型啦…
呢招肯定本來唔係叫「天馬行空」…
不過「天馬行空」呢招又幾天馬行空噃，真係幾啱係招輕功嘅名。
上次講到，「星」﹑「月」倆老前輩佢哋成雙成對咁，一齊飛咗上天…
問題嚟喇！點解佢可以上天堂嘅呢？呢個真係百思不得其解…
但係佢臨走之前交低嘅嗰幾句說話，真係令我摸唔到個頭腦…
唉，「摸不著頭腦」唔知點用口語講丫嘛，係怪怪地嫁喇。
話幫我開咗「慧眼」，但係其實胃眼喺邊嘅呢？
上次佢係幫我醫好咗額頭個傷口喳嘛，而家個額頭不知幾滑…
唔通…喺個胃度？「佢」嘅作用又係咩呢？
唔通…用嚟識英雄？我真諗極都唔明，亦唔知「佢」喺我個身嘅邊一忽。
我諗諗吓嘢，原來倆老一早已經走咗嚧，想同佢哋講聲「再見」都冇機會添。
「哈哈哈，你哋死喇，邊個唔聽我話，我就即刻變大惡魔，咬死佢！」
「大袋」佢真係…專做埋D戇狗嘢嘅…
「你試吓變丫嗱，睇我會唔會一把三尖兩刃槍插爆你個口，再叫「居居」咬甩你個頭丫嗱。」
之後，「大師」佢就帶住我哋一大班人一齊返上去森林度搵出口…
………
「係呢，阿狗，頭先你點樣打敗隻「迷霧天魔」嫁？你又做咩唔俾阿妮出嚟行吓啊？」我問。
「阿妮！？哦~我諗你哋有D誤會喇，我身上隻「靈狐」唔係阿妮嚟嫁。」
「唔係！？咁隻嘢邊度嚟嫁？」「大袋」總係懶驚奇咁嘅。
之後阿狗解釋返原來係有另一隻「九尾妖狐」上咗佢身…
不過頭先我明明見佢淨係得八條尾，唔知係咪收埋咗條呢？
咦，好似有D臭味噃，快D噤住個鼻先…
我見到大家都噤住晒個鼻，似乎係得「大袋」咁白痴冇，仲喺度幫人吸臭…
「嘩，頂你個肺！我頭先鼻塞聞唔到，而家通返至聞到，俾你咁焗發，乜嘢牛鬼蛇神都死啦，好很臭啊！」
我終於忍唔住串吓佢︰—
「係你條友一直係咁講嘢啫，我哋一早噤住晒個鼻啦！」
死喇！講講吓我先發現原來欣欣都冇噤，冇提佢添，唔知佢會唔會嬲我呢？
之後，我哋又再繼續向出口方向行去…
點知發現出口已經俾「千年石妖」封咗，唯有先去搵返阿明啦。
………
行到去「桂家村」，後面跟住嗰班人就喺門口度休息…
而我哋就跟埋「大師」入去村裡面睇…
「咦，鳳初，你哋喺度做咩啊？地下呢隻係…「河童」！？」
我見到一隻…上半身係「河童」樣，下半身似係水怪嘅怪物…
但係佢而家就…好似一個漏咗氣嘅巨型氣球咁…
「光管陳」仲話阿明佢跌咗落井喎…
…
「喂，喂，喂，你哋仲唔快D走？唯一嘅出口喺五分鐘之後閂埋喇！」
咦，係「寶寶」噃！
「阿明佢跌咗落井啊！你有冇方法救佢啊？」
佢之後話呢個井叫「無底之井」，仲話成條村D人掉咗咁多年垃圾落去都見唔到底添，咁阿明佢咪即係凶多吉少！？
「仲有四分三十秒。」
「你哋走先，我喺度諗辦法。」
「光管陳」佢雖然係咁嗌，但係淨係得「大師」走咗…
我哋因為擔心阿明佢個死仔，所以都冇走到…
「你哋做乜唔走啊？」
「兄弟嚟家嘛！有福同享，有難同當！」
呢句嘢雖然有D肉麻，但係我真係咁諗。
我哋就係咁一直等，一直等，足足等咗佢一分鐘…
因為你，我會記住呢一分鐘，從而家開始，我哋就係一分鐘嘅朋友…
呢個係事實，你改變唔到，因為已經過去咗…
點解D對白咁熟口熟面嘅？不過唔理喇！
總知，呢分鐘你條「傻佬明」爭我嫁！快D上嚟啊！死仔！
「天，馬，行，空！」
我頂！我個心諗吓啫，使唔使咁聽話啊！？
阿明佢喺個井口飛咗出嚟，仲懶有型咁，真係頂佢唔順…
睇嚟，佢似係又有D咩嘢奇遇咁喇…
「死仔，趕唔切喇，快D跌返落嚟，一齊去出口啊，得返唔夠兩分鐘咋！」
「唔，得，啊！我，收，唔，到，制，啊！」
我頂！
…
我哋之後一齊向住佢預計跌落嚟嘅位置度搵佢…
好在，好快就搵到佢，佢掛咗喺棵樹度…
「快D返落嚟啦！趕唔切喇！」我嗌。
「唔使喇，已經趕唔切喇。」阿狗講。
「大袋」同「光管陳」就上去扶佢返落嚟…
「點啊？你冇事丫嘛？」小倩問候佢。
而家攪到我哋走唔到，我都想問候佢，仲想問候埋伯母。
「冇…冇事。」個死仔講。
「咦，呢隻嘢係？」阿狗問。
「佢係…我朋友，龜仙人！」
「睇龍珠太多咩你？」「大袋」講完之後，行咗埋去摸摸隻龜…
「唔好摸我龜頭！」
我估計呢隻龜又係一隻妖怪。
「我唔係妖怪嚟，我真係一隻龜，我叫「十里洋腸」！」
我冇出聲佢都知我諗乜！？攪到我有D相信佢係仙人添。
「陳老師，咁而家我哋點啊？」欣欣問。
「小朋友，你帶我哋先去大門度睇睇丫，唔該。」「光管陳」同「寶寶」講。
………
之後，我哋就跟住「寶寶」行到去一個地方…
「石門真係閂咗喇，所有人類同妖怪都再唔可以返去人間喇！」
「寶寶」就咁講，我就望一望石門嗰度，石門前面好多小妖怪…
似乎佢哋都係走唔到…
不過，「大師」同佢D徒弟就已經唔見咗，估計應該已經離開咗…
「寶寶，沙婆婆呢？」小倩問。
「婆婆…婆婆佢…嗚嗚嗚…」
「寶寶，唔好喊住啦，講埋先丫，究竟佢點啊？」阿明問。
「佢俾個鬍鬚佬捉咗啊！」
「鬍鬚佬！？」
「沙婆婆算唔算係小妖啊？」「光管陳」問小倩。
「妖力嚟講，除咗「千年石妖」，之後應該就係沙婆婆喇。」小倩答佢。
「咁應該係「西斜」余二十。」阿狗講。
「理唔到太多住喇，小朋友，請問你知唔知仲有冇其他路可以走呢？」「光管陳」問「寶寶」。
突然，所有妖怪都望晒過嚟，就似係等待緊「寶寶」佢講嘅咁…
不過，呢個情景有D恐佈…
「我知嘅都已經被封咗喇！」
「寶寶」佢咁講，所有人同妖怪都好失望，但係…
「咁唯有請地藏啦。」「光管陳」突然咁講。
佢又再做手印，踏地…
「求地藏菩薩上來，助我等離開此地！」
…
咦，冇料到？
「敬酒唔飲飲罰酒呀？地藏！快D出嚟喇吓，唔係我就打爆你！」
乜而家D教書先生咁嘅！？
「唔好，唔好，求你唔好蝦我D小輩啦，大師！」
「地藏菩薩」終於喺地下走咗出嚟…
「出口喺邊？」
「俾「千年石妖」封晒啦！」
「你即係想我打到你爆開啫？」
「唔係啊，唔係啊，英雄僥命啊！」
「咁快D講啦！」
「我真係冇辦法啊…」
「光管陳」一手提起就作狀打落去…
「不過！我話不過啊！英雄唔好打住，係有方法出去嘅！」
「哇~」「丫~」「吓~」「嗄~」「啊~」
D妖怪突然好似想準備殺咗個「地藏菩薩」咁。
「呢個！」
「地藏菩薩」攞咗塊石碑出嚟…
「我知嘅出口都真係俾「千年石妖」封晒喇，不過「草帽呼子」曾經整咗條秘道出嚟，至於玄機就喺石碑之上，我都參唔透。」
「呃我你就知死！」
「光管陳」攞起咗塊石碑，我哋就同一大堆鬼怪一齊行埋去睇吓…
塊石碑上面係咁嘅︰
----------------------------------------
吾 乃 千 年 二 岩 村 石 所
化 修 桂 七 得 魔 二 性 六
練 成 妖 家 邪 八 一 七 之
一 體 現 六 婆 於 此 八 與
沙 五 四 妖 共 一 同 死 建
六 造 迷 離 五 九 境 婆 界
境 死 內 二 進 之 出 必 九
須 二 一 得 我 批 准 方 內
九 家 可 此 死 地 除 外 七
----------------------------------------
吾乃千年，二岩！？究竟咩嚟嫁？
「嘩，隻「千年石妖」寫架？咁核突嘅？」「大袋」又嚟喇！
「你有冇聽書嫁？人哋「地藏菩薩」咪講咗係「草帽呼子」整嫁囉！」阿狗咁講。
「咁即係點啊？」「光管陳」問「地藏菩薩」。
「地藏菩薩」嘅回應係一副真係唔知嘅樣，睇嚟…
我哋真係要解通呢塊石碑先走得喇！
(待續)
下集預告︰
「井底之蛙」先生嘅心願就由我哋完成啦！