米米蓮妖怪作品 -《旅行‧如此‧難以忘‧記 》(百集長篇): 第013集 ~ 欣︰你決定要打死隻「大惡鬼」？

第013集 ~ 欣︰你決定要打死隻「大惡鬼」？

「但係點解會泄到D邪氣出嚟嘅？」我好奇咁問。

「鬼咩，我老婆有潔癖架，我成日叫佢個「捉鬼塔」唔使抹啦，邊可能污糟得過裡面隻嘢丫，佢係唔聽，係要抹，仲要抹晒D邊邊位，有咩辦法唔泄D氣出嚟丫，頭先佢肯定又係去抹「佢」啦，唉……」

「佢都唔係俾隻「惡鬼」上身，你其實唔係可以慢慢醫返「嬸嬸」佢咩？點解要咁大力咁打埋去呀？」

「先生」摸摸自己個頭，之後講︰—





「其實都係嘅，不過食藥不如打針，我頭先咁做咪即係打針囉，佢好快D架。唔好講佢啦，佢皮奀肉厚，冇事嘅。係噃，頭先講到邊話？」

「隻「惡鬼」控制住嗰家人嘅大女。」家姐講。

「喔，係呀。之後我上到去就捉咗佢喇。」

「就係咁簡單？」家姐咁問，其實我都以為仲有好長篇。

「係呀，嗰隻所謂嘅「猛嘢」戇居居咁，喺我面前仲匿喺個女仔個身度，D鬼雖然正常情況下匿喺人身係會難攪D嘅，但係對住我個「捉鬼塔」，你諗吓佢要揹住個有人氣嘅人，走都走唔到啦，幾蠢呢，我就咁行埋去佢度，噤個制就收咗佢喇。你話佢係咪戇居丫？」





「咁點解你知道佢哋之前發生嗰D嘢嘅？唔係隻「惡鬼」佢講你知咁恐怖呀？」我同家姐都好好奇。

「隻死人「怪物」試吓喺我面前提一次丫喇，我肯定即係打到佢魂飛魄散，最衰係要攞返去俾「組織」睇吓點處理咋，唔係我都做咗喇。至於我點解知晒成件慘事呢，其實係因為D鬼怪嘅邪氣唔會一下子就消散，我開一開天眼就可以根據D邪氣睇返晒成個過程。」

「咦，咁恐怖，俾我都唔睇呀，唔好俾我睇呀。」家姐講。

「咁最後個大女點呀？」我問。

「係呀，其實唔應該講五條人命，應該四條先啱，個女仔遇到D咁嘅事有咩可能唔黐線丫？佢最後傻咗，一直就講「唔好，唔好」呀咁，而家喺「青山」接受緊治療。唔好講D慘嘢啦。係噃，突然間諗起，其實你哋點解唔早D過去搵你哋朋友呀？」





「我都想，不過查過喇，冇晒機位喇。」我講。

「咁唔打吓電話俾佢先？」

「最衰阿輝佢啦，佢一直都冇開漫遊，都係我幫佢去啱啱開咗咋，電訊公司話要D時間，應該今日凌晨先開通到。」

「先生」佢望一望「嬸嬸」，見「嬸嬸」佢好似好返D咁，「先生」就扶起佢，但係「嬸嬸」佢好係仲呆呆地咁。

「先生」佢另個頭過嚟同我哋講︰「你哋口唔口渴呀？自己去嗰邊斟水丫，我扶一扶佢去抖吓先。」

見到原來「先生」佢咁愛錫「嬸嬸」，老人家一雙一對咁，我個心都覺得感覺好甜。

我同家姐都明白「先生」同「嬸嬸」的確冇可能行得開去幫阿輝，諗住起身就走。

「算啦，算啦，我唔理我哋「組織」嗰幾個成日話要超渡超渡超渡嘅「死人頭」喇，我聽日正午就打到隻「衰嘢」魂飛魄散，最多先斬後奏架啫。你哋兩個聽日再過嚟丫。」「先生」佢突然再另個頭過嚟講。





「你消滅咗佢之後先同我哋講得唔得呀？我好驚見到隻「惡鬼」呀。」家姐問。

「先生」諗咗一諗，之後咁講︰—

「咁我唔幫你哋喇。」

「唔好呀，唔好呀，我哋聽朝返嚟呢度搵你丫。」我匆忙回應。「先生」對我及個頭，之後就扶「嬸嬸」返入去。

我同家姐就離開咗「先生」個舖，搭車返屋企，一直就揸住部電話就等阿輝佢打嚟。

(待續)

下集預告︰





佢哋四個做咩事會同幾個男仔行咗去後樓梯呢？