米米蓮妖怪作品 -《旅行‧如此‧難以忘‧記 》(百集長篇): 第023集 ~ 明︰效果…明顯…聽日再講
第023集 ~ 明︰效果…明顯…聽日再講
唉，唔重覆咁多喇，阿輝都講得好清楚。
我哋喺(車立)口踢波，第一場，「大袋」個低能仔玩屈機，一開波就遠射入網。
笑完條友仔，就到我哋隊出場，佢仲想重施故技，真係當我戇居。
我一吓就撞咗埋去，擸咗佢個波，再同阿輝嚟個凌空「彈牆」，之後再嚟個「超級無敵風火輪」，波，係咁入嘅，YEAH！
點知，一對臭腳企咗喺我個頭側邊，真係想衝起身就打爆條西裝友，但係我一起身，見到佢棚牙，我淆咗底，唔好意思。
唯有死死地氣執返D嘢，阿輝佢好似有急事咁扯咗我去佢房，我俾佢扯到坐咗喺張床度…
嘩！咁基咁嘅，雖然做咗朋友啫，防人之心的確不可無。
之後阿輝問我有關今日嘅怪事，我又善忘，又樂觀，好快就唔覺得係一回事啦。
咪同佢講話道黑色符就要等我老媽子覆囉。順便介紹D正嘢俾佢…
「神奇防鬼治妖裸男畫！」
仲靜靜雞攞咗阿倫部「即影即有」嚟影咗張「裸男相」傍身，都係收返埋先，俾班死仔睇到，肯定勁笑我。
之後，我哋出咗門口，去咗搵嘢飲。
………
去到個休憩位度，有條女背住我哋，踎咗喺部「汽水機」側邊…
我咪嘗試行埋D睇吓佢做緊乜囉，點知…
佢突然180度另個頭過嚟，真係嚇Q死我！
好在我夠大膽，點會驚丫，仲有呢張「裸男相」喺身，使乜怕丫。
但係…原來佢仲有其他動作，真係唔到我唔怕。
唯有死揸實張「裸男相」希望佢似嗰個藍色小朋友咁，唔會害我哋，或者「光管陳」趕到嚟救我哋啦。
條女…一隻一隻手指咁放入口，一隻一隻手指咁放入眼，睇到我成個人硬晒，想郁都郁唔到…
佢仲扯爛晒自己個頭同埋個身，我對腳直頭完全冇晒感覺，想走都走唔到，旁邊嘅阿輝都硬晒軚，下身仲濕埋…
呢一刻，即使第日有機會記憶返，我諗我都唔會笑佢。
隻妖怪好似冇咩動靜咁，我以為佢係玩我哋，而且又玩完啦，點知佢仲要玩脫皮，一個人頭喺個爛開咗嘅口裡面轉咗出嚟…
係嗰個西裝友呀！
西裝友對住阿輝舉起食指，似係叫佢等一陣咁。
「等我一陣。」佢笑到四萬咁嘅口講。
佢之後擘到個口好大好大，一啖就吞咗個女職員入口，再企到直一直咁同我哋鞠躬。
「唔好意思呀，梗係嚇親你哋喇，因為美奈子佢唔識廣東話架，佢怕喺醜嚟亂晒龍，正常應該係擘大個口我就出到嚟架喇。」
我同阿輝除咗木晒嘴，真係唔知做咩好，佢仲講到好似好正常咁。
之後佢噤咗兩罐汽水俾我同阿輝，叫我哋坐喺度傾吓計，我同阿輝根本冇得揀，只可以跟住做…
我哋三個「人」就係咁坐咗喺度傾計，佢一開始就問咗阿輝一大堆私人嘢，睇嚟佢睇中咗阿輝，我當然唔答口啦。
「其實你哋可以叫我達叔，我係香港人嚟架，過咗嚟做嘢都十幾年喇，我身體裡面個女仔叫美奈子，日本人嚟嘅。」
「唔…好意思呀，其實點解你會變成…咁嘅？我唔係話你唔好呀，不過應該已經…唔係「人」啦可？」阿輝傻咗，竟然出口發問。
「唔好意思呀，頭先梗係嚇得你哋好驚喇，其實你哋唔使咁驚架，呢度有好多鬼怪都係好「人」，好似「龍也」，佢只係個貪玩嘅小朋友嚟。我啦，我係呢度 嘅老闆兼打雜嚟，一至十四樓都係我負責架。地下嗰層同有D雜務就由阿妮負責，佢都係好「人」。仲有其他好「人」，呢幾日你哋都好有可能會見到…」
佢未講完啫，一隻白色毛茸茸嘅嘢衝咗埋嚟，係今日櫃位側邊見到嗰隻嘢呀！
佢衝咗上阿輝大脾，第一時間阿輝梗係嚇親啦，但係隻嘢好乖，坐到好定，仲撩阿輝摸佢同佢玩…
佢個樣好得意，成身毛茸茸，D毛好白好滑好有毛澤，隱約見到D毛裡面有一對黑得嚟亮晶晶嘅大眼，佢好似好鍾意阿輝咁。
「哈哈，「居居」佢好似好鍾意你噃，佢都係妖怪嚟，平時佢好惡架，佢應該係我哋呢度殺得最多「人」嘅妖怪。」
我唔敢出聲，但係驚慌嘅表情，達叔一睇就睇到。
「哈哈，我講嘅「人」係鬼同妖怪，「居居」佢淨係殺過鬼怪，佢未殺過一個人類架。」
阿輝一邊聽一邊同「居居」玩。
「戇「居居」，戇「居居」~」
聽達叔講咗咁多嘢，覺得佢唔似想害我哋，所以我都放心返D，
「可以再同你哋講吓一樣嘢，妖怪同鬼唔同，妖怪係怨氣產生嘅嘢，係未試過死同埋有實體嘅，我啦，美奈子啦，「龍也」佢哋幾個啦，都係因為怨氣先 變成咁，但係我哋冇怨過其他人，我哋都係怨自己過深先變成妖怪，好似「龍也」佢未識我之前，佢係日怨夜怨自己害死咗自己父母嘅，「龍也」佢天生淺藍色皮膚 仲有角，佢條村D人當佢係妖怪，佢父母就係為咗保護佢被人監生打死嘅。」
「咁「龍也」佢唔嬲殺佢父母嘅人咩？」阿輝似乎都放鬆返晒，佢咁問。
「佢從來冇見過佢父母條屍，唔知邊個係兇手，根本都唔知嬲邊個好，何況日本人有樣嘢好奇怪，佢哋天生好鍾意自責，所以日本有咁多鬼怪就係咁解。」
「咁你呢？」我問。
「哈哈，係噃，唔記得講我自己添，下次再講啦，你有朋友嚟搵你哋喇，不過提多你哋一樣嘢，3﹑6﹑9﹑12樓係人住嘅，其他樓層唔好亂去，尤其是13樓，記得呀。」
講完呢句，佢就同「居居」走咗去，而「大咀」就喺另一邊走咗過嚟，佢叫我哋去對面1220號房玩。
我哋跟咗去，原來成班隊友都喺晒度咁滯，喺度鋤啤，玩UNO。
我望望隻錶原來都已經成三點幾，我見到阿輝一入嚟都攰到即刻訓咗，我之後都坐咗埋一邊，坐坐吓喺張床度都不自覺訓著咗嚧。
唉，又笑又驚又奇幻嘅第一日就咁過去喇，唔知聽日又有咩驚險或者愉快嘅事會遇到呢？不過我肯定聽日見到小倩嗰陣，淨係會有開心同興奮，真係諗起訓著都識笑…
(待續)
下集預告︰
…左邊一張大頭相，右邊一張大頭相…