米米蓮妖怪作品 -《旅行‧如此‧難以忘‧記 》(百集長篇): 第057集 ~ 欣︰美少女戰士！？黐線佬係阿輝老師！？

第057集 ~ 欣︰美少女戰士！？黐線佬係阿輝老師！？

上次講到家姐佢用「捉鬼塔」捉咗隻「女巫鬼」救咗我，但係…

隨之而來嘅就係一大堆「綠光鬼怪」，佢哋似乎來者不善咁，仲圍住咗我…

家姐見到咁，即刻就吹響驅妖笛子，幫我暫時脫離咗恐懼。

但係，隨住笛聲一出，就正如「風婦」老前輩所講，家姐立即就俾貓靈上咗身…





而家，佢個型態，十足十就係準備好殺人咁…

「邊個夠膽蝦我細妹！」

呢聲一出，我已經知道又要再次見到家姐佢進行廝殺，但係…

我真係唔想家姐變成咁呀！所以，我好自然咁唵自己個頭合埋雙眼就大叫出嚟︰—

「唔好呀！家姐唔好再殺人喇！」





「係囉！聽你妹妹講啦！唔好殺我哋啦！對唔住囉！」D鬼怪向住家姐咁講。

我聽唔到家姐回應，亦聽唔到有鬼怪嘅慘叫聲，所以我就放開雙手睜返開眼，望一望家姐佢…

佢外型變返原本咁，黑色瞳孔，雙手亦再冇利爪…

D鬼怪見到佢咁都覺得奇怪，所以上前去睇吓佢…

家姐依然係冇反應…





但係，D鬼怪竟然…

「依哇」一聲，提高佢哋嘅鬼爪向住家姐爪落去…

「唔好呀！」

呢一吓，我雙腳冇力，跌咗落地，眼淚亦即刻淚咗出嚟…

堆「綠光鬼怪」圍住晒家姐，我根本睇唔到佢…

我好怪責自己嘅仁慈…累到家姐呀…嗚嗚嗚…

………

但係…點解…好似再冇任何動靜嘅？





「嘭~！」

喺家姐面前嘅鬼怪突然彈開晒，我見到…我見到家姐佢冇事呀！

仲…現場仲突然播出一首歌配合埋家姐嘅動態…
(飛身到天邊 為這世界一戰~)

家姐佢紅光護身，突然單手舉起笛子…
(紅日在夜空天際出現~)

全身D衫就爆開晒！
(拋出救生圈 為你舞我的劍~)

「咦！咁醜怪架！」




(邪道外魔星際飛閃~)

我當然即刻唵住對眼啦！
(你你你 快跪下 看我引弓千里箭~)

淨係喺手指罅度睇囉…
(你你你 快跪下 勿要我放出了魔氈~)

不過，原來有D火圈圈遮住重要部位嘅…
(你你你 快跪下 勿要我手握天血劍~)

火圈圈跟住就變成水手服同埋高踭鞋喇…
(你你你 快跪下 狂風掃落雷電~)

家姐佢擺出一個嬌薇嘅姿態…




(美少女轉身變 已變成戰士~)

再轉過身嚟，揸住一道白色符…
(以愛凝聚力量 救世人跳出生天~)

合埋雙眼，火光熊熊咁…
(身體套光圈 合上兩眼都見~)

口中念念有詞，之後突然擘大眼—
(明亮像佛光天際初現~)

大叫：—
(雖詭計多端 但美少女一變~)

「惡靈退散！」





「邪道外魔都企一邊~~~」

唔好意思，我都忍唔住唱返句添，只係見到D鬼怪全部俾佢嚇退晒！

之後，家姐定過神嚟，就走過嚟擁抱我。

「你家姐我冇殺佢哋喇！你放心啦！」

「不過呢度三萬尺高空，你家姐逼咗佢哋跳機囉！」

一把唔係家姐嘅聲，究竟係邊個呢？

我望向家姐側邊，見到一隻小貓，我哋兩姊妹都好好奇咁望住佢…

「望咩啫望？攪到人哋咁尷尬。」貓仔講。

「露娜？」我問。

「露乜罅呀？」

「亞提密斯？」我再問。

「咁似我飲開隻咖啡嘅？」

「咁你係咩呀？」家姐問。

「錦鯉係魚，我係荷瑪！」

「河馬！？你點睇都似係貓噃！」兩姊妹齊聲。

「我個名叫荷瑪呀！我嚟自火星嘅！」

「嚟自星星的你！？」

「唔同你哋講咁多喇！頭先借咗D力量俾你家姐玩美少女戰士，而家有D攰，返入你家姐身體抖吓先！」

「你入去我身體邊度呀？」

「梗係你個身體最大，最多空間嗰度啦！」

家姐隨即唵住心口…

「你個蘿PAT呀！」

「乜咁肉酸喺家姐個PATPAT度訓架？」我講。

「咁你係咪想我去你PATPAT度訓丫？」

………

之後，大家靜返落嚟，行返去自己位，睇嚟都就快落機喇，D乘客同D空姐出返晒嚟，頭先有事又唔見有人喺度，哼！

「家姐呀，你對紅色高踭鞋好靚呀！幾時買架？」

「問媽咪借架！用嚟著住見我夢中情人，木村架！」

「咁你套水手服呢？」

「晴翠店買架！」

「情趣店！？你幾時變得咁壞架？」

「晴翠店係專賣COSPLAY衫架，你諗咩呀？」

………

飛機停定，我哋攞埋行李就排隊落機…

「細妹，你睇唔睇到嗰個空姐呀？」

我望一望過去，見到一個個樣好似夏蕙姨嘅空姐喺門口度送乘客離開，佢個樣已經恐佈，我仲見到佢塊面…

佢塊面個鰓位有個紙角飛咗出嚟，另一邊有個幾靚女嘅空姐，成個深田恭子咁樣，但係佢個鰓位都有個紙角…

D乘客慢慢離開，我哋就越嚟越近呢對空姐，行到最近嗰嗰位，「夏蕙姨」突然另過嚟同我哋講再見，而個紙角又唔知黐住咗D咩…

「查嗱~」一聲，就好似搣貼紙咁，張紙喺佢塊面度被搣開…

「哇丫！救命呀！走呀！細妹！」家姐推埋我走咗出飛機…

之後，我哋連望返轉頭都唔敢，好快咁就去咗辦理入境。

………

「細妹呀，唔記得問吓你添，阿輝個籤文咪話「解籤佬」佢解錯嘅，唔知我個籤文佢會唔會解錯呢？」

「嘻嘻，我都想呀！你早D拍拖咪唔使阻住我同輝輝囉！」

「衰妹！淨係識掛住嗰個阿輝！」

我哋辦理晒D嘢就出咗閘。

………

「阿欣！阿欣！阿欣！…」

閘外面有人係咁大叫，我起初以為佢係講緊日文…

「細妹！你睇吓個傻佬，佢原來講緊我哋D話，你睇吓佢揸住個牌寫乜？」

「阿欣，我愛你？」

「你估佢係咪搵你丫嗱？」

「黐線咩？我都唔識佢！」

個黐線佬突然望咗過嚟，我咪即刻同家姐就走囉，點知佢仲一直係咁追住我哋…

我哋嚇到連行李都掉低埋就衝咗入(車立)，但係佢依然窮追不捨，我哋睇住個(車立)門閂緊，但係佢似乎追到呀！…

「哇丫！」

嚇到我同家姐大嗌，個黐線佬真係黐線架！邊有人有手唔用，有腳唔用，用個頭嚟頂住道門架啫…

「請問你係咪阿欣呀？」

我自然咁及頭回應，但係即刻就另頭表示唔係。

「我係朱嘉輝老師呀，我姓陳架，佢唔可以行開，我代佢嚟接你架。」

佢仲舉起個字牌俾我睇，上面寫住︰—

「阿欣，我愛你！朱嘉輝字」

我隨即雙手慢慢放後，面部稍稍側向，門牙輕力咬住下唇，俟埋牆邊，輕輕扭動屁股…

「細妹，你發姣呀？但係都唔使幫人抹玻璃架！」

(待續)

下集預告︰

當年有我哋「三光日月星」，同時亦有「天地人三魔」…