米米蓮妖怪作品 -《旅行‧如此‧難以忘‧記 》(百集長篇): 第012集 ~ 欣︰個「捉鬼塔」困唔住隻「大惡鬼」？

第012集 ~ 欣︰個「捉鬼塔」困唔住隻「大惡鬼」？

幾秒之後見到「嬸嬸」佢慢慢行緊落嚟，個樣變晒，成面紫色，變得好陰森恐怖。

「先生」佢見到「嬸嬸」咁嘅樣，個樣突然變得好嚴肅，眼神亦堅定起嚟，收起晒D眼淚…

左手「啪」一聲打去旁邊，拿起八卦鏡，右手用兩隻手指捲起一道靈符，好大聲咁同我哋講。

「快做護身咒！」





我同家姐手忙腳亂，總算好快就做好手印。

「先生」都未等我哋做好手印，佢就對住「嬸嬸」伸出八卦鏡，「嬸嬸」「哇呀」一聲叫咗出嚟，D聲音震到我對耳好痛…

之後「先生」「噗」一聲右腳踏前，右手似係做咗個法印後一指指落去「嬸嬸」個額頭度，「嘭」一聲「嬸嬸」成個人彈咗埋堆衣紙度。

嗰吓「嘭」一聲好響架，我同家姐都俾佢嚇親，但係心裡面已經覺得「先生」佢真係好厲害…

之後諗到「嬸嬸」佢可能會撞親，想行過去扶佢之際，「先生」佢突然捉住我哋兩個…





「唔使理佢，佢皮奀肉厚，冇事嘅。」佢望咗一望「嬸嬸」就同我哋講。

「點解你咁講嘅？佢係你老婆嚟架喎。」我覺得「先生」佢咁講好似唔係咁啱咁。

「先生」笑咗一吓。

「你哋坐返好先。佢唔係第一次喇，上次就真係撞親嘅，捽咗D跌打酒，之後就好返啦。嗰次之後我將個舖四周圍都裝晒D淋嘢，冇角冇硬嘢會整親佢架喇，頭先嗰吓咁勁，佢個元神都未定，唔好掂佢呀，掂佢仲大鑊呀，聽到佢仲有呼吸就得架喇。」

唔知係咪家姐佢見到「先生」頭先咁厲害呢，所以佢講嘢嘅態度都溫柔晒。





「隻嘢原來真係咁猛架？隻「惡鬼」唔係被困住咩？點解會上到「嬸嬸」身嘅？」

「嘩，妹妹你變得咁溫柔嘅，知道我早D爆你一吓啦，而家個樣幾甜幾可愛呀！」「先生」好好奇家姐嘅語氣咁。

家姐佢塊面都紅晒，我望住家姐笑咗一吓，大家心情都放鬆返D。

「隻嘢猛就係架喇，唔係我點會成日提住佢係「猛嘢」丫。你哋亦可以放心，呢隻嘢我冇諗過放佢出嚟，所以一早整爛咗個「放鬼制」，困得好穩嘅，你哋可以放心，佢亦冇上我老婆身，只係D邪氣泄咗出嚟，攪到我老婆傻吓傻吓唔知自己做咩啫。」「先生」佢解釋返。

「但係點解會泄到D邪氣出嚟嘅？」我好奇咁問。

(待續)

下集預告︰

「…咁恐怖…唔好俾我睇呀！」