米米蓮妖怪作品 -《旅行‧如此‧難以忘‧記 》(百集長篇): 第024集 ~ 輝︰喂，起身食早餐喇！…我哋俾人跟呀！

第024集 ~ 輝︰喂，起身食早餐喇！…我哋俾人跟呀！

上次講到，有D嘢喺個女人個身體度轉緊出嚟，詳細情況，阿明個死仔都講晒啦，我唔再多講喇！

我要提嘅係…佢條友仔放山埃囉！佢張「裸男相」根本廢嘅，完全冇用。

仲有，我要嚴正聲明，嚇到瀨尿嘅係佢，唔係我呀！

好在，喺嗰個女人身體轉出嚟嘅，係嗰個有禮貌嘅大叔啫，個大叔原來叫做達叔…





佢仲好似幾鍾意我咁，問咗我好多嘢，又講咗好多嘢俾我哋知。

仲有，「居居」嗰隻好似狗仔咁嘅…生物呢，佢突然出現咗，仲彈上嚟我大脾，嗰吓真係嚇死我…

不過佢真係超乖，仲好似好鍾意我摸佢咁，如果可以養佢做寵物就真係一流喇。

聽到達叔佢話「居居」食咗好多人，我都唔敢相信，好在，佢淨係會食妖怪啫。

我反而擔心嘅係達叔佢嘅警告，呢間酒店嘅13樓。





「大咀」嘅出現令達叔同「居居」都好快就消失咗。

之後，我同阿明就跟咗「大咀」佢去1220房度搵大家，睇吓有咩好玩，點知…今日真係太攰喇！我一行埋張床度就訓咗嚧…

完全冇理過佢哋班人有幾嘈，一訓著就諗起我女朋友阿欣，但係我好似唔記得咗D嘢…

………

一擘大眼就第二日喇，班死仔大部份人都訓晒喺度，我望望隻錶，原來我都係訓得嗰四五個鐘左右…





見到檯上有張紙，原來之前，唔知幾時，D阿Sir派咗張時間表俾我哋，上面寫住11點集合，去七福神廟參觀…

而早餐就要自己解決嘅咁，我見而家八點幾，差唔多九點，大寶同細寶都起咗身，就拍醒埋阿明﹑阿狗同「大袋」…

六條友就一齊落樓下搵早餐食。

呢間酒店嘅二樓係餐廳，我哋六條友仔就走咗入去行吓，見到呢間餐廳唔算好大，大約得七八張檯…

我哋離遠見到有張大檯，有個大肥妹坐咗喺度，成檯都係嘢食，佢樣唔算好衰，但係見到佢係咁食係咁食…

咁嘅食相，我哋真係頂唔順，即刻就走咗落樓下，睇吓有冇其他嘢好食。

原來尋日都冇咩睇清楚周圍，酒店樓下轉左原來有間幾大嘅便利店，我哋行咗入去打咗個轉…

呢度總算有返D人氣，呢度有D日本人幫襯，職員就有三個，一個喺櫃位，兩個執緊嘢…





原來日本D服務員都真係幾有禮貌架喎，佢哋都有笑住同我哋講「喔哈哟」。

我見到條死仔「大袋」一手擸咗本書，我就問佢︰—

「「大袋」你買咩書呀？你識睇日文咩？」

「無字天書。唔使識日文嘅。」

「鹹書就鹹書啦，無咩字天書丫。」「喪狗」插口。

「有圖冇字，仲唔係無字天書！？」

「你未夠秤，買得咩？」我問。





「睇嘢啦，呢度D職員好專業架。」

佢講完就攞咗本鹹書同支嘢飲去俾錢，「嘟，嘟」兩聲，職員就用親切嘅笑容對住「大袋」…

佢俾咗錢就攞咗本鹹書同支嘢飲走。

「果然專業！」我哋五個都好驚訝。

之後我哋離開間便利店，阿明即刻忍唔住問「大袋」︰—

「喂，攞嚟睇吓丫。」

「我妖你呀，我都未睇，今晚先！」

「咁你唔今晚先買，人哋開通宵架。」「喪狗」串佢。





「你理得我啫，你冇聽過晨早買本鹹書睇，出街唔使怕有鬼咩，我當辟邪，你吹咩！」

我哋見四周圍都冇咩其他舖頭，就走咗去對面馬路，呢度有個派出所，派出所出面有個告示板，我哋就走咗過去八卦吓…

原來係通緝犯嘅相，左邊一張大頭相，右邊一張大頭相，下面六張細相咁，大寶同細寶都忍唔住影咗張相…

之後我哋行遠D去咗尋日經過過嘅一堆便利店同波子機舖頭嗰邊。

呢邊有好多人，有學生，有阿嬸阿伯，仲有D似係趕住返工嘅日本人…

我哋見到有間「牡丹樓」，諗住入去食返個漢堡包，試吓佢哋同香港有咩唔同啦。

入到去，見到呢度都好多日本人幫襯，我買咗個漢堡包食，一啖咬落去，嘩，難食到丫！





「膠質」漢堡，真係頂唔順日本人D口味，飲杯汽水算喇，其實汽水都難飲過香港好多。

到咗大約十點，大家諗住返酒店集合，一行出去門口，我離遠就見到一個男人企喺度眼定定咁望住我哋…

阿明佢哋幾個可能見唔到啦，佢哋一直就行，我就一直跟。

「你見唔見到嗰邊嗰個男人呀？」我問阿明。

「邊度呀？」

佢另轉頭望咗一望再講︰—

「係噃，有個男人好似係望住我哋，仲嬲嬲哋咁，唔似善男信女噃。」

阿明講緊嘢，我喺前面又見到另一個男人都係咁樣望住我哋，我即刻同大家講︰—

「大家快D行返去酒店，有D唔妥。」

「啪~」突然，我膊頭俾人拍咗吓…

「你哋喺度做乜呀？」

(待續)

下集預告︰

唔好玩，會死人架。