米米蓮妖怪作品 -《旅行‧如此‧難以忘‧記 》(百集長篇): 第058集 ~ 輝︰「東虫大師」！？「星爺」！？仲有咁多壞人添！？
第058集 ~ 輝︰「東虫大師」！？「星爺」！？仲有咁多壞人添！？
「欣欣，嗰個真係黐線佬嚟架！佢叫「光管陳」呀！對腳仲光滑過你呀！不過佢又真係我阿Sir嚟，你就跟佢嚟搵我啦！」
(你講多次，邊個對腳滑D話？不過見你寫咗個示愛牌就算啦！)
「示愛牌！？我幾時寫過呀？」
(咩話？)
Eee…不如講返「肥僧」呢邊先啦…
我望到「肥僧」後面有一大堆鬼怪衝緊過嚟，咪即刻再定實個「九字護身法」囉！
咦，阿明佢都終於識造喇喎！但係…
「咩嚟架！？三個「九」字！？咪又係得六筆！」我問阿明。
「我諗住兇吓隻「肥龍」，佢再過嚟，我就報警喳嘛！」
雖然佢呢招係怪怪地，但係呢個怪招似乎有D效噃…
「肥僧」衝到過嚟之後，淨係喺度「嘰呢咕嚕」，並冇傷害我哋，但係…後面堆鬼怪點好呢？
之後，「肥僧」突然另轉佢個肥得嚟一D都唔笨重嘅身體，雙手運起勁嚟…
雙手掟出電球，掟中好幾隻鬼怪，暫時嚇退咗堆鬼怪…
但係…佢轉個身返嚟就一手扯住咗我個頭…
「個頭就嚟甩喇！」
佢係咁跑係咁跑，我條頸就係咁痛係咁痛…
聽到阿明「姨」一聲，佢就停低咗，仲掟低我哋喺地下…
我見到佢之後同一個老人家行禮…
我真係頂佢個肺丫，我條頸足足俾佢拉長咗成個CM，個人即刻火火地滾…
個老人家兜頭打落個「肥僧」頭度，仲用粗口鬧佢，再糟質佢食「紙」，我D火總算收返D，但係…佢…佢竟然…
扭腰將雙手放喺條腰度儲氣…
當我滿心期待呢個必殺技嘅時候，佢竟然大叫「紫電靈丸」四個字就射咗出去。
嗰種失望…嗰種失望…我唔識形容喇！
殺晒D鬼怪都彌補唔到佢嘅錯呀！
「我唔鐘意呢個名囉！」
「肥僧」開頭覺得尷尬，就咁回應我：—
「唔好意思呀！咁我鐘意「幽遊白書」多過「龍珠」丫嘛！」
我一諗起我以前日日追嘅動漫，我就無名火起喇…
「唔係呀！你明唔明呀？呢招最少都要叫「波動拳」啦！但係「波動拳」要有個「拳」喺個「波」度先得架！你知唔知你咁樣侮辱咗成套動作呀？…」
「肥僧」個樣好嬲，但係我照鬧！
「你仲侮辱埋「靈丸」添呀！「靈丸」係要用手指出架，你明唔明呀？枉你仲話鍾意「幽遊白書」！你話你知唔知醜丫！」
「肥僧」聽到呢句，肯定係覺得我講得有道理，躹晒躬咁同我講對唔住，個場面真係怪怪地。
「哈哈哈哈！好笑！好笑！我以為只有我可以對「肥仔」佢咁惡！年青人果然有為，哈哈哈哈！」老人家突然插嘴。
之後，佢仲解釋返「肥僧」所食嘅白符原來係「記錄符」加「釋放符」，其中一個功用就係轉化語言，但限制係必須有「記錄」之後先可以「釋放」。
「頭先唔好意思呀，亂咁發脾氣添，真係失禮死人喇！」我對佢哋講對唔住。
「如果我冇估錯，你哋應該同「東虫」，虫節大師有關係，啱嗎？」阿明問。
「肥僧」呆咗，老人家笑到黐咗線，我都唔知佢笑乜？
「乜冬蟲啫，肯定又係D後人亂咁老作啦，笑死我呢個老人家呀，哈哈哈，你講緊嘅「東虫」，咪就係你前面呢個「肥仔」囉！」
原來佢係恥笑「肥僧」，但係估唔到「肥僧」就係鼎鼎大名嘅「虫節大師」。
「敢問老前輩一句，各下又是高姓大名呢？」
「你讀書太多呀？廣東話都唔識講咁嘅？我呢，就係呢個「肥仔」嘅師父。」
老人家佢竟然係「虫節大師」嘅師父，我第一時間係咁諗，咁呢個旅程冇死啦！咁多正派人仕保護我哋！
「你個樣好似好開心咁噃！我勸你唔好咁開心住喇！你遇到我，即係你好運極都有限！」
「點解嘅？」
「我係天下第一自閉仔(即係「毒男」) ，識到我嘅人都係自閉嘅！你唔信，睇吓呢個「肥仔」！」
「又真係幾自閉噃！」
「自閉嘅嘢，我肯認第二，冇人敢認第一，想當年，我為咗我嘅「女神」，獨自勇闖珠峰！捱饑抵餓！行咗百九幾日！終於到咗山峰最尖最頂嘅部份！可以同天神對話！求天神完成我一個願望…」
「咩願望呀？」
「我求佢可以喺我臨死之前，可以同我「女神」喺埋一齊，或者最少有一個美女相伴…」
「之後呢？之後呢？」
「我得到永生！」
我唔好意思再問呢D，唯有轉個話題。
「老前輩，咁你有冇乜嘢稱號架？」
「正派最強術士，三光，日，月，星，嘅「星」就係我，你哋叫我「星爺」啦！」
「星爺！？」
「冇錯！「日」就叫做岑日君，佢係條仆…(下刪一百萬字粗口)；「月」就係我嘅「女神」，月娥，佢靚就唔在講啦！仲要好溫柔添！但係…食唔到嘅提子總係酸嘅，仲好可能係臭添，D賤男人同D唔抵得佢靚嘅女人都叫佢做「淫賤月娥」，我聽到呢個名，當時我不知幾咁心痛…心~突然的忍忍痛~wo~wo~」
免得勾起佢傷痛嘅回憶，我唯有又轉話題。
「老前輩，你話我哋唔好運，但係原本我嘅旅程遇到唔少鬼怪，佢哋都似乎係想傷害我哋，但係一次又一次化險為夷，亦一個又一個嘅高手喺我哋身邊出現保護我哋，咁我哋都算唔好運咩？而家，你哋是但一個都夠保護到我哋啦！」
「首先！而家我同你好FRIEND咩？邊個話要保護你哋啫！第二，你唔明白一樣嘢，呢個世界有白就有黑，有正就有邪…」
「當年有我哋「三光日月星」，同時亦有「天地人三魔」，依家有你哋所謂嘅「東虫西聖，南龍北鳳，中神通」，但係其實係D人強行加上去嘅，係得「南龍北鳳」真係算係高手，中神通都唔知「神」咗去邊！有佢哋係因為邪派嗰邊有「東歪西斜，南轅北徹，中毛艷」咋…」
「在我睇上去，呢五個邪派之士比起正派嘅勁好多！尤其係「東歪」，司徒不正！佢係我嘅大徒弟，可惜佢一念之差，誤入歧途，變成惡魔…」
「另外，就係「中毛艷」，毛艷芳！佢先唔係咩醜樣婆「鍾無艷」，佢不知幾正，豔壓群芳之餘，仲唱得一口好歌，切切實實就係妖女界嘅王中之皇。再加上呢個世上其實有唔少其他強勁鬼怪喺度，你唔信嘅話，睇吓後面！」
我唔明白妖怪同唱歌有乜關係，但係我就跟住佢咁講另轉頭睇吓，原來架列車淨係得返個殼…
四周圍頹垣敗瓦，似係一個荒廢咗好耐嘅地下城，遠處有一個神壇咁嘅位，上面企住嘅係另一個老人家…
但係…呢個老人家唔似「星爺」咁「和藹可親」，佢殺氣騰騰，邪氣縱橫，妖氣沖天咁，仲手執一支蛇形木杖…
我好直接咁認為「肥僧」所講嘅大蛇妖，就係佢所控制嘅，佢似乎唔會比我身旁嘅呢兩位高人弱…
同一時間，四周圍傳嚟「嘶嘶唦唦」聲，就似係有堆，唔啱！已經唔可以用個「堆」字嚟形容，係成千上萬，甚至上十萬隻…
唔知邊度嚟嘅蠍子…多到佈滿整個地下城…而家佢哋圍住咗我哋…最可怕嘅係…有隻蠍子有十個「肥僧」咁大隻…
(待續)
下集預告：
「打鬼用朱古力，捉鬼用保鮮紙！」